ກອງປະຊຸມຄະນະກໍາມະການຮ່ວມມື ດ້ານເສດຖະກິດ-ການຄ້າ ແລະ ເຕັກນິກ ລາວ-ຈີນ ຄັ້ງທີ X ຈັດຂຶ້ນວັນທີ 19 ພະຈິກ 2020 ຜ່ານມາ, ທີ່ຫ້ອງປະຊຸມຂອງກະຊວງອຸດສາຫະກໍາ ແລະ ການຄ້າ ໂດຍຮູບແບບ ກອງປະຊຸມທາງໄກ (Video Conference) ພາຍໃຕ້ການເປັນ ປະທານຮ່ວມ ຂອງ ທ່ານ ນ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານຄະນະກໍາມະການຮ່ວມມື ລາວ-ຈີນ ແລະ ທ່ານ Li Chenggang ຜູ້ຊ່ວຍລັດຖະມົນຕີ ກະຊວງການຄ້າ ສປ ຈີນ, ປະທານຄະນະກໍາມະການຮ່ວມມື ຈີນ-ລາວ; ຊຶ່ງມີຄະນະຜູ້ແທນທີ່ກ່ຽວຂ້ອງທັງສອງຝ່າຍເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ໄດ້ທົບທວນຄືນຜົນສໍາເລັດການປະຕິບັດການຮ່ວມມື ລາວ-ຈີນ ໃນຂົງເຂດເສດຖະກິດ-ການຄ້າ ແລະ ເຕັກນິກ ຊຶ່ງທັງສອງຝ່າຍສັງເກດເຫັນວ່າ: ແຕ່ກາງປີ 2018 ເຖິງປະຈຸບັນ ລັດຖະບານ ສປ ຈີນ ໄດ້ໃຫ້ການຊ່ວຍເຫຼືອລ້າແກ່ ສປປ ລາວ ມູນຄ່າ 4 ຕື້ຢວນ ໃນໄລຍະ 3 ປີ ແຕ່ປີ 2018-2020 ໂດຍໄດ້ໃຫ້ບູລິມະສິດເຂົ້າໃນ 8 ໂຄງການໃຫຍ່ທີ່ສໍາຄັນ ຂອງ ສປປ ລາວ; ຊຶ່ງມາຮອດປະຈຸບັນນີ້ທັງສອງຝ່າຍກໍ່ໄດ້ສືບຕໍ່ດໍາເນີນການຈັດຕັ້ງປະຕິບັດບັນດາໂຄງການທີ່ສອງລັດຖະບານໄດ້ໃຫ້ຄວາມສໍາຄັນເອົາໃຈໃສ່ຢ່າງຕັ້ງໜ້າ ແລະ ມີຄວາມຄືບໜ້າເປັນຢ່າງດີ.
– ການຄ້າ ລາວ-ຈີນ ໃນໄລຍະຜ່ານມາປີ 2019 ຍອດມູນຄ່າການຄ້າສອງຝ່າຍບັນລຸເຖິງ 3,92 ຕື້ ໂດລາສາຫະລັດເພີ່ມຂຶ້ນ 12,9%. ສໍາລັບປີ 2020 ແຕ່ເດືອນ ມັງກອນ ຫາ ເດືອນ ກັນຍາ ປີ 2020 ມູນຄ່າການຄ້າ ລະຫວ່າງ ສປປ ລາວ ແລະ ສປ ຈີນ ບັນລຸ ໄດ້ 2, 48 ຕື້ ໂດລາສາຫະລັດ ຫຼຸດລົງ -12,2% ເນື່ອງຈາກຜົນກະທົບຈາກ ໂຄວິດ-19 ສົ່ງຜົນໃຫ້ການແລກປ່ຽນສິນຄ້າຂອງທັງສອງຝ່າຍຫຼຸດລົງ ເປັນຈໍານວນຫຼວງຫຼາຍ. ພິເສດ ໃນປີ 2019-2020 ລັດຖະບານຈີນ ຍັງອະນຸມັດໂກຕ້າ ການສົ່ງອອກ ເຂົ້າສານຂອງ ລາວໄປຈີນ ຈໍານວນ 50.000 ໂຕນ, ນອກຈາກນັ້ນ ກໍ່ຍັງພວມຕັ້ງໜ້າຊຸກຍູ້ການສົ່ງອອກ ງົວ-ຄວາຍ ເປັນ ແລະ ເຈລະຈາໂກຕ້າ ໃບຢາສູບ ແລະ ສິນຄ້າກະສິກໍາຂອງລາວ ສົ່ງອອກໄປຈີນ.
- ການລົງທຶນຂອງ ສປ ຈີນ ຢູ່ ສປປ ລາວ ຮອດເດືອນ ຕຸລາ 2020 ມີທັງໝົດ 793 ໂຄງການ, ມູນຄ່າອະນຸມັດທັງໝົດຫຼາຍກວ່າ 12 ຕື້ ໂດລາສາຫະລັດ ເປັນອັນດັບ 1 ໃນ 52 ປະເທດ ແລະ ເຂດແຄວ້ນທີ່ເຂົ້າມາລົງທຶນ ຢູ່ ສປປ ລາວ. ນອກນັ້ນ ສປ ຈີນ ຍັງໄດ້ລົງທຶນ ໃນເຂດເສດຖະກິດພິເສດ ທີ່ໄດ້ຮັບການອະນຸມັດທັງໝົດ 463 ໂຄງການ, ມີມູນຄ່າອະນຸມັດທັງໝົດ ຫຼາຍກວ່າ 3,1 ຕື້ ໂດລາສາຫະລັດ. ທັງສອງຝ່າຍໄດ້ສັງເກດຕີລາຄາໂດຍລວມວ່າ ການຮ່ວມມືສອງຝ່າຍໃນໄລຍະຜ່ານມາ ເຖິງຈະມີຄວາມຫຍຸ້ງຍາກທາງດ້ານພະຍາດໂຄວິດ-19 ແຕ່ກໍ່ມີຜົນສໍາເລັດໃນຫຼາຍດ້ານທີ່ໄດ້ກ່າວມາຂ້າງເທິງນັ້ນ ແລະ ກໍ່ເຫັນວ່າ: ໃນໄລຍະຫຍຸ້ງຍາກ ລັດຖະບານສອງຝ່າຍກໍ່ໄດ້ວາງຫຼາຍໆ ມາດຕະການເພື່ອຊຸກຍູ້ການປະຕິບັດການຮ່ວມມືໃຫ້ໄດ້ຮັບຄວາມຄືບໜ້າດ້ວຍຜົນສໍາເລັດອັນໃຫຍ່ຫຼວງ.
– ວຽກງານການທ່ອງທ່ຽວ, ໃນປີ 2019 ປີທ່ອງທ່ຽວລາວ-ຈີນ ຖືວ່າປະສົບຜົນສຳເລັດພໍສົມຄວນ ໄດ້ດຶງດູດນັກທ່ອງທ່ຽວຈີນເຂົ້້າມາລາວປະມານ 1 ລ້ານກວ່າຄົນ, ຍ້ອນການຮ່ວມມືທັງສອງຝ່າຍ ຈີນໄດ້ໃຫ້ການສະໜັບສະໜູນໄດ້ມີໂອກາດເຂົ້າຮ່ວມມງານວາງສະແດງສິນຄ້າຢູ່ ນະຄອນຄຸນຫມິງ, ກຸ້ຍຫຼິນ, ຝູຈ້ຽນ ແລະ ຊຽງໄຮ້ ເປັນການຊ່ວຍເຫຼືອທີ່ມີປະສິດທິພາບເຮັດໃຫ້ນັກທ່ອງທ່ຽວເພີ່ມຂຶ້ນ.
ນອກຈາກນີ້ ລັດຖະບານ ຈີນ ຍັງສະໜອງເງິນກູ້ ພິເສດດອກເບ້ຍຕໍ່າ ແລະ ເງິນກູ້ສິນເຊື່ອພິເສດໃຫ້ແກ່ສປປ ລາວ, ເພື່ອດໍາເນີນການຈັດຕັ້ງປະຕິບັດໂຄງການຕ່າງໆເຊັ່ນ: ໂຄງການກໍ່ສ້າງທາງລົດໄຟ ລາວ-ຈີນ, ທາງດ່ວນນະຄອນຫຼວງວຽງຈັນ-ວັງວຽງ, ດາວທຽມລາວ, ໂຮງໝໍມະໂຫສົດ, ເຂດເສດຖະກິດພິເສດບໍ່ເຕັນ-ບໍ່ຫານ, ເຂດເສດຖະກິດກວມລວມໄຊເສດຖາ, ກໍ່ສ້າງເຂື່ອນ, ສາຍສົ່ງໄຟຟ້າ ແລະ ອື່ນໆ ອັນເປັນການປະກອບສ່ວນ ສໍາຄັນຍິ່ງເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃນປະຈຸບັນ ແລະ ອະນາຄົດ.
ໃນກອງປະຊຸມສອງຝ່າຍໄດ້ຍົກບັນຫາ ທີ່ຕ່າງຝ່າຍຕ່າງມີຄວາມສົນໃຈຕໍ່ກັນ ໂດຍຝ່າຍຈີນ ເຫັນດີຊຸກຍູ້ ສົ່ງເສີມຂໍ້ລິເລີ່ມຂອງຈີນ ກ່ຽວກັບນະໂຍບາຍ “ໜຶ່ງແລວໜຶ່ງເສັ້ນທາງ” ຂອງ ສປ ຈີນ ໃຫ້ເຊື່ອມໂຍງ ເຂົ້າກັບແຜນພັດທະນາເສດຖະກິດ-ສັງຄົມ ຄັ້ງທີ 9 ຂອງລາວ. ການຮ່ວມມື ໃນຂົງເຂດເຊື່ອມໂຍງເຊື່ອມຈອດໂຄງການທາງລົດໄຟ ລາວ-ຈີນ, ທາງດ່ວນລາວ-ຈີນ ກໍ່ໄດ້ມີຜົນສໍາເລັດໃນແຕ່ລະໄລຍະຢ່າງໄດ້ຮັບໝາກຜົນດີ. ສໍາລັບ ໂຄງການກໍ່ສ້າງທາງດ່ວນ ລາວ-ຈີນ ແມ່ນຈະໄດ້ເປີດພິທີນໍາໃຊ້ ຢ່າງເປັນທາງການເພື່ອສະເຫຼີມສະຫຼອງ ວັນຊາດ 2 ທັນວາ ຄົບຮອບ 45 ປີ ທີ່ຈະມາເຖິງນີ້. ນອກຈາກນີ້ ທັງສອງຝ່າຍຍັງໄດ້ເພີ່ມທະວີການຮ່ວມມື ພາຍໃຕ້ຂອບການຮ່ວມມື ພາກພື້ນ ແລະ ອະນຸພາກພື້ນເຊັ່ນ: ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ. ຝ່າຍຈີນຍັງໄດ້ມີການສະໜອງທຶນ ຈໍານວນ 300 ລ້ານ ໂດລາສາຫະລັດ ເພື່ອເປັນກອງທຶນພິເສດ ໃນການດໍາເນີນການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແຕ່ປີ 2018-2022, ການຮ່ວມມືອາຊຽນ-ຈີນ ໃນປີ 2021 ຈະມີການສະເຫຼີມສະຫຼອງສາຍພົວພັນການຮ່ວມມື ອາຊຽນ-ຈີນຄົບຮອບ 30 ປີ ແລະ ການຮ່ວມມື RCEP ກໍ່ໄດ້ມີການຊຸກຍູ້ວຽກງານດັ່ງກ່າວ ຈົນສາມາດໄດ້ລົງນາມຮ່ວມກັນ ຂອງເອກະສານຮ່ວມມືດັ່ງກ່າວ.
ສໍາລັບກອງປະຊຸມ ຄັ້ງທີ XI ຝ່າຍລາວເປັນເຈົ້າພາບ ຈະໄດ້ຈັດຂຶ້ນໃນທ້າຍປີ 2021 ຊຶ່ງຝ່າຍລາວຈະນໍາໄປປຶກສາຫາລື ພິຈາລະນາເປັນເອກະພາບກັນແລ້ວຈະແຈ້ງໃຫ້ຝ່າຍຈີນຮັບຊາບໂດຍຜ່ານທາງການທູດຕາມພາຍຫຼັງ.
ພາບ ແລະ ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
ແຫຼ່ງຂ່າວ: ທ ຈັນດາ ຫ້ອງການຄະນະກໍາມະການຮ່ວມມືລາວ-ຈີນ
