ຕອນເຊົ້າ ເວລາ 09:00 ໂມງ ຂອງວັນທີ 07 ມັງກອນ 2022 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ, ໄດ້ຈັດພິທີປະກາດ ການແຕ່ງຕັ້ງ, ຍົກຍ້າຍພະນັກງານນໍາພາຄຸ້ມຄອງຂັ້ນຫົວໜ້າກົມຂອງກະຊວງ ອຄ ໂດຍການເປັນປະທານ ຂອງ ທ່ານ ປອ ຄໍາແພງ ໄຊສົມແພງ, ກໍາມະການສູນກາງພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ມີຜູ້ເຂົ້າຮ່ວມ ຄື: ທ່ານຮອງລັດຖະມົນຕີ, ເລຂາ, ຮອງເລຂາໜ່ວຍພັກ ພ້ອມດ້ວຍພະນັກງານຫຼັກແຫຼ່ງ ທີ່ຂຶ້ນກັບອົງຄະນະພັກ ກະຊວງອຸດສາຫະກຳ ແລະ ການຄ້າ ປະມານ 39 ທ່ານ. 
ໂອກາດນີ້ ທ່ານ ຕາງໜ້າ ຄະນະຈັດຕັ້ງສູນກາງພັກ ຂຶ້ນອ່ານຜ່ານ ດໍາລັດ ຂອງນາຍົກລັດຖະມົນຕີໃຫ້ຜູ້ຖືກແຕ່ງຕັ້ງໃໝ່ ແລະ ຄໍາສັ່ງຍົກຍ້າຍ ຈໍານວນ 01 ທ່ານຄື: 1. ທ່ານ ນ ປອ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ ກະຊວງອຸດສາຫະກໍາ ແລະ ການຄ້າ ຍົກຍ້າຍໄປເປັນຫົວໜ້າສະຖາບັນວິທະຍາດສາດເສດຖະກິດ ແລະ ສັງຄົມແຫ່ງຊາດ. 
ແລະ ມອບດໍາລັດ ຂອງນາຍົກລັດຖະມົນຕີໃຫ້ຜູ້ຖືກແຕ່ງຕັ້ງໃໝ່ ໂດຍທ່ານ ປອ ຄໍາແພງ ໄຊສົມແພງ ກໍາມະການສູນກາງພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ.
* ແລະ ທ່ານ ວັນໄຊ ແກ້ວຄໍາພັນ ຮັກສາການຫົວໜ້າກົມຈັດຕັ້ງ ແລະ ພະນັກງານ ຂຶ້ນອ່ານຜ່ານຂໍ້ຕົກລົງວ່າດ້ວຍການແຕ່ງຕັ້ງ ພະນັກງານນໍາພາຄຸ້ມຄອງຂັ້ນຫົວໜ້າກົມ ແລະ ຫົວໜ້າສະຖາບັນຈໍານວນ 03 ທ່ານ ແລະ ອີກ 02 ທ່ານຖືກແຕ່ງຕັ້ງເປັນຮັກສາການແທນຫົວໜ້າກົມ, ຫົວໜ້າຫ້ອງການກະຊວງຄື:
1. ທ່ານ ນາງ ກິ່ງສະດອນ ເພັດດາວເຮືອງ ຮັກສາການຫົວໜ້າຫ້ອງການ ຂຶ້ນເປັນຫົວໜ້າກົມຈັດຕັ້ງ ແລະ ພະນັກງານ2. ທ່ານ ປອ ບຸນເພັງ ສີບຸນເຮືອງ ຮອງຫົວໜ້າຫ້ອງການ ຂຶ້ນເປັນຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ 3. ທ່ານ ປອ ແກ້ວມໍລະກົດ ສິດລາກອນ ຮັກສາການຫົວໜ້າສະຖາບັນຄົ້ນຄວ້າອຸດສາຫະກໍາ ແລະ ການຄ້າ ຂຶ້ນເປັນຫົວໜ້າສະຖາບັນຄົ້ນຄວ້າອຸດສາຫະກໍາ ແລະ ການຄ້າ 4. ທ່ານ ວິທູນ ສິດທິມໍລະດາ ຮອງຫົວໜ້າຫ້ອງການ ຂຶ້ນເປັນຮັກສາການແທນຫົວໜ້າຫ້ອງການ 5. ທ່ານ ສັນຕິສຸກ ພຸນສະຫວັດ ຮອງຫົວໜ້າກົມນະໂຍບາຍການຄ້າຕ່າງປະເທດ ຂຶ້ນເປັນຮັກສາການແທນຫົວໜ້າກົມຊັບສິນທາງປັນຍາ.
ພ້ອມດຽວກັນນີ້, ທ່ານ ປອ. ຄໍາແພງ ໄຊສົມແພງ ກໍາມະການສູນກາງພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດໂອ້ລົມຕໍ່ພິທີດັ່ງກ່າວ ໂດຍໄດ້ສະແດງຄວາມຊົມເຊີຍ ແລະ ຂອບໃຈຕໍ່ ທ່ານ ນ ປອ ຂັນລາສີ ແກ້ວບຸນພັນ ທີ່ໄດ້ປະກອບສ່ວນອຸທິດເຫື່ອແຮງສະຕິປັນຍາ ເຂົ້າໃນພາລະກິດຂອງພັກ ແລະ ລັດ ກໍ່ຄືການຈັດຕັ້ງປະຕິບັດວຽກງານຂອງຂະແໜງ ອຄ ຕະຫຼອດມາ ພ້ອມທັງເນັ້ນບັນດາທ່ານທີ່ໄດ້ຮັບການແຕ່ງຕັ້ງໃໝ່ ພາຍໃຕ້ສະພາບການໃໝ່ ຫັນປ່ຽນເຂົ້າໃນການດໍາລົງຊີວິດແບບໃໝ່ ແລະ ວຽກງານໃໝ່ທີ່ໄດ້ວາງຄາດໝາຍໄວ້, ຍົກສູງຄວາມເອົາໃຈໃສ່ໃນການຈັດຕັ້ງປະຕິບັດໜ້າທີ່ການເມືອງ ໂດຍສະເພະາການຈັດຕັ້ງຜັນຂະຫຍາຍມະຕິຂອງ ກອງປະຊຸມໃຫຍ່ຄັ້ງທີ 5 ຂອງອົງຄະນະພັກກະຊວງ ອຄ, ແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີ ຄັ້ງທີ 5 ໃຫ້ປະກົດຜົນເປັນຈິງ; ແລະ ມີເນື້ອໃນບາງຕອນວ່າ: ການແຕ່ງຕັ້ງ, ການສັບຊ້ອນ, ປ່ຽນແທນ ຂອງພະນັກງານ-ລັດຖະກອນ ເປັນການປະຕິບັດ ຢ່າງເປັນປົກກະຕິຂອງການຈັດຕັ້ງໃນທົ່ວລະບົບການເມືອງ ຂອງພວກເຮົາ, ເພື່ອແນໃສ່ປະຕິບັດກົດໝາຍວ່າດ້ວຍພະນັກງານ-ລັດຖະກອນ ແລະ ມະຕິ, ຄໍາສັ່ງຕ່າງໆ ຂອງວຽກງານພະນັກງານ. 
ຢ່າງໃດກໍຕາມ, ພາຍໃຕ້ສະພາບການໃໝ່ ທີ່ມີທັງຄວາມຫຍຸ້ງຍາກສັບສົນ ແລະ ສິ່ງທ້າທາຍ ຂ້າພະເຈົ້າ ຮຽກຮ້ອງໃຫ້ບັນດາກົມ, ຫ້ອງການກະຊວງ ແລະ ສະຖາບັນອຸດສາຫະກໍາ ແລະ ການຄ້າ ເອົາໃຈໃສ່ແຕ່ລະວຽກງານ ດັ່ງນີ້: ການນຳພາໃນຂົງເຂດການເມືອງແນວຄິດ, ການຈັດຕັ້ງພະນັກງານ ແລະ ແບບແຜນວິທີເຮັດວຽກ ໃຫ້ເອົາໃຈໃສ່ສຶກສາອົບຮົມພະນັກງານລັດຖະກອນໃຫ້ມີຄວາມເຂົ້າໃຈ ກຳແໜ້ນແນວທາງນະໂຍບາຍຂອງພັກ, ເອົາໃຈໃສ່ການຈັດຕັ້ງເຊື່ອມຊຶມ ບັນດາເອກະສານ, ມະຕິ, ຄໍາສັ່ງ ແນວທາງນະໂຍບາຍຂອງພັກ, ສືບຕໍ່ເພີ່ມທະວີການກໍ່ສ້າງອົງການຈັດຕັ້ງມະຫາຊົນ ແລະ ປັບປຸງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ; ການຊີ້ນໍານໍາພາວຽກວິຊາສະເພາະ ຂອງຂະແໜງ ອຄ; ສືບຕໍ່ປັບປຸງພາລະບົດບາດ ຂອງພະແນກ ອຄ ແຂວງ, ນະຄອນຫຼວງ ແລະ ຫ້ອງການ ອຄ ເມືອງ ເພື່ອຮັບປະກັນໃຫ້ກົງຈັກກະທັດຮັດ ມີປະສິດທິພາບ ສອດຄ່ອງກັບຄວາມຮຽກຮ້ອງຕ້ອງການຂອງໜ້າວຽກຕົວຈິງ ຫຼີກເວັ້ນການທັບຊ້ອນໜ້າວຽກລະຫວ່າງກັນ. 
ນອກຈາກນີ້, ທ່ານ ນ ກິ່ງສະດອນ ເພັດດາວເຮືອງ ໄດ້ຕາງໜ້າບັນດາທ່ານທີ່ຖືກແຕ່ງຕັ້ງໃໝ່ ຂຶ້ນກ່າວຮັບການໂອ້ລົມຂອງ ທ່ານລັດຖະມົນຕີ. 
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
