ຕອນເຊົ້າເວລາ 8:30 ໂມງ ຂອງວັນທີ 11 ມັງກອນ 2021 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມເຜີຍແຜ່ ເອກະສານກ່ຽວກັບການປ້ອງກັນກອງປະຊຸມໃຫຍ່ຂອງພັກ ແລະ ມີບັນດາທ່ານ ຫົວໜ້າ-ຮອງຫົວໜ້າກົມ, ຫົວໜ້າ-ຮອງພະແນກ ຂອງບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ຜູ້ຕາງໜ້າສະພາອຸດສາຫະກໍາ ແລະ ການຄ້າ ແຫ່ງຊາດລາວ, ບັນດາລັດວິສາຫະກິດ ແລະ ບໍລິສັດ ທີ່ຂຶ້ນກັບຄວາມຮັບຜິດຊອບ ຂອງກະຊວງ ອຄ ເຂົ້າຮ່ວມຮັບຟັງການເຜີຍແຜ່ ປະມານ 200 ທ່ານ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ສົມຈິດ ອິນທະມິດ ກຳມະການຄະນະປະຈຳ, ຮອງລັດຖະມົນຕີ, ຮອງຫົວໜ້າຄະນະປ້ອງກັນພາຍໃນ ໂດຍມີຈຸດປະສົງ ເພື່ອຮັບປະກັນໃຫ້ແກ່ງານສຳຄັນເປັນຕົ້ນການດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ, ການເລືອກຕັ້ງສະມາຊິກສະພາແຫ່ງຊາດ ຊຸດທີ IX, ການສະເຫລີມສະຫລອງວັນສ້າງຕັ້ງກຳລັງ ປ້ອງກັນຄວາມສະຫງົບ ຄົບຮອບ 60 ປີ ແລະ ວັນສຳຄັນອື່ນໆ ທີ່ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າ ຈະໄດ້ພ້ອມກັນສ້າງຂະບວນການດ້ານຕ່າງໆ ເພື່ອຂ່ຳນັບຊົມເຊີຍ ແລະ ສະເຫລີມສະຫລອງ ເວົ້າລວມ ເວົ້າສະເພາະການກະກຽມ ແລະ ດຳເນີນກອງປະຊຸມໃຫຍ່ຂອງພັກ ບັນລຸຜົນສຳເລັດຢ່າງຈົບງາມນັ້ນ ຄະນະເລຂາທິການສູນກາງພັກໄດ້ອອກຄຳສັ່ງເລກທີ 19/ຄລສພ, ລົງວັນທີ 30 ທັນວາ 2020 ວ່າດ້ວຍການເພີ່ມທະວີການນຳພາຊີ້ນຳ ການກະກຽມ ແລະ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຊຶ່ງໜຶ່ງໃນຂະບວນການທີ່ຕ້ອງໄດ້ເອົາໃຈໃສ່ກະກຽມໃນໄລຍະກ່ອນ ແລະ ໄລຍະກອງປະຊຸມໃຫຍ່ແມ່ນໃຫ້ເພີ່ມທະວີການຊີ້ນຳວຽກງານຄວາມສະຫງົບ, ຄວາມເປັນລະບຽບຮຽບຮ້ອຍ ພ້ອມທັງເອົາໃຈໃສ່ສຶກສາອົບຮົມ, ປຸກລະດົມປະຊາຊົນລາວບັນດາເຜົ່າ, ທຸກຊັ້ນຄົນເຂົ້າຮ່ວມວຽກງານປ້ອງກັນກອງປະຊຸມໃຫຍ່ ໃຫ້ມີຄວາມສະຫງົບ ປອດໄພ 100%. ພ້ອມນັ້ນ ກໍ່ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ກໍຄືໜໍ່ແໜງຄວາມບໍ່ສະຫງົບ ບໍ່ໃຫ້ມີເຫດການທີ່ບໍ່ດີເກີດຂຶ້ນຢ່າງເດັດຂາດ.
ພ້ອມທັງການຂຶ້ນອ່ານຜ່ານເອກະສານຂໍ້ຕົກລົງ ແຕ່ງຕັ້ງຄະນະປ້ອງກັນພາຍໃນຊຸດໃໝ່ ຂອງກະຊວງ ອຄ ແລະ ການເຜີຍແຜ່ເອກະສານການປ້ອງກັນກອງປະຊຸມໃຫຍ່ຂອງພັກ ໂດຍສະຫາຍ ພັນເອກ ພູພອນ ວົງພະໃຕ ຮອງປະທານກວດກາພັກ ກະຊວງ ປກສ, ຄະນະພັກກົມໃຫຍ່ສັນຕິບານ, ເລຂາໜ່ວຍພັກກົມປ້ອງກັນພາຍໃນ(200), ຫົວໜ້າກົມ ປ້ອງກັນພາຍໃນ ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ທີ່ສັງກັດກະຊວງອຸດສາຫະກຳ ແລະ ການຄ້າ.
ຕອນທ້າຍ ທ່ານ ສົມຈິດ ອິນທະມິດ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ພະນັກງານ ກະຊວງ ອຄ ໂດຍນໍາເອົາເນື້ອໃນກອງປະຊຸມຄັ້ງນີ້ ຊຶ່ງເປັນການປະຊຸມຮ່ວມກັນຄັ້ງທຳອິດ ລະຫວ່າງ ຄະນະປ້ອງກັນພາຍໃນກະຊວງປ້ອງກັນຄວາມສະຫງົບ ແລະ ກະຊວງອຸດສາຫະກຳ ແລະ ການຄ້າ ຖືວ່າເປັນຈຸດເລີ່່ມຕົ້ນ ແລະ ເປັນນິມິດໝາຍອັນດີ ທີ່ຄະນະປ້ອງກັນພາຍໃນສອງກະຊວງ ຈະໄດ້ສືບຕໍ່ຜັນຂະຫຍາຍຜົນຂອງກອງປະຊຸມຄັ້ງນີ້ ເພື່ອເປັນແນວທາງໃຫ້ແກ່ການເພີ່ມທະວີການຮ່ວມມືແລກປ່ຽນຄວາມຮູ້ ບົດຮຽນ ແລະ ປະສົບການໃນດ້ານຕ່າງໆທີ່ຕ່າງຝ່າຍມີຄວາມສົນໃຈຮ່ວມກັນໃຫ້ມີຫລາຍຮູບ ຫລາຍສີຕື່ມອີກໃນຕໍ່ໜ້າ ແລະ ເພື່ອຮັບປະກັນເຮັດໃຫ້ການດຳເນີນກອງປະຊຸມເຜີຍແຜ່ເອກະສານ ກ່ຽວກັບການປ້ອງກັນກອງປະຊຸມໃຫຍ່ ບັນລຸຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພາຍຫລັງສຳເລັດກອງປະຊຸມນີ້ແລ້ວ ສະເໜີມອບໃຫ້ບັນດາສະຫາຍຄະນະປ້ອງກັນພາຍໃນ ກະຊວງອຸດສາຫະກຳ ແລະ ການຄ້າ ທີ່ຫາກໍ່ແຕ່ງຕັ້ງ ຈົ່ງພ້ອມກັນນຳເອົາເນື້ອໃນຈິດໃຈຊີ້ນຳຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງຕົນ ໃຫ້ມີປະສິດທິຜົນ.
ພາບ-ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມຜຮ
