ຕອນບ່າຍ ເວລາ 2: 00 ໂມງ ຂອງວັນທີ 2 ເມສາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ LE THI PHUONG HOA, ທີ່ປຶກສາທູດການຄ້າ ປະຈຳລາວ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 9 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ ນາງ LE THI PHUONG HOA, ທີ່ປຶກສາທູດດ້ານ ການຄ້າ ໃຫ້ແກ່ ສປປ ລາວ ເພື່ອເຮັດໃຫ້ ສອງປະເທດ ລາວ-ຫວຽດນາມ ໄດ້ເສີມຂະຫຍາຍການພົວພັນທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ຊຶ່ງສອງປະເທດໄດ້ຮ່ວມກັນດ້ານການຄ້າໃນໄລຍະຜ່ານມາ ເປັນຕົ້ນການນຳເຂົ້າ-ສົ່ງອອກ ສິນຄ້າທີ່ມີທ່າແຮງ, ການຄ້າຊາຍແດນ ແລະ ການລົງທຶນຢູ່ລາວ. ນອກນັ້ນຍັງໄດ້ປຶກສາຫາລືກັນໃນວຽກງານຫຼາຍດ້ານທີ່ປິ່ນອ້ອມເປັນພື້ນຖານໂຄງລ່າງໃຫ້ແກ່ລາວ; ໃນນີ້ ທ່ານ LE THI PHUONG HOA, ໄດ້ສະເໜີໃນຕໍ່ໜ້າຈະໃຫ້ການຮ່ວມມືດ້ານການຄ້າໃຫ້ຫຼາຍຂຶ້ນ ແລະ ສະແດງຄວາມຮູ້ສຶກພູມໃຈ ທີ່ມີໂອກາດເຂົ້າມາພົບປະປຶກສາຫາລືເພື່ອແກ້ໄຂ ບັນຫາດ້ານ ການຄ້າລະຫວ່າງສອງປະເທດ ໃຫ້ດີຂຶ້ນກວ່າເກົ່າ.
ຕອນທ້າຍກໍ່ສະແດງຄວາມຂອບໃຈມາຍັງທ່ານລັດຖະມົນຕີ ທີ່ໄດ້ໃຫ້ການຕ້ອນຮັບເປັນຢ່າງດີ ພ້ອມທັງໃຫ້ຄຳປຶກສາສິ່ງອຳນວຍຄວາມສະດວກໃນວຽກງານ ດ້ານການຄ້າໃຫ້ແກ່ທັງສອງປະເທດ.
ພາບ-ຂ່າວ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
