ຕອນເຊົ້າ ເວລາ 11: 00 ໂມງ ຂອງວັນທີ 21 ເມສາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອິວາກາມິ ຫົວໜ້າອົງການ JETRO ປະຈຳ ສປປ ລາວ ພ້ອມຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານຫົວໜ້າອົງການ JETRO ປະຈໍາ ສປປ ລາວ ເພື່ອເຮັດໃຫ້ ສອງຝ່າຍ ໄດ້ເສີມຂະຫຍາຍການພົວພັນທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄືນຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການຮ່ວມມືດ້ານ ການຄ້າ ໃນການສ້າງໂອກາດຈັບຄູ່ຄ້ານັກທຸລະກິດລາວ ແລະ ຍີ່ປຸ່ນ (Matching), ການສົ່ງເສີມວຽກງານຫັດຖະກໍາ ແລະ ວຽກງານສົ່ງເສີມ ໜຶ່ງເມືອງໜຶ່ງຜະລິດຕະພັນ(ODOP) ຂອງລາວ. ໃນນີ້: ທ່ານຫົວໜ້າອົງການ JETRO ໄດ້ສະເໜີໃນຕໍ່ໜ້າຈະໃຫ້ການຮ່ວມມື ພ້ອມດຽວກັນນີ້ ກໍ່ສະແດງຄວາມຍິນດີທີ່ທ່ານ ລັດຖະມົນຕີ ມາຮັບຕໍາແໜ່ງໜ້າທີ່ໃໝ່ ພ້ອມທັງຂອບໃຈມາຍັງທ່ານລັດຖະມົນຕີກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ຂ້າພະເຈົ້າ. ທ້າຍນີ້, ທ່ານ ລັດຖະມົນຕີ ຍັງໝັ້ນໃຈວ່າ ກະຊວງອຸດສາຫະກໍາ ແລະ ການຄ້າ ມີຄວາມຍິນດີເປັນຢ່າງຍິ່ງທີ່ຈະສືບຕໍ່ຮ່ວມເຮັດວຽກກັບທີມງານອົງການ JETRO ເພື່ອສືບຕໍ່ຈັດຕັ້ງປະຕິບັດໂຄງການຕ່າງໆໃຫ້ສໍາເລັດຕາມເປົ້າໝາຍທີ່ໄດ້ວາງໄວ້, ເຊິ່ງສຸມໃສ່ສ້າງຄວາມຫຼາກຫຼາຍທາງດ້ານເສດຖະກິດ ແລະ ຄວາມສາມາດໃນການແຂ່ງຂັນຂອງຂະແໜງການທີ່ບໍ່ແມ່ນຊັບພະຍາກອນທຳມະຊາດ ໃນໄລຍະຟື້ນຟູຜົນກະທົບຂອງ COVID-19.
ພາບໂດຍ: ນັກຂ່າວໜັງສືພິມເສດຖະກິດການຄ້າ
ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
