ຕອນບ່າຍ ເວລາ 14:00 ໂມງ ຂອງວັນທີ 14 ມິຖຸນາ 2021 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ, ໄດ້ຈັດພິທີປະກາດ ການຈັດຕັ້ງຂັ້ນຫົວໜ້າກົມ ແລະ ຮອງຫົວໜ້າກົມອອກພັກການ-ຮັບອຸດໜູນບໍານານ, ການແຕ່ງຕັ້ງຫົວໜ້າກົມ ແລະ ຮອງຫົວໜ້າກົມຄົນໃໝ່ ໂດຍການເປັນປະທານ ຂອງ ທ່ານ ປອ. ຄໍາແພງ ໄຊສົມແພງ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ມີຜູ້ເຂົ້າຮ່ວມເປັນສັກຂີພິຍານເປັນຕົ້ນ ທ່ານຮອງລັດຖະມົນຕີ, ເລຂາ- ຮອງເລຂາໜ່ວຍພັກບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ, ເລຂາຄະນະພັກຮາກຖານ, ເລຂາໜ່ວຍພັກ, ຜູ້ອໍານວຍການລັດວິສາຫະກິດ-ບໍລິສັດ, ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ຫົວໜ້າກົມ, ຮອງຫົວໜ້າກົມທີ່ຖືກແຕ່ງຕັ້ງໃໝ່ ຈໍານວນ 50 ທ່ານ ຍິງ 12 ທ່ານ.
ໂອກາດນີ້ ທ່ານ ນາງ ຈັນສຸກ ແສງພະຈັນ ຄະນະບໍລິຫານງານພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ກະຊວງອຸດສາຫະກໍາ ແລະ ການຄ້າ ຂຶ້ນອ່ານຜ່ານ ດຳລັດ ຂອງນາຍົກລັດຖະມົນຕີ ວ່າດ້ວຍການອະນຸມັດ ໃຫ້ພະນັກງານອອກພັກການ-ຮັບອຸດໜູນບໍານານ ແລະ ຂໍ້ຕົກລົງລັດຖະມົນຕີ ຊຶ່ງຂັ້ນເທິງໄດ້ຕົກລົງໃຫ້ 06 ທ່ານ ພະນັກງານຂັ້ນກົມ-ຮອງກົມ, ຫົວໜ້າສະຖາບັນ ດັ່ງນີ້:
1. ທ່ານ ສີລິສໍາພັນ ວໍຣະຈິດ ຄະນະພັກກະຊວງ, ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ
2. ທ່ານ ນາງ ບານສະຕິ ເທບພະວົງ ຫົວໜ້າຫ້ອງການ
3. ທ່ານ ສຸລິຍົນ ພິລາວົງ ຫົວໜ້າກົມການນໍາເຂົ້າ ແລະ ສົ່ງອອກ
4. ທ່ານ ນາງ ຈຽງຄໍາ ທອງປະເສີດ ຮອງຫົວໜ້າກົມທະບຽນ ແລະ ຄຸ້ມຄອງວິສາຫະກິດ
5. ທ່ານ ປອ ນາງ ພວງພະກາ ອຸດົມ ຮອງຫົວໜ້າກົມການຄ້າພາຍໃນ
6. ທ່ານ ບຸນຖອງ ໂສພາວັນດີ ຮອງຫົວໜ້າຫ້ອງການກະຊວງ.
ແລະ ປະກາດການແຕ່ງຕັ້ງພະນັກງານຂັ້ນຫົວໜ້າກົມ ໃໝ່ດັ່ງນີ້:
- ທ່ານ ອະພິຊິດ ແສງສຸລິວົງ ຫົວໜ້າກົມທະບຽນ ແລະ ຄຸ້ມຄອງວິສາຫະກິດ
- ທ່ານ ນາງ ມະນີວອນ ວົງໄຊ ຫົວໜ້າກົມການນໍາເຂົ້າ ແລະ ສົ່ງອອກ
- ທ່ານ ນາງ ກິ່ງສະດອນ ເພັດດາວເຮືອງ ເປັນຮັກສາການແທນຫົວໜ້າຫ້ອງການກະຊວງ
- ທ່ານ ປອ ແກ້ວມໍລະກົດ ສິດລາກອນ ເປັນຮັກສາການແທນຫົວໜ້າສະຖາບັນເສດຖະກິດອຸດສາຫະກໍາ ແລະ ການຄ້າ
ປະກາດຂໍ້ຕົກລົງ ລັດຖະມົນຕີ ກະຊວງ ອຄ ເລກທີ 0386/ອກ.ກຈພງ ລົງວັນທີ 25 ພຶດສະພາ 2021 ວ່າດ້ວຍການແຕ່ງຕັ້ງຮອງຫົວໜ້າຫ້ອງການກະຊວງ ແລະ ຮອງຫົວໜ້າກົມ ເພື່ອທົດແທນຕໍາແໜ່ງທີ່ວ່າງດັ່ງນີ້:
1. ທ່ານ ນາງ ສິມາລາ ແກ້ວສະກຸນວຽງ ຫົວໜ້າພະແນກບໍລິຫານ ຫ້ອງການກະຊວງ ຂຶ້ນເປັນຮອງຫົວໜ້າຫ້ອງການ
2. ທ່ານ ດາວເພັດ ເມືອງໂພນທອງ ຫົວໜ້າພະແນກພັກ ແລະ ປ້ອງກັນພັກ – ພະນັກງານ, ກົມຈັດຕັ້ງ ແລະ ພະນັກງານຂຶ້ນເປັນ ຮອງຫົວໜ້າກົມຈັດຕັ້ງ ແລະ ພະນັກງານ
3. ທ່ານ ບຸນຈັນ ລໍວັນໄຊ ຫົວໜ້າພະແນກສັງລວມ, ກົມການຄ້າພາຍໃນ ຂຶ້ນເປັນຮອງຫົວໜ້າກົມການຄ້າພາຍໃນ
4. ທ່ານ ນາງ ວິໄລພອນ ຊິນດາວົງ ຫົວຫນ້າພະແນກການຄ້າຫຼາຍຝ່າຍ ກົມນະໂຍບາຍການຄ້າຕ່າງປະເທດ ຂຶ້ນເປັນຮອງຫົວໜ້າກົມນະໂຍບາຍການຄ້າຕ່າງປະເທດ
5. ທ່ານ ອິດທິລິດ ຍັງນຸວົງ ຫົວໜ້າພະແນກການຄ້າດ້ານສິນຄ້າ ກົມນະໂຍບາຍການຄ້າຕ່າງປະເທດ ຂຶ້ນເປັນຮອງກົມນະໂຍບາຍການຄ້າຕ່າງປະເທດ.
ພ້ອມນັ້ນ ທ່ານ ລັດຖະມົນຕີກະຊວງ ອຄ ອອກຂໍ້ຕົກລົງ ເລກທີ 0394 /ອຄ. ກຈພງ ລົງວັນທີ 27 ພຶດສະພາ 2021 ສັບຊ້ອນພະນັກງານທີ່ມາຈາກກະຊວງ ວິທະຍາສາດ ແລະ ເຕັກໂນໂລຊີ ຂັ້ນກົມຄື:
1. ທ່ານ ປອ ຄໍາເພັດ ວົງດາລາ ຫົວໜ້າກົມເປັນຜູ້ຊ່ວຍວຽກການນໍາກະຊວງ
2. ທ່ານ ສົມພາດ ໂພທິສັກ ເປັນຮອງຫົວໜ້າກົມກວດກາ
3. ທ່ານ ຈິດຕະພົງ ອັກຄະວົງ ເປັນຮອງຫົວໜ້າກົມແຜນການ ແລະ ການຮ່ວມມື
ຕອນທ້າຍ ທ່ານປອ. ຄໍາແພງ ໄຊສົມແພງ ລັດຖະມົນຕີກະຊວງ ອຄ ໄດ້ໃຫ້ການໂອ້ລົມຕໍ່ພິທີດັ່ງກ່າວວ່າ: ການແຕ່ງຕັ້ງ, ການສັບຊ້ອນ, ປ່ຽນແທນ ແລະ ອອກຮັບອຸດໜູນບຳນານຂອງພະນັກງານ-ລັດຖະກອນ ເປັນການປະຕິບັດ ຢ່າງເປັນປົກກະຕິຂອງ ການຈັດຕັ້ງໃນທົ່ວລະບົບການເມືອງ ຂອງພວກເຮົາ, ເພື່ອແນໃສ່ປະຕິບັດກົດໝາຍວ່າດ້ວຍພະນັກງານ-ລັດຖະກອນ ແລະ ມະຕິ, ຄໍາສັ່ງຕ່າງໆ ຂອງວຽກງານພະນັກງານ.
ຢ່າງໃດກໍຕາມ, ພາຍໃຕ້ສະພາບການໃໝ່ ທີ່ມີທັງຄວາມຫຍຸ້ງຍາກສັບສົນ ແລະ ສິ່ງທ້າທາຍ ຂ້າພະເຈົ້າ ຮຽກຮ້ອງໃຫ້ບັນດາກົມ, ຫ້ອງການກະຊວງ ແລະ ສະຖາບັນ ເອົາໃຈໃສ່ແຕ່ລະວຽກງານ ດັ່ງນີ້: ການນຳພາໃນຂົງເຂດການເມືອງແນວຄິດ, ການຈັດຕັ້ງພະນັກງານ ແລະ ແບບແຜນວິທີເຮັດວຽກ ໃຫ້ເອົາໃຈໃສ່ສຶກສາອົບຮົມ ພະນັກງານລັດຖະກອນໃຫ້ມີຄວາມເຂົ້າໃຈ ກຳແໜ້ນແນວທາງນະໂຍບາຍຂອງພັກ, ເອົາໃຈໃສ່ການຈັດຕັ້ງເຊື່ອມຊຶມ ບັນດາເອກະສານ, ມະຕິ, ຄໍາສັ່ງ ແນວທາງນະໂຍ ບາຍຂອງພັກ, ສືບຕໍ່ເພີ່ມທະວີການກໍ່ສ້າງ ແລະ ປັບປຸງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ, ສືບຕໍ່ຊ່ວຍການປັບປຸງຄືນພາລະບົດບາດຂອງກະຊວງ ກໍຄືຂອງກົມກອງ ແລະ ບັນດາພະແນກຂອງຕົນ ໂດຍສົມທົບກັບກົມຈັດຕັ້ງ ແລະ ພະນັກງານ ເພື່ອຮັບປະກັນໃຫ້ກົງຈັກກະທັດຮັດ ມີປະສິດທິພາບ ສອດຄ່ອງກັບຄວາມຮຽກຮ້ອງຕ້ອງການຂອງໜ້າວຽກຕົວຈິງ ຫຼີກເວັ້ນການທັບຊ້ອນໜ້າວຽກລະຫວ່າງກັນ.
ແຫຼ່ງຂ່າວ: ໜັງສືພິມເສດຖະກິດ-ການຄ້າ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
