ເພື່ອສືບຕໍ່ຈັດຕັ້ງຜັນຂະຫຍາຍຜົນຂອງກອງປະຊຸມ ແກ້ໄຂສະພາບຫຍຸ້ງຍາກຂອງການສົ່ງອອກສິນຄ້າໄປ ສປ ຈີນ ຜ່ານດ່ານສາກົນບໍ່ເຕັນ-ບໍ່ຫານ ທີ່ກະໍຊວງອຸດສາຫະກໍາ ແລະ ການຄ້າ(ອຄ) ໄດ້ຈັດຂຶ້ນໃນວັນທີ 26-27 ທັນວາ 2021, ທີ່ດ່ານບໍ່ເຕັນ ແຂວງຫຼວງນໍ້າທາຜ່ານມາ, ໂດຍເນັ້ນຍົກລະດັບການຂົນສ່ົ່ງຜ່ານທາງລົດໄຟ ລາວ-ຈີນ ໃຫ້ມີປະສິດທິພາບສູງສຸດ ເພື່ອຫຼຸດຜ່ອນຄວາມກົດດັນໃນການຂົນສົ່ງທາງບົກ.
ໃນວັນທີ 18 ມັງກອນ 2022 ນີ້ ທ່ານ ປອ. ຄໍາແພງ ໄຊສົມແພງ, ລັດຖະມົນຕີກະຊວງ ອຄ ພ້ອມດ້ວຍຄະນະ ແລະ ພາກທຸລະກິດ ໄດ້ລົງຢ້ຽມຢາມ, ຕິດຕາມ, ກວດກາ ແລະ ຊຸກຍູ້ ຄວາມພ້ອມໃນການບໍລິການຂົນສົ່ງສິນຄ້າຂອງ ສະຖານີລົດໄຟວຽງຈັນໃຕ້ ໂດຍສະເພາະ ລະບົບການຄຸ້ມຄອງບໍລິຫານສະຖານີ, ໂຄງລ່າງພື້ນຖານ ແລະ ສິ່ງອໍານວຍຄວາມສະດວງຕ່າງໆ ແລະ ໃນມື້ດຽວກັນຄະນະດັ່ງກ່າວ ຍັງໄດ້ລົງຢ້ຽມຢາມ, ຕິດຕາມ, ກວດກາ ແລະ ຊຸກຍູ້ ຄວາມພ້ອມໃນການບໍລິການແຈ້ງຜ່ານ ແລະ ການບໍລິການຂົນສົ່ງສິນຄ້າ ຂອງທ່າບົກທ່ານາແລ້ງ ແລະ ເຂດໂລຈິສຕິກ ນະຄອນຫຼວງວຽງຈັນ.
ພ້ອມທັງໄດ້ເປີດກອງປະຊຸມປຶກສາຫາລື ແລະ ຊອກວິທີທາງແກ້ບັນຫາ ແລະ ຂໍ້ຫຍຸ້ງຍາກໃນການນໍາເຂົ້າ-ສົ່ງອອກ, ຜ່ານແດນ ແລະ ຂົນສົ່ງສິນຄ້າ ຢູ່ສະຖານີລົດໄຟວຽງຈັນໃຕ້, ທ່າບົກທ່ານາແລ້ງ ແລະ ເຂດໂລຈິສຕິກ ເຊິ່ງກອງປະຊຸມສະເໜີການແກ້ໄຂບັນຫາຕົ້ນຕໍຄື: 1/ ການກະກຽມຄວາມພ້ອມທາງດ້ານລະບຽບ ແລະ ບຸກຄະລາກອນໃນການກວດປ່ອຍສິນຄ້າ ນໍາເຂົ້າ-ສົ່ງອອກ, ຜ່ານແດນ ຢູ່ສະຖານີລົດໄຟວຽງຈັນໃຕ້, ທ່າບົກທ່ານາແລ້ງ; 2/ ການປັບປຸງໂຄງລ່າງພື້ນຖານຂອງສະຖານີລົດໄຟ, ການເຜີຍແຜ່ຂໍ້ມູນຂ່າວສານກ່ຽວກັບຂັ້ນຕອນ, ເອກະສານ, ຄ່າທໍານຽມ, ການຈອງຕູ້ຄອນເທນເນີ້, ການເພີ່ມຈໍານວນຖ້ຽວ, ເພີ່ມຈໍານວນ ແລະ ຂະໜາດຂອງຕູ້ຄອນເທນເນີ້ ຜ່ານທາງລົດໄຟ ແລະ 3) ການລະດົມກໍາລັງ ແລະ ຄວາມສາມາດໃນການຂົນສົ່ງ ເພື່ອຕອບສະໜອງລົດຂົນສົ່ງສິນຄ້ານໍາເຂົ້າ-ສົ່ງອອກ ໃຫ້ພຽງພໍ ແລະ ໄດ້ມາດຕະຖານ ຢູ່ສະຖານີລົດໄຟວຽງຈັນໃຕ້, ທ່າບົກທ່ານາແລ້ງ ແລະ ສາງພັກສິນຄ້າຕ່າງໆ ເປັນຕົ້ນແມ່ນ ຫົວລາກ, ຫາງລາກ, ຕູ້ຄອນເທນເນີ້ ແລະ ອື່ນໆ.
ກອງປະຊຸມໃນຄັ້ງນີ້ ຍັງເປັນການກະກຽມເນື້ອໃນກ່ຽວກັບ ວຽກງານອໍານວຍຄວາມສະດວກທາງດ້ານການຄ້າ ລາຍງານຕໍ່ກອງປະຊຸມຄະນະກໍາມະການອໍານວຍຄວາມສະດວກທາງດ້ານການຄ້າ ທົ່ວປະເທດ ຄັ້ງທີ 4 ຊຶ່ງຈະຈັດຂຶ້ນໃນວັນທີ 25 ມັງກອນ 2022 ທີ່ຈະມາເຖິງນີ້ ໂດຍການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ຫົວໜ້າຄະນະກໍາມະການຊີ້ນໍາລວມອໍານວຍຄວາມສະດວກທາງດ້ານການຄ້າ ຂັ້ນສູນກາງ.
ແຫຼ່ງຂ່າວ: ສັນຕິ, ພາບ: ສອນໄຊ ໜັງສືພິມເສດຖະກິດການຄ້າ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
