ຕອນບ່າຍ ເວລາ 3: 00 ໂມງ ຂອງວັນທີ 17 ມີນາ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາຂອງ ທ່ານ Yoshiharu YONEYAMA, ເອກອັກຄະລັດຖະທູດຜູ້ມີອໍານາດເຕັມ ແຫ່ງປະເທດຍີ່ປຸ່ນ ປະຈຳ ສປປ ລາວ (ຫົວໜ້າອົງການ JICA ປະຈໍາລາວ), ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 8 ທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Yoshiharu YONEYAMA, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດໃຫ້ແກ່ສອງປະເທດ ລາວ-ຍີ່ປຸ່ນ ໃນໄລຍະຜ່ານມາ ທ່ານ ກໍ່ມີຜົນງານ ໃນການສ້າງສາຍພົວພັນຮ່ວມມືທີ່ດີໃຫ້ນັບມື້ນັບແໜ້ນແຟ້ນຍິ່ງຂຶ້ນຫຼາຍດ້ານ ແລະ ຕີລາຄາສູງຕໍ່ການຊ່ວຍເຫຼືອໃຫ້ແກ່ລາວເປັນຕົ້ນ ບັນດາໂຄງການດ້ານການສຶກສາ, ສາທາລະນາສຸກ ແລະ ເຟີນີເຈີ້ ເພື່ອສົ່ງອອກໃຫ້ແກ່ ສປປ ລາວ , ນອກນັ້ນຍັງເປັນຄູ່ຄ້າຮ່ວມກັນ ເປັນຕົ້ນສິນຄ້າການນຳເຂົ້າ-ສົ່ງອອກທີ່ເພີ່ມຂຶ້ນ; ທ່ານ ລັດຖະມົນຕີໄດ້ສະເໜີໃນຕໍ່ໜ້າໃຫ້ມີການຄ້າຮ່ວມມືກັນຫຼາຍຂຶ້ນ, ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ທັງສອງຝ່າຍສືບຕໍ່ຮ່ວມມືພັດທະນາເສດຖະກິດ ແລະ ວຽກງານອື່ນໆໃນຕໍ່ໜ້າໃຫ້ດີຂຶ້ນກວ່າເກົ່າ.
ທ່ານ Yoshiharu YONEYAMA, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈທີ່ໄດ້ດໍາລົງຕໍາແໜ່ງເປັນ ເອກອັກຄະລັດຖະທູດຜູ້ມີອໍານາດເຕັມ ແຫ່ງປະເທດຍີ່ປຸ່ນ ປະຈໍາສປປ ລາວ ຂໍສະແດງຄວາມຂອບໃຈມາຍັງທ່ານລັດຖະມົນຕີໃນໄລຍະທີ່ດຳລົງຕຳແໜ່ງເປັນເອກອັກຄະລັດຖະທູດຢູ່ລາວໄດ້ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ໄດ້ອວຍພອນໄຊໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນດ້ວຍໄມຕີຈິດມິດຕະພາບ.
ພາບ-ຂ່າວ ໂດຍ: ໄພຄໍາອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
