ທ່ານ ປອ ຄໍາແພງ ໄຊສົມແພງ ລັດຖະມົນຕີ ກະຊວງ ອຸດສາຫະກຳ ແລະ ການຄ້າ(ອຄ) ພ້ອມດ້ວຍຄະນະ ໄດ້ຕ້ອນຮັບ ຄະນະຜູ້ແທນ ສສ ຫວຽດນາມ ນຳໂດຍ ທ່ານ ຫງວຽນ ຫົງ ຢຽນ ລັດຖະມົນຕີ ກະຊວງອຸດສາຫະກຳ ແລະ ການຄ້າ ສສ ຫວຽດນາມ ໃນວັນທີ 9 ສິງຫາ 2021 ທີ່ກະຊວງອຸດສາຫະກຳ ແລະ ການຄ້າ ໃນໂອກາດ ທ່ານ ຫງວຽນ ຫົງ ຢຽນ ພ້ອມຄະນະເດີນ ທາງມາຢ້ຽມຢາມ ແລະ ເຮັດວຽກຢູ່ ສ ປປ ລາວ ໃນລະຫວ່າງວັນ ທີ 9-10 ສິງຫາ 2021 ນີ້.
ໃນໂອກາດດັ່ງກ່າວ ທ່ານ ປອ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ ທ່ານ ຫງວຽນ ຫົງ ຢຽນ ພ້ອມຄະນະທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ເຊິ່ງເປັນມິດໝາຍສຳຄັນເຂົ້າໃນການປະກອບສ່ວນເສີມສ້າງ ສາຍພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ລະຫວ່າງລາວ-ຫວຽດນາມ ເວົ້າລວມເວົ້າ, ສະເພາະກໍຄືສອງກະຊວງ ອຸດສາຫະກຳ ແລະ ການຄ້າ ລາວ-ຫວຽດນາມ ທີ່ມີມາແຕ່ດົນນານແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ.
ການພົບປະຄັ້ງນີ້ ຍັງໄດ້ສົນທະນາກ່ຽວກັບວຽກງານການຮ່ວມມືກັນໃນຕໍ່ໜ້າ ໂດຍສະເພາະການຈັດຕັ້ງປະຕິບັດບັນດາສັນຍາຂອງສອງກະຊວງທີ່ໄດ້ລົງນາມຮ່ວມກັນ ກໍຄືການສຸມໃສ່ເພື່ອເຮັດແນວໃດໃຫ້ສອງປະເທດພວກເຮົາສາມາດບັນລຸເປົ້າໝາຍມູນຄ່າການຄ້າທີ່ວາງໄວ້ ກໍຄືໃຫ້ເພີ່ມຂຶ້ນ 10% ຕໍ່ປີ ຫຼື ເພີ່ມຂຶ້ນປະມານ 93 ລ້ານໂດລາຕໍ່ປີ ເຊິ່ງເຫັນວ່າມີຫຼາຍບັນຫາທີ່ຈະຕ້ອງໄດ້ມີການເຮັດວຽກຮ່ວມກັນ ລະຫວ່າງບັນດາກົມວິຊາການຂອງສອງຝ່າຍ ເພື່ອໃຫ້ບັນລຸເປົ້າໝາຍທີ່ວາງໄວ້.
ພ້ອມນັ້ນ, ທ່ານລັດຖະມົນຕີກະຊວງ ອຄ ຍັງໄດ້ອວຍພອນໃຫ້ຄະນະຜູ້ແທນ ສສ ຫວຽດນາມ ຈົ່ງປະສົບຜົນສຳເລັດໃນການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ອີກດ້ວຍ.
ໂອກາດດັ່ງກ່າວ, ທ່ານ ຫງວຽນ ຫົງ ຢຽນ ກໍໄດ້ສະແດງຄວາມຂອບໃຈຕໍ່ ທ່ານ ລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມນີ້ໄດ້ລາຍງານ ຈຸດປະສົງໃນການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ໃຫ້ທ່ານໄດ້ຮັບຊາບຕື່ມອີກ.
ແຫລ່ງຂ່າວ: ນັກຂ່າວໜັງສືພິມເສດຖະກິດການຄ້າ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
