ຕອນເຊົ້າ ເວລາ 09: 00 ໂມງ ຂອງວັນທີ 10 ມິຖຸນາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Vladimir KALININ , ເອກອັກຄະລັດຖະທູດ ແຫ່ງ ຣັດເຊຍ ປະຈຳ ສປປ ລາວ ພ້ອມດ້ວຍຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 15 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ Vladimir KALININ , ເອກອັກຄະລັດຖະທູດ ແຫ່ງ ຣັດເຊຍ ປະຈໍາ ສປປ ລາວ, ຕີລາຄາສູງຕໍ່ການພົວພັນຮອບດ້ານ ລະຫວ່າງ ລາວ-ຣັດເຊຍ ເພື່ອເຮັດໃຫ້ ສອງປະເທດ ໄດ້ເສີມຂະຫຍາຍການພົວພັນເສດຖະກິດ-ການຄ້າທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການຮ່ວມມືດ້ານເສດຖະກິດ-ການຄ້າ, ການລົງທຶນ, ປ້ອງກັນຊາດປ້ອງກັນຄວາມສະຫງົບ ແລະ ການສຶກສາ ຂອງລາວ. ນອກນັ້ນຍັງໄດ້ປຶກສາຫາລືກັນໃນດ້ານວິຊາການ ເປັນຕົ້ນການນໍາເຂົ້ານໍ້າມັນຈາກຣັດເຊຍ, ການສະໜອງປຸ໋ຍ ດ້ານຜະລິດກະສິກໍາ(ກາເຟ), ທາດໄຍຫີນ ທີ່ບໍ່ເປັນອັນຕະລາຍຕໍ່ສຸຂະພາບ, ການແລກປ່ຽນບົດຮຽນ ການຜະລິດຫີນແລະ ແກ້ວປະເສີດ, ໂຄງການເຄື່ອງເສດເຫຼືອໃນເຂດອຸດສາຫະກໍາ, ການເກັບກູ້ລະເບີດບໍ່ທັນແຕກໃນລາວ, ການໃຫ້ຄວາມຊ່ວຍເຫຼືອດ້ານອຸປະກອນການທະຫານ ແລະ ວັກຊີນປ້ອງກັນພະຍາດໂຄວິດ 19 ແກ່ສປປ ລາວ, ພ້ອມທັງ ສອງຝ່າຍໄດ້ໃຫ້ຄໍາໝັ້ນຊຶ່ງກັນ ແລະ ກັນ ຈະຜັນຂະຫຍາຍການຮ່ວມມືໃຫ້ເກີດດອກອອກຜົນໃນຕໍ່ໜ້າ; ໃນນີ້: ທ່ານ Vladimir KALININ, ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະຈັດກອງປະຊຸມປຶກສາຫາລື ລະຫວ່າງສະພາອຸດສາຫະກໍາ ແລະ ການຄ້າ ລາວ-ຣັດເຊຍ ແບບທາງໄກ ເພື່່ອເຮັດໃຫ້ທຸລະກິດຂອງສອງປະເທດ ໄດ້ປຶກສາຫາລື ການຊອກຄູ່ຮ່ວມມືດ້ວຍກັນ ພ້ອມດຽວກັນນີ້ ກໍ່ສະແດງຄວາມຍິນດີທີ່ທ່ານ ລັດຖະມົນຕີ ມາຮັບຕໍາແໜ່ງໜ້າທີ່ໃໝ່ ພ້ອມທັງຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄຳປຶກສາໃນວຽກງານຕໍ່ໜ້າແກ່ ຂ້າພະເຈົ້າ. ຕອນທ້າຍ, ທ່ານລັດຖະມົນຕີ ກະຊວງ ອຄ ສະແດງຄວາມຂອບໃຈ ຕໍ່ທ່ານເອກອັກຄະລັດຖະທູດ ພ້ອມດ້ວຍຄະນະ ທີ່ໄດ້ເສຍສະຫຼະເວລາໃນການພົບປະຄັ້ງນີ້.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
