ຕອນເຊົ້າ ເວລາ 9:00 ໂມງ ຂອງ ວັນທີ 06 ຕຸລາ 2020, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ ພ້ອມດ້ວຍຄະນະ ມີທ່ານຫົວໜ້າ-ຮອງກົມ , ຫົວໜ້າພະແນກ, ວິຊາການຈໍານວນໜຶ່ງ ອ້ອມຂ້າງກະຊວງ ແລະ ຫົວໜ້າພະແນກອຸດສາຫະກໍາ ແລະ ການຄ້ານະຄອນຫລວງ ລົງເຄື່ອນໄຫວຊຸກຍູ້ ກຸ່ມບໍລິສັດ ກໍ່ສ້າງ ແລະ ລົງທຶນ ແຂວງຢູນານຮຸ້ນສ່ວນ ຈຳກັດ ຊຶ່ງຖືວ່າເປັນຫົວໜ່ວຍທຸລະກິດທີ່ພົ້ນເດັ່ນຢູ່ນະຄອນຫຼວງວຽງຈັນ ມີ ໂຄງການລົງທຶນທີ່ສຳຄັນ ໃນ ສປປ ລາວ, ເປັນກຸ່ມ ບໍລິສັດ ທີ່ໃຫຍ່ ລົງທຶນເຂົ້າໃນການກໍ່ສ້າງຢູ່ເຂດເສດຖະກິດພິເສດ ໄຊເສດຖາ ກວມລວມນະຄອນຫຼວງວຽງຈັນ ມູນຄ່າການລົງທຶນ 1,2 ຕື້ໂດລາສະຫະລັດ ເຂດດັ່ງກ່າວມີບໍລິສັດ ເຂົ້າໄປລົງທຶນແລ້ວ 85 ຫົວໜ່ວຍ ຈາກ 07 ປະເທດ ໃນນັ້ນມີ 1 ບໍລິສັດ ມາຈາກແຂວງຢູນານ ສປ ຈີນ.
ຊຶ່ງເປັນບໍລິສັດທີ່ມີທ່າແຮງ ແລະ ປະສົບການໃນການກໍ່ສ້າງຢູ່ປະເທດລາວ ເກືອບ 20 ກວ່າປີ ປັດຈຸບັນໂຄງການ ລົງທຶນໃຫຍ່ໃນລາວ ທີ່ດຳເນີນການກໍ່ສ້າງມີຄື: ໂຄງການກໍ່ສ້າງ ທາງລົດໄຟ ລາວ-ຈີນ,ໂຄງການເຂດເສດຖະກິດພິເສດ ໄຊເສດຖາ ກວມລວມ , ໂຄງການໂຮງງານກັ່ນນ້ຳມັນ ແລະ ອື່ນໆ;
ໂດຍໃຫ້ການຕ້ອນຮັບ ຂອງ ທ່ານ ຫິວ ຫູ ປະທານກຸ່ມບໍລິສັດ ກໍ່ສ້າງ ແລະ ລົງທຶນ ຂອງແຂວງຢູນານຮຸ້ນສ່ວນ ຈຳກັດ ໃນໂອກາດດັ່ງກ່າວ ທ່ານ ຫິວ ຫູ ໄດ້ລາຍງານສະພາບຄວາມຄືບໜ້າ ຂອງການກໍ່ສ້າງໂຄງການເຂດເສດຖະກິດພິເສດ ໄຊເສດຖາກວມລວມ ປັດຈຸບັນການພັດທະນາໄລຍະທີ 1 ໄດ້ສຳເລັດພື້ນຖານໂຄງລ່າງ ໃນການ ປັບໜ້າດິນໂດຍພື້ນຖານ ມີເນື້ອທີ່ ທັງໝົດ 400 ເຮັກຕາ ແລະ ພວມດຳເນີນການຈັດຕັ້ງປະຕິບັດໄລຍະ 2 ໂດຍແຜນການເປົ້າໝາຍຈະພັດທະນາເປັນເຂດທ່ອງທ່ຽວ, ເຂດການຄ້າ ແລະ ຕົວເມືອງໃໝ່ ຂອງນະຄອນຫຼວງວຽງຈັນ ພ້ອມທັງການສະໜອງການຄ້າຂະໜາດນ້ອຍຄົບວົງຈອນ , ການຟື້ນຟູເສັ້ນທາງສີຂຽວ, ການກໍ່ສ້າງລະບົບສະໜອງໄຟຟ້າ ແລະ ນ້ຳປະປາ ທີ່ທັນສະໄໝ, ຈຸດກວດດ່ານພາສີ, ອ່າງບຳບັດນ້ຳເປື້ອນ, ທີ່ພັກອາໄສ, ລະບົບການບໍລິການຂອງຕົວເມືອງທັນສະໄໝ ແລະ ອື່ນໆ.
ໃນໂອກາດນີ້ ທ່ານ ລັດຖະມົນຕີ ໄດ້ມີຄຳເຫັນວ່າ: ການລົງ ຢ້ຽມຢາມ ແລະ ຊຸກຍູ້ຄັ້ງນີ້ ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຸດສາຫະກຳ ແລະ ການຄ້າ ທັງເປັນການຊຸກຍູ້ການກໍ່ສ້າງຂອງ ບໍລິສັດ ແຂວງຢູນານ ທີ່ມີທ່າແຮງໃນການພັດທະນາ ແລະ ໄດ້ຮັບຊໍາປະທານການກໍ່ສ້າງເຂດເສດຖະກິດພິເສດ ໄຊເສດຖາ ກວມລວມ ຄິດວ່າໂຄງການດັ່ງກ່າວຈະໄປຕາມເປົ້າໝາຍ ແລະ ແຜນການທີ່ນຳນົດເອົາໄວ້ ດ້ວຍຜົນສຳເລັດ, ພ້ອມນັ້ນ ກໍສະແດງຄວາມຊົມເຊີຍຕໍ່ ປະທານກຸ່ມບໍລິສັດທີ່ໄດ້ຕັດສິນໃຈສູ້ຊົນກັບສະພາບຄວາມຫຍຸ້ງຍາກ ພ້ອມທັງຍົກສູງຄຸນນະພາບ ໃນການກໍ່ສ້າງໃຫ້ນັບມື້ດີຂຶ້ນ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
