ກຸ່ມຜະລິດກະສິກຳຂະໜາດນ້ອຍ ແລະ ກາງ ຂອງແຂວງເຊກອງ, ສາລະວັນ ແລະ ບໍລິຄຳໄຊ ໄດ້ຮັບການຊ່ວຍເຫຼືອລ້າຈາກອົງການຜະລິດຕະພາບແຫ່ງອາຊີ (Asian Productivity Organization ຫຼື APO) ທີ່ຈັດສັນໃຫ້ແຕ່ລະປະເທດສະມາຊິກຈາກງົບປະມານພິເສດເພື່ອຊ່ວຍຮັບມືຜົນກະທົບຈາກໂຄວິດ-19. ສະເພາະ ສປປ ລາວ ໄດ້ຮັບການສະໜັບສະໜູນການຈັດຊື້ເຮືອນຮົ່ມມີມູນຄ່າທັງໝົດແມ່ນ 90.000 ໂດລາສະຫະລັດ ຫຼື ປະມານ 900 ກວ່າລ້ານກີບ ໂດຍໄດ້ຄັດເລືອກເອົາກຸ່ມຜູ້ຜະລິດກະສິກຳຂະໜາດນ້ອຍ ແລະ ກາງ(ກຸ່ມປູກຜັກເປັນສິນຄ້າ) ຈຳນວນ 6 ກຸ່ມຢູ່ໃນ 6 ແຂວງປະກອບດ້ວຍ ອຸດົມໄຊ, ວຽງຈັນ, ໄຊສົມບູນ, ບໍລິຄຳໄຊ, ສາລະວັນ ແລະ ເຊກອງ.
ຈຸດປະສົງຕົ້ນຕໍ່ຂອງການຊ່ວຍເຫຼືອເພື່ອຫຼຸດຜ່ອນຜົນກະທົບຈາກການແຜ່ລະຍາດຂອງພະຍາດໂຄວິດ-19 ຢູ່ໃນບັນດາແຂວງ ໂດຍສະເພາະແມ່ນເພື່ອຊ່ວຍເຫຼືອຫຼຸດຜ່ອນຕົ້ນທຶນການຜະລິດ ແລະ ສ້າງຄວາມເຂັ້ມແຂງໃຫ້ແກ່ກຸ່ມຊາວກະສິກອນ ໃນການປັບປຸງຜະລິດຕະພາບ ແລະ ຄຸນນະພາບຂອງສິນຄ້າກະສິກຳໃຫ້ໄດ້ມາດຕະຖານ, ກາຍເປັນຕົວແບບການຜະລິດທີ່ສະອາດ ແລະ ປອດໄພ ຊຶ່ງໂຄງການດັ່ງກ່າວນີ້ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າໃນນາມເປັນອົງການຜະລິດຕະພາບແຫ່ງຊາດ ເປັນຜູ້ຈັດຕັ້ງປະຕິບັດໂຄງການ ໂດຍໄດ້ມອບໃຫ້ ບໍລິສັດ ເມືອງລາວສະໜອງສະບຽງອາຫານ ມາເປັນຜູ້ຕິດຕັ້ງເພາະເຫັນວ່າ ບໍລິສັດນີ້ມີປະສົບປະການ ແລະ ມີຊື່ສຽງໃນການຜະລິດກະສິກໍາໃນເຮືອນຮົ່ມ.
ໃນລະຫວ່າງວັນທີ 09-13 ມັງກອນ 2022 ນີ້ ໄດ້ເດີນທາງເພື່ອມອບ-ຮັບ ເຮືອນຮົ່ມໃຫ້ກຸ່ມຜະລິດກະສິກຳ ໃນແຕ່ລະແຂວງຕາງໜ້າໃຫ້ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ເຊັນມອບໂດຍ ທ່ານ ສາ ສິລິພົງ, ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ ທັງເປັນຜູ້ຕາງໜ້າຫ້ອົງການຜະລິດຕະພາບແຫ່ງອາຊີ, ສໍາລັບແຂວງເຊກອງ ເຊັນຮັບໂດຍ ທ່ານ ດາວວີ ສວຍທະລັງສີ, ຫົວໜ້າພະແນກ ອຄ ແຂວງ ພ້ອມດ້ວຍຕາງໜ້າກຸ່ມຜູ້ຜະລິດກະສິກຳບ້ານຫຼັກຂາວ, ສະເພາະແຂວງສາລະວັນ ຕາງໜ້າໂດຍ ທ່ານ ຄໍາຜ່ານ ສີລາວີ, ຫົວໜ້າ ພະແນກ ອຄ ແຂວງ ແລະ ຕາງໜ້າກຸ່ມຜູ້ຜະລິດກະສິກຳບ້ານນາຂ້ອຍສາວ ເປັນຜູ້ຮັບ, ສ່ວນແຂວງ ບໍລິຄຳໄຊ ຕາງໜ້າໂດຍ ທ່ານ ໄກສອນ ຈັນສີນາ ຫົວໜ້າພະແນກອຸດສາຫະກໍາ ແລະ ການຄ້າ ແລະ ຕາງໜ້າກຸ່ມຜະລິດ ເປັນຜູ້ຮັບ.
ໃນພິທີມອບຮັບເຮືອນຮົ່ມດັ່ງກ່າວໄດ້ຮັບກຽດເປັນສັກຂີພະຍານໂດຍ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸສາຫະກຳ ແລະ ການຄ້າ ນອກຈາກນີ້ກໍ່ຍັງມີພາກສ່ວນທີ່ກ່ຽວຂ້ອງ ແລະ ແຂກທີ່ຖຶກເຊີນເຂົ້າຮ່ວມເປັນສັກຂີພະຍານ. ສ່ວນ 3 ແຂວງທີ່ຍັງເຫຼືອແມ່ນຈະໄດ້ສືບຕໍ່ຈັດພິທີມອບ-ຮັບໃນຄັ້ງຕໍ່ໄປ.
ພາບ-ຂ່າວ: ໄດ້ມາຈາກກົມສົ່ງເສີມວິສາຫະກິດຂະໜາດນ້ອຍ ແລະ ກາງ
ຮຽບຮຽງໂດຍ: ໄພຄໍາອີ
