ຕອນບ່າຍ ເວລາ 14:00 ໂມງ ຂອງວັນທີ 29 ຕຸລາ 2021 ຜ່ານມາ ທີ່ຫ້ອງປະ​ຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ, ໄດ້​ຈັດ​ພິທີປະ​ກາດ​ ການຈັດຕັ້ງຂັ້ນຮອງລັດຖະມົນຕີ ​ແລະ ຮັກສາການແທນຫົວໜ້າ​ກົມ​ຄົນ​ໃໝ່ ໂດຍການເປັນ​ປະ​ທານ ​ຂອງ ທ່ານ ປອ. ຄໍາ​ແພງ ​ໄຊ​ສົມ​ແພງ, ກໍາມະການສູນກາງພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ​ແລະ ມີ​ຜູ້​ເຂົ້າ​ຮ່ວມ​ ຄື: ທ່ານຮອງ​ລັດ​ຖະມົນ​ຕີ, ​ເລຂາ, ຮອງເລຂາໜ່ວຍ​ພັກ​ ພ້ອມດ້ວຍພະນັກງານຫຼັກແຫຼ່ງ ທີ່ຂຶ້ນກັບອົງຄະນະພັກກະຊວງອຸດສາຫະກຳ ແລະ ການຄ້າ ປະມານ 35 ທ່ານ.

        ໂອກາດນີ້ ທ່ານ ສີອຳພອນ ຈັນລາຕີ  ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ຂຶ້ນ​ອ່ານຜ່ານ ດຳ​ລັດ​ ຂອງນາ​ຍົກ​ລັດ​ຖະ​ມົນ​ຕີ ວ່າດ້ວຍການແຕ່ງຕັ້ງຮອງລັດຖະມົນຕີ ກະຊວງ ອຄ ເລກທີິ 615 ແລະ 616/ນຍ ລົງວັນທີ 21 ຕຸລາ 2021 ຈໍານວນ 02 ທ່ານ ຄື:

      1.  ທ່ານ ນາງ ຈັນສຸກ ແສງພະຈັນ ຫົວໜ້າກົມຈັດຕັ້ງ ແລະ ພະນັກງານ ຂຶ້ນເປັນຮອງລັດຖະມົນຕີ ກະຊວງ ອຄ

      2. ທ່ານ ບຸນເຖິງ ດວງສະຫວັນ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຂຶ້ນເປັນຮອງລັດຖະມົນຕີ. 

        ນອກຈາກນີ້, ທ່ານ ນາງ ສົມໝາຍ ພົມມຸນິວົງ ຮອງຫົວ​ໜ້າ​ກົມ​ຈັດ​ຕັ້ງ ແລະ ພະ​ນັກ​ງານ ກະຊວງອຸດສາຫະກໍາ ແລະ ການຄ້າ  ຂຶ້ນອ່ານຜ່ານຂໍ້​ຕົກລົງ​ລັດຖະມົນຕີ ວ່າດ້ວຍການແຕ່ງຕັ້ງຮັກສາການແທນຫົວໜ້າກົມ ດັ່ງ​ນີ້:

          1.   ທ່ານ ວັນໄຊ ແກ້ວຄໍາພັນ ຮອງຫົວໜ້າກົມຈັດຕັ້ງ ແລະ ພະນັກງານ ຂຶ້ນເປັນຮັກສາການແທນຫົວໜ້າກົມຈັດຕັ້ງ ແລະ ພະນັກງານ.

         2.   ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ຂຶ້ນເປັນຮັກສາການແທນຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ.

​     ຕອນ​ທ້າຍ ທ່ານ ປ​ອ. ຄໍາແພງ ໄຊສົມແພງ ກໍາມະການສູນກາງພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ​ໄດ້​ໃຫ້ກຽດ​ໂອ້​ລົມຕໍ່ພິທີດັ່ງກ່າວ ດັ່ງມີເນື້ອໃນບາງຕອນວ່າ: ການແຕ່ງຕັ້ງ, ການສັບຊ້ອນ, ປ່ຽນແທນ ຂອງພະນັກງານ-ລັດຖະກອນ ເປັນການປະຕິບັດ ຢ່າງເປັນປົກກະຕິຂອງການຈັດຕັ້ງໃນທົ່ວລະບົບການເມືອງ ຂອງພວກເຮົາ, ເພື່ອແນໃສ່ປະຕິບັດກົດໝາຍວ່າດ້ວຍພະນັກງານ-ລັດຖະກອນ ແລະ ມະຕິ, ຄໍາສັ່ງຕ່າງໆ ຂອງວຽກງານພະນັກງານ.

    ຢ່າງໃດກໍຕາມ, ພາຍໃຕ້ສະພາບການໃໝ່ ທີ່ມີທັງຄວາມຫຍຸ້ງຍາກສັບສົນ ແລະ ສິ່ງທ້າທາຍ ຂ້າພະເຈົ້າ ຮຽກຮ້ອງໃຫ້ບັນດາກົມ, ຫ້ອງການກະຊວງ ແລະ ສະຖາບັນອຸດສາຫະກໍາ ແລະ ການຄ້າ ເອົາໃຈໃສ່ແຕ່ລະວຽກງານ ດັ່ງນີ້: ການນຳພາໃນຂົງເຂດການເມືອງແນວຄິດ, ການຈັດຕັ້ງພະນັກງານ ແລະ ແບບແຜນວິທີເຮັດວຽກ ໃຫ້ເອົາໃຈໃສ່ສຶກສາອົບຮົມພະນັກງານລັດຖະກອນໃຫ້ມີຄວາມເຂົ້າໃຈ ກຳແໜ້ນແນວທາງນະໂຍບາຍຂອງພັກ, ເອົາໃຈໃສ່ການຈັດຕັ້ງເຊື່ອມຊຶມ ບັນດາເອກະສານ, ມະຕິ, ຄໍາສັ່ງ ແນວທາງນະໂຍບາຍຂອງພັກ, ສືບຕໍ່ເພີ່ມທະວີການກໍ່ສ້າງ ແລະ ປັບປຸງໜ່ວຍພັກໃຫ້ປອດໃສ, ເຂັ້ມແຂງ, ໜັກ  ແໜ້ນ, ສືບຕໍ່ປັບປຸງພາລະບົດບາດຂອງບັນດາກົມ, ພະແນກ ອຄ ແຂວງ, ນະຄອນຫຼວງ ແລະ ຫ້ອງການ ອຄ ເມືອງ ເພື່ອຮັບປະກັນໃຫ້ກົງຈັກກະທັດຮັດ ມີປະສິດທິພາບ ສອດຄ່ອງກັບຄວາມຮຽກຮ້ອງຕ້ອງການຂອງໜ້າວຽກຕົວຈິງ ຫຼີກເວັ້ນການທັບຊ້ອນໜ້າວຽກລະຫວ່າງກັນ.

ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ