ຕອນບ່າຍ ເວລາ 2:00 ໂມງ ຂອງ ວັນທີ 01 ຕຸລາ 2020, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ ພ້ອມດ້ວຍຄະນະ ມີທ່ານຫົວໜ້າ-ຮອງກົມ , ຫົວໜ້າພະແນກ, ວິຊາການ ອ້ອມຂ້າງກະຊວງ ແລະ ຫົວໜ້າພະແນກອຸດສາຫະກໍາ ແລະ ການຄ້ານະຄອນຫລວງ ລົງເຄື່ອນໄຫວຊຸກຍູ້ວຽກງານ ຢູ່ 02 ໂຮງງານ ຊຶ່ງຖືວ່າເປັນຫົວໜ່ວຍທຸລະກິດທີ່ພົ້ນເດັ່ນຢູ່ນະຄອນຫຼວງວຽງຈັນ ຄື:
ໂຮງງານອຸດສາຫະກຳໂຕໂຢລາວ ຈຳກັດຜູ້ດຽວຢູ່ບ້ານ ໂພຄຳ ເມືອງໄຊທານີ ແລະ ຫໍ ພິພິດຕະພັນໄມ້ລາວ ວຽງຈັນ ສິນລະປະຮ່ວມສະໄໝ ຢູ່ບ້ານ ຊ້າງຄູ່ ເມືອງໄຊທານີ ນະຄອນຫລວງວຽງຈັນ; ໂດຍໄດ້ຮັບການຕ້ອນຮັບຈາກ ທ່ານ ນາງ ລັງກອນ ໄຊຍະວົງ ປະທານ ໂຮງງານອຸດສາຫະກຳໂຕໂຢລາວ.
ຊຶ່ງໂຮງງານດັ່ງກ່າວໄດ້ສ້າງຕັ້ງ ປີ 2016 ເພື່ອຜະລິດທໍ່ ແລະ ອຸປະກອນກໍ່ສ້າງລະບົບນ້ຳ ໂດຍຮັບການຖ່າຍທອດເຕັກໂນໂລຊີ ຈາກຕ່າງປະເທດ ແລະ ນຳເອົາວັດຖຸດິບທີ່ໄດ້ມາດຕະຖານຈາກຕ່າງປະເທດເຂົ້າມາຜະລິດ, ມີລະບົບຄຸ້ມຄອງທີ່ໄດ້ມາດຕະຖານສາກົນ ISO: 9001 ປີ 2015 ໂດຍໂຮງງານມີກຳລັງການຜະລິດ 15.000 ໂຕນ ຕໍ່ປີ.
ປະກອບມີຜະລິດຕະພັນທໍ່ນ້ຳ ເອັສດີພີອີ, ທໍ່ພີພີອາ ດີພີອີ, ທໍ່ພີວີຊີ, ທໍ່ຢູພີວີຊີ , ຂໍ້ຕໍ່ຈອດເອັສດີພີອີ, ທໍ່ຫຸ້ມສາຍໄຟ, ທໍ່ຫຸ້ມສາຍໂທລະຄົມ ແລະ ອຸປະກອນອື່ນໆ;
ໃນໂອກາດນີ້ ທ່ານ ລັດຖະມົນຕີ ໄດ້ມີຄຳເຫັນວ່າ: ການລົງ ຢ້ຽມຢາມ ແລະ ຊຸກຍູ້ຄັ້ງນີ້ ເພື່ອເປັນສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຸດສາຫະກຳ ແລະ ການຄ້າ ທັງເປັນການຊຸກຍູ້ສົ່ງເສີມຂະບວນການຜະລິດ ຂອງໂຮງງານອຸດສາຫະກຳ ທໍ່ໂຕໂຢລາວ ຊຶ່ງເປັນໂຮງງານໜຶ່ງທີ່ຜະລິດທໍ່ໄດ້ມາດຕະຖານຮັບໃຊ້ສັງຄົມ ແລະ ຫຼຸດຜ່ອນການນຳເຂົ້າສິນຄ້າຈາກຕ່າງປະເທດ, ພ້ອມນັ້ນ ກໍສະແດງຄວາມຊົມເຊີຍຕໍ່ ປະທານໂຮງງານທີ່ໄດ້ຕັດສິນໃຈສູ້ຊົນກັບສະພາບຄວາມຫຍຸ້ງຍາກ ພ້ອມທັງຍົກສູງຄຸນນະພາບການຜະລິດ ໃຫ້ນັບມື້ດີຂຶ້ນຢ່າງຕໍ່ເນື່ອງ.
ພ້ອມກັນນີ້ ທ່ານ ລມຕ ຍັງນຳພາຄະນະທີມງານໄປທ່ຽວຊົມສະຖານທີ່ ຫໍພິພິດຕະພັນໄມ້ລາວວຽງຈັນ ສິນລະປະຮ່ວມສະໄໝ ຂອງທ່ານ ພິຊິດ ໄຊຍະທິດ ເພື່ອເປັນການຊຸກຍູ້ສົ່ງເສີມການທ່ອງທ່ຽວຂອງລາວ ໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດເຫັນເຖິງສີໄມ້ລາຍມື ຂອງຄົນລາວ ທີ່ໄດ້ສ້າງຊື່ສຽງ ອອກສູ່ຕ່າງປະເທດ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
