ຕອນເຊົ້າ ເວລາ 09: 00 ໂມງ ຂອງວັນທີ 09 ມິຖຸນາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Pablo Antonio Rodriguez Vidal, ເອກອັກຄະລັດຖະທູດ ແຫ່ງ ສາທາລະນະລັດ ກູບາ ປະຈຳ ສປປ ລາວ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ Pablo Antonio Rodriguez Vidal, ເອກອັກຄະລັດຖະທູດ ແຫ່ງ ສາທາລະນະລັດ ກູບາ ປະຈໍາ ສປປ ລາວ, ຕີລາຄາສູງຕໍ່ການພົວພັນດ້ານການເມືອງ ຂອງສອງພັກ-ລັດ ລະຫວ່າງ ລາວ-ກູບາ ເພື່ອເຮັດໃຫ້ ສອງປະເທດ ໄດ້ເສີມຂະຫຍາຍການພົວພັນທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການຮ່ວມມືດ້ານເສດຖະ
ກິດ-ການຄ້າ ແລະ ການສຶກສາ-ກິລາ ຂອງລາວ. ນອກນັ້ນຍັງໄດ້ປຶກສາຫາລືກັນໃນດ້ານວິຊາການ ທີ່ການນໍາຂັ້ນສູງຂອງສອງປະເທດໄດ້ເຊັນສັນຍາການຮ່ວມມືແລກປ່ຽນສິນຄ້າແບບທົດແທນໃນເມື່ອກ່ອນ ເປັນຕົ້ນເຂົ້າສານ ແລະ ຢາປົວພະຍາດ ເພື່ອເຮັດໃຫ້ການຈັດຕັ້ງປະຕິບັດໃຫ້ເກີດຜົນເປັນຈິງໃນຕໍ່ໜ້າ ແລະ ສິນຄ້າອື່ນທີ່ເປັນທ່າແຮງຂອງລາວ ແລະ ກູບາ; ໃນນີ້: ທ່ານ Pablo Antonio Rodriguez Vidal, ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະໃຫ້ການຮ່ວມມື ພ້ອມດຽວກັນນີ້ ກໍ່ສະແດງຄວາມຍິນດີທີ່ທ່ານ ລັດຖະມົນຕີ ມາຮັບຕໍາແໜ່ງໜ້າທີ່ໃໝ່ ພ້ອມທັງຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາແກ້ໄຂໃນວຽກງານຕໍ່ໜ້າແກ່ ຂ້າພະເຈົ້າ. ຕອນທ້າຍ, ທ່ານລັດຖະມົນຕີ ກະຊວງ ອຄ ອວຍພອນໄຊ ຕໍ່ທ່ານເອກອັກຄະລັດຖະທູດ ພ້ອມດ້ວຍຄະນະ ແລະ ຄອບຄົວໃນສະຖານທູດ ຈົ່ງມີສຸຂະພາບແຂງແຮງ ແລະ ປະສົບຜົນສໍາເລັດໃນໜ້າທີ່ການງານ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
