ຕອນເຊົ້າ ເວລາ 09: 00 ໂມງ ຂອງວັນທີ 17 ມິຖຸນາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Orhan ISIK (ໂອຼຮັນ ເອີເຊີກ) , ເອກອັກຄະລັດຖະທູດ ແຫ່ງ ຕວັກກີ ປະຈຳ ສປປລາວ ພ້ອມດ້ວຍຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 15 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ Orhan ISIK (ໂອຼຮັນ ເອີເຊີກ), ເອກອັກຄະລັດຖະທູດ ຕວັກກີ ປະຈໍາ ສປປ ລາວ ຊຶ່ງການພົວພັນ ລະຫວ່າງ ລາວ-ຕວັກກີ ໄລຍະຜ່ານມາເຮັດໃຫ້ ສອງປະເທດ ໄດ້ເສີມຂະຫຍາຍການພົວພັນເສດຖະກິດ-ການຄ້າທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລືທົບທວນຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການຮ່ວມມືດ້ານເສດຖະກິດ-ການຄ້າ, ການລົງທຶນ ຂອງລາວ. ພ້ອມທັງ ໄດ້ສະເໜີການພົວພັນການຄ້າສອງຝ່າຍໄລຍະຜ່ານມາ ເປັນຕົ້ນການນໍາເຂົ້າ-ສົ່ງອອກສິນຄ້າ ໃນນີ້ ສິນຄ້າລາວສົ່ງອອກໄປຕວັກກີມີ ເສັ້ນໄຍສັງເຄາະ, ເກືອ, ມາດ, ດິນ, ພລາສະເຕີ, ປູນຂາວ, ເຄື່ອງໄຟຟ້າ ແລະ ອຸປະກອນເຄື່ອງໃຊ້ໄຟຟ້າ, ຢາງພາລາ, ຢາງ ແລະ ເຄື່ອງໃຊ້ທີ່ເຮັດດ້ວຍຢາງ, ພລາສະຕິກ ແລະ ເຄື່ອງໃຊ້ທີ່ເຮັດດ້ວຍພລາສະຕິກ, ເຄື່ອງນຸ່ງຫົ່ມ ແລະ ອື່ນໆ; ສິນຄ້ານໍາເຂົ້າມີ ພາຫະນະທາງບົກ ນອກຈາກລົດໄຖນາ ແລະ ລົດຈັກ, ແຮ່, ຂີ້ໂລຫະ ແລະ ຂີ້ເຖົ່າອື່ນໆ, ເສັ້ນໄຍສັງເຄາະ, ຝ້າຍ ແລະ ຜະລິດຕະພັນຈາກຝ້າຍ, ເຄື່ອງໄຟຟ້າ ແລະ ອຸປະກອນເຄື່ອງໃຊ້ໄຟຟ້າ ແລະ ອື່ນໆ, ນອກນັ້ນ ຍັງປຶກສາຫາລືແຜນການຮ່ວມມືຊຶ່ງກັນ ແລະ ກັນຕໍ່ໜ້າ ເປັນຕົ້ນ ການເພີ່ມປະລິມານສິນຄ້ານໍາເຂົ້າ-ສົ່ງອອກ ຂອງສອງປະເທດໃຫ້ຫຼາຍຂຶ້ນ; ການຮ່ວມມືດ້ານອຸດສາຫະກໍາປຸງແຕ່ງ; ການລະດົມນັກລົງທຶນຂອງຕວັກກີ ມາສ້າງເຂດເສດຖະກິດອຸດສາຫະກໍາ, ເຂດເສດຖະກິດສະເພາະ ແລະ ເຂດເສດຖະກິດເສລີໃນລາວ; ບົດຮຽນດ້ານການທະຫານຂອງຕວັກກີ ທີ່ມີການຜະລິດເທັກໂນໂລຊີທັນສະໄໝ ຮ່ວມມືກັບປະເທດຣັດເຊຍ; ຂໍ້ສະດວກຂອງລາວ ທີ່ເປັນປະເທດ
Landlink ມີທາງຍົນ, ທາງລົດຂົນສົ່ງ, ທາງລົດໄຟລາວ-ຈີນທີ່ຈະເປີດໃນອະນາຄົດ ກັບບັນດາປະເທດພາກພື້ນ ໃນການຮ່ວມມືດ້ານການຄ້າ ແລະ ທ່ອງທ່ຽວ; ການຮ່າງ MOU ຂອງສະພາການຄ້າ ແລະ ອຸດສາຫະກໍາແຫ່ງຊາດ ກັບ ສະຫະພາບສະພາການຄ້າ ແລະ ແລກປ່ຽນສິນຄ້າຂອງ ຕວັກກີ ທີ່ກໍາລັງຮ່າງຄໍາເຫັນເພື່ອສົ່ງໃຫ້ກະຊວງການຕ່າງປະເທດຮັບຮູ້ ແລ້ວຈຶ່ງຈະດໍາເນີນການໃນຂັ້ນຕອນຕໍ່ໄປ; ແລະ ການແລກປ່ຽນບົດຮຽນ-ຂໍ້ມູນຂ່າວສານຊຶ່ງກັນ ແລະ ກັນ; ໃນນີ້: ທ່ານ Orhan ISIK (ໂອຼຮັນ ເອີເຊີກ), ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະຈັດກອງປະຊຸມປຶກສາຫາລື ລະຫວ່າງສະພາອຸດສາຫະກໍາ ແລະ ການຄ້າແຫ່ງຊາດ ລາວ ແລະ ສະຫະພາບສະພາການຄ້າ ແລະ ແລກປ່ຽນສິນຄ້າຕວັກກີ ແບບທາງໄກ ເພື່່ອເຮັດໃຫ້ທຸລະກິດຂອງສອງປະເທດໄດ້ປຶກສາຫາລື ການຊອກຄູ່ຮ່ວມມືດ້ວຍກັນ ພ້ອມດຽວກັນນີ້ ກໍ່ສະແດງຄວາມຍິນດີທີ່ທ່ານ ລັດຖະມົນຕີມາຮັບຕໍາແໜ່ງໜ້າທີ່ໃໝ່ ພ້ອມທັງຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາໃນວຽກງານຕໍ່ໜ້າແກ່ ຂ້າພະເຈົ້າ.
ຕອນທ້າຍ, ທ່ານລັດຖະມົນຕີ ກະຊວງ ອຄ ສະແດງຄວາມຂອບໃຈ ຕໍ່ທ່ານເອກອັກຄະລັດຖະທູດທີ່ໄດ້ໃຫ້ຄໍາຄິດເຫັນທີ່ຈົບງາມ ແລະ ພ້ອມດ້ວຍຄະນະ ທີ່ໄດ້ເສຍສະຫຼະເວລາໃນການພົບປະຄັ້ງນີ້.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
