ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຮ່ວມກັບ ພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດໄດ້ຈັດສຳມະນາການສ້າງການຮ່ວມກຸ່ມທຸລະກິດລ້ຽງໝູພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄ້ຳປະ ກັນສະບຽງອາຫານ ໃນລະຫວ່າງວັນທີ 5-9 ກໍລະກົດ 2021 ທີ່ແຂວງສະຫວັນນະເຂດ ໂດຍການເປັນປະທານຮ່ວມໂດຍ ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ທ່ານ ໂພສີສ້ອຍ ກຸທິລາດ ຫົວໜ້າພະແນກອຸດສາຫະກໍາ ແລະ ການຄ້າ ແຂວງສະຫວັນນະເຂດ ຊຶ່ງມີຜູ້ເຂົ້າຮ່ວມພິທີເປີດ ຕາງໜ້າຈາກພາກລັດ: ພະແນກອຸດສາຫະກຳ ແລະ ການຄ້າ ແຂວງ, ພະແນກກະສິກໍາ ແລະ ປ່າໄມ້ແຂວງ; ຕາງໜ້າພາກທຸລະກິດ: ສະພາການຄ້າ ແລະ ອຸດສາຫະກໍາແຂວງ, ຜູ້ປະກອບກິດຈະການໂຮງງານຂ້າສັດ, ຜູ້ປະກອບກິດຈະການນໍາເຂົ້າສັດ ແລະ ຊີ້ນສັດ, ຜູ້ປະກອບກິດຈະການຂາຍອາຫານສັດ, ຜູ້ປະກອບກິດຈະການຟາມລ້ຽງໝູ, ຜູ້ຊື້ຂາຍຊີ້ນໝູ ຈາກນະຄອນໄກສອນ ແລະ ເມືອງໃກ້ຄຽງ ແລະ ມີຜູ້ບັນຍາຍຈາກພາກສ່ວນຕ່າງໆຈາກສູນກາງ ແລະ ທ້ອງຖິ່ນ ລວມທັງໝົດ 40 ທ່ານ.
ຈຸດປະສົງ ເພື່ອສົ່ງເສີມການຮ່ວມກຸ່ມທຸລະກິດລ້ຽງໝູ ທີ່ນະຄອນໄກສອນ ແຂວງສະຫວັນນະເຂດ ໃຫ້ສາມາດຮ່ວມມືກັນໃນການຜະລິດເປັນຕອ່ງໂສ້ ແລະ ສ້າງມູນຄ່າເພີ່ມ ສາມາດຕອບສະໜອງຄວາມຕ້ອງການຂອງຕະຫຼາດພາຍໃນ ຫຼັງຈາກນີ້ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຍັງມີແຜນຈະຈັດຝຶກອົບຮົມສ້າງຄວາມເຂັ້ມແຂງໃນການສົ່ງເສີມທຸລະກິດລ້ຽງໝູໃຫ້ແກ່ ພາກທຸລະກິດຂອງແຂວງ ໃນເດືອນ ກໍລະກົດ 2021 ຕື່ມອີກ. ໃນຊຸດສຳມະນາແມ່ນຈະໄດ້ປຶກສາຫາລື ເຖິງບັນຫາກ່ຽວຂ້ອງກັບທຸລະກິດທີ່ປິ່ນອ້ອມການລ້ຽງໝູ, ການແປຮູບ, ການສະໜອງປັດໄຈການລ້ຽງໝູລວມທັງຕະຫຼາດຈຳໜ່າຍຊີ້ນໝູ. ນອກນັ້ນຈະໄດ້ຮັບຟັງການນຳສະເໜີຈາກພາກສ່ວນ ທີ່ກ່ຽວຂ້ອງ ຈາກຕາງໜ້າບັນດາກົມໃນກະຊວງອຸດສາຫະກຳ ແລະ ການຄ້າ, ກະຊວງກະສິກໍາ ແລະ ປ່າໄມ້, ພະແນກອຸດສາຫະກໍາ ແລະ ການຄ້າ ແຂວງສະຫວັນນະເຂດ.
ກົມການຄ້າພາຍໃນ, ກົມສົ່ງເສີມການຄ້າ, ກົມອຸດສາຫະກຳ ແລະ ຫັດຖະກຳ, ກົມລ້ຽງສັດ ແລະ ການປະມົງ ໂດຍສະເພາະແມ່ນນະໂຍບາຍສົ່ງເສີມ ແລະ ການຄຸ້ມຄອງທຸລະກິດດັ່ງກ່າວນອກນັ້ນ, ຈະໄດ້ຮັບຟັງການນຳສະເໜີເຖິງບັນຫາ ແລະ ອຸປະສັກ ກ່ຽວຂ້ອງກັບທຸລະກິດນີ້ຈາກຜູ້ຕາງໜ້າຈາກສະພາການ ຄ້າ ແລະ ອຸດສາຫະກຳແຂວງ ແລະ ການນຳສະ
ເໜີບົດຮຽນ ແລະ ປະສົບການລ້ຽງໝູຈາກຕົວແທນທຸລະກິດ.
ແຫຼງຂ່າວ-ພາບ: ໄດ້ມາຈາກກົມ SME ກະຊວງ ອຄ.
ຮຽບຮຽງໂດຍ: ໄພຄຳອີ ວິໄລຄຳ ສູນສະຖິຕິ ແລະ ຂໍ້ມູນຂ່າວສານ
