ຕອນເຊົ້າເວລາ 10: 00 ໂມງ ຂອງວັນທີ 05 ກໍລະກົດ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ປີເຕີ ຟອດຈ໌, ທູດກິຕິມະສັກ ປະເທດສະວິດເດັນ ປະຈຳ ສປປລາວ ທັງເປັນປະທານສະພາການຄ້າ ເອີຣົບ ແລະ ຜູ້ອໍານວຍການບໍລິດສັດ ສະໂຕຣາແອັນໂສລາວ ຈໍາກັດ ພ້ອມດ້ວຍຄະນະ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ທ່ານ.
ໂອກາດນີ້ ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ປີເຕີ ຟອດຈ໌ ທີ່ມີການຄວບ 3 ຕໍາແໜ່ງ ຊຶ່ງຈະເປັນການເສີມຂະຫຍາຍການພົວພັນການຄ້າ ລະຫວ່າງ ລາວ-ສະວິດເດັນ ໃຫ້ນັບມື້ນັບດີຂຶ້ນ, ພ້ອມດຽວກັນນີ້ ທ່ານປີເຕີ ຟອດຈ໌ ໄດ້ສະເໜີລາຍງານການເຄື່ອນໄຫວຂອງບໍລິສັດໄລຍະຜ່ານມາ ເປັນຕົ້ນການດໍາເນີນກິດຈະການປູກໄມ້ຢູ່ບັນດາແຂວງພາກກາງ ແລະ ພາກໃຕ້ພ້ອມທັງເຮັດໜ້າທີ່ເກັບກູ້ລະເບີດທີ່ຍັງບໍ່ທັນແຕກໄປພ້ອມ. ປະຈຸບັນມີເນື້ອທີ່ປູກໄມ້ແລ້ວ 3.200 ກວ່າເຮັກຕານັບທັງເນື້ອທີ່ສໍາປະທານຈາກລັດ; ໄລຍະຜ່ານມາເຖິງແມ່ນຈະພົບອຸປະສັກແຕ່ກໍ່ເປັນເລື່ອງປົກກະຕິຂອງການດໍາເນີນທຸລະກິດ ແຕ່ດ້ວຍເຫັນວ່າການພັດທະນາກະສິກໍາປ່າໄມ້ ແມ່ນສອດຄ່ອງກັບແນວທາງນະໂຍບາຍຂອງພັກ ແລະ ລັດ ທັງສອດຄ່ອງກັບຍຸກສະໄໝຂອງໂລກດ້ານສິ່ງແວດລ້ອມ. ສະນັ້ນ, ທາງບໍລິສັດຈຶ່ງໄດ້ມີການປັບປຸງຖານະນິຕິບຸກຄົນ ເພື່ອເພີ່ມການລົງທຶນໃສ່ດ້ານກະສິກໍາປ່າໄມ້ ໂດຍມີຄູ່ຮ່ວມພັດທະນາໃໝ່ເປັນບໍລິສັດລະດັບໂລກ ຊຶ່ງມີສໍານັກງານຕັ້ງຢູ່ປະເທດສະວິດເດັນ ແລະ ໂຮນແລນ ຊຶ່ງມີຄວາມສົນໃຈລົງທຶນດ້ານກະສິກໍາປ່າໄມ້ ດ້ານເຊື້ອໄຟຊີວະພາບ, ດ້ານການເກັບກັກອາຍທາດຄາບອນ, ພະລັງງານດ້ວຍລົມ ແລະ ໂຮງກັ່ນນໍ້າມັນຊີວະພາບ ທີ່ສອດຄ່ອງກັບຍຸດທະສາດເຕີບໂຕສີຂຽວຂອງລາວ. ນອກນັ້ນ ຍັງປຶກສາຫາລືແຜນການຮ່ວມມືຊຶ່ງກັນ ແລະ ກັນຕໍ່ໜ້າ ເປັນຕົ້ນ ການຮ່ວມມືດ້ານອຸດສາຫະກໍາປຸງແຕ່ງໄມ້; ການລົງທຶນເພີ່ມຂອງບໍລິສັດ; ການແລກປ່ຽນຂໍ້ມູນຂ່າວສານ ຊຶ່ງປະຈຸບັນການຄ້າແບບອອນລາຍແມ່ນມີການຂະຫຍາຍຕົວເພີ່ມຂຶ້ນ ການພົວພັນຊື້-ຂາຍຜະລິດຕະພັນສິນຄ້າແມ່ນສາມາດແລກປ່ຽນຂໍ້ມູນ ແລະ ຊື້-ຂາຍຮ່ວມກັນ ຖືວ່າເປັນຕະຫຼາດຊື້-ຂາຍໃນລະດັບສາກົນ; ໃນນີ້: ທ່ານ ປີເຕີ້ ຟອດຈ໌ ໄດ້ສະເໜີໃນຕໍ່ໜ້າ ຂໍການຮ່ວມມືໃນການອໍານວຍຄວາມສະດວກວຽກງານການຈົດທະບຽນການລົງທຶນ ເພື່ອເພີ່ມທຶນໃສ່ການປູກໄມ້ ເພື່ອປຸງແຕ່ງເປັນສິນຄ້າອຸດສາຫະກໍາ ທັງຊົມໃຊ້ພາຍໃນ ແລະ ສົ່ງອອກໄປຕ່າງປະເທດ, ພ້ອມທັງຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບເປັນຢ່າງດີ ແລະ ໃຫ້ຄຳປຶກສາໃນວຽກງານຕໍ່ໜ້າແກ່ ຂ້າພະເຈົ້າ.
ຕອນທ້າຍ, ທ່ານລັດຖະມົນຕີ ກະຊວງ ອຄ ສະແດງຄວາມຂອບໃຈ ຕໍ່ທ່ານທູດກິຕິມະສັກ ທີ່ໄດ້ໃຫ້ຄໍາຄິດເຫັນທີ່ຈົບງາມ ແລະ ໃຫ້ຮັກສາການຕິດຕໍ່ພົວພັນ ຊຶ່ງກັນ ແລະ ກັນ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
