ວັນທີ 28 ມັງກອນ 2022, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ເລຂາຄະນະບໍລິິຫານງານພັກກະຊວງ, ລັດຖະມົນຕີ ກະຊວງ ອຸດສາຫະກຳ ແລະ ການຄ້າ (ອຄ) ພ້ອມດ້ວຍບັນດາຫົວຫນ້າກົມອ້ອມຂ້າງກະຊວງ ໄດ້ລົງຢ້ຽມຢາມ ແລະ ເຮັດວຽກກັບ ພະແນກ ອຸດສາຫະກໍາ ແລະ ການຄ້າແຂວງໄຊສົມບູນ, ໂດຍໄດ້ຮັບການຕ້ອນຮັບຈາກ ທ່ານ ພາທໍ່ ຕົ່ງເຢີທໍ່, ຫົວໜ້າພະແນກ ອຄ ແຂວງໄຊສົມບູນ, ມີຄະນະພະແນກ ແລະ ພະນັກງານວິຊາການອ້ອມຂ້າງພະແນກ ອຄ ເຂົ້າຮ່ວມ ລວມທັງໝົດຈຳນວນ 40 ທ່ານ, ທີ່ຫ້ອງປະຊຸມ ພະ​ແນກ​ ອຄ ແຂວງ​. ໃນ​ນັ້ນ, ຫົວໜ້າພະແນກ  ອຄ ແຂວງ ໄດ້ລາຍງານການປະຕິບັດວຽກງານ ອຄ ໃນໄລຍະຜ່ານມາ ເປັນຕົ້້ນແມ່ນ ລາຍງານສະພາບຄວາມເປັນມາ, ວຽກງານບຸກຄະລາກອນ, ວຽກງານອຸດສາຫະກໍາ ແລະ ຫັດຖະກໍາ, ວຽກງານການຄ້າພາຍໃນ, ວຽກງານສົ່ງເສີມວິສາຫະກິດຂະໜາດນ້ອຍ ແລະ ກາງ, ວຽກງານທະບຽນ ແລະ ຄຸ້ມຄອງວິສາຫະກິດ, ວຽກງານການນຳເຂົ້າ ແລະ ສົ່ງອອກ, ວຽກງານຊັບສິນທາງປັນຍາ, ວຽກງານມາດຕະຖານ ແລະ ວັດແທກ.

       ຜ່ານການຮັບຟັງລາຍງານ ແລະ ການປະກອບຄຳຂອງບັນດາຫົວຫນ້າກົມຜູ້ເຂົ້າຮ່ວມ, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ເລຂາຄະນະບໍລິິຫານງານພັກກະຊວງ, ລັດຖະມົນຕີ ກະຊວງ ອຄ ໄດ້ກ່າວ ວ່າ: ເນື່ອງຈາກການແຜ່ລະບາດຂອງພະຍາດ ໂຄວິດ 19 ສົ່ງຜົນກະທົບເປັນວົງກວ້າງໃຫ້ແກ່ການດຳລົງຊີວິດ ແລະ ທຸກຂົງເຂດວຽກງານ, ຜົນກະທົບໃສ່ການຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມ ກໍຄື: ຂົງເຂດວຽກງານ ອຄ, ສ້າງສະພາບຄວາມບໍ່ສະຫງົບ ແລະ ຄວາມສັບສົນວຸ້ນວາຍໃນສັງຄົມ ໃນຫຼາຍໆປະເທດທົ່ວໂລກ ທີ່ໄດ້ກະທົບໃສ່ເສດຖະກິດໂດຍລວມ ເຂົ້າສູ່ໄລຍະຖົດຖອຍ, ຫຼາຍທຸລະກິດ, ກິດຈະການ ຕ້ອງຢຸດສະຫງັດ ແລະ ປິດໂຕລົງ, ແຮງງານຈຳນວນບໍ່ໜ້ອຍປະສົບບັນຫາວ່າງງານ, ເກີດບັນຫາເຂົ້າຍາກໝາກແພງ, ປະຊາຊົນທົ່ວໂລກ ຕ້ອງປັບໂຕເຂົ້າກັບການດຳລົງຊີວິດແບບໃໝ່ ເຊັ່ນດຽວກັນກັບ ປະເທດເຮົາ ກໍພວມປະສົບບັນຫາທັງທາງກົງ ແລະ ທາງອ້ອມ ຢ່າງຫຼີກຫຼ່ຽງບໍ່ໄດ້.   ດັ່ງນັ້ນ, ທ່ານ ປອ. ຄໍາແພງ ໄຊສົມແພງ ກໍໄດ້ສະເໜີ ແລະ ເໜັ້ນໜັກຕື່ມອິກ ວ່າ:​ ສະເໜີໃຫ້ພ້ອມພຽງກັນໃຫ້ການສົ່ງເສີມການຜະລິດ-ບໍລິການ ເພື່ອຊົມໃຊ້ພາຍໃນ, ຫຼຸດຜ່ອນການນໍາເຂົ້າ ແລະ ເປັນສິນຄ້າສົ່ງອອກ (ຫັນປ່ຽນໄປສູ່ສັງຄົມການຜະລິດ) ແລະ ໃຫ້ຂະແໜງ ອຄ ຂອງພວກເຮົາ ໃຫ້ເລັ່ງສຸມໃນ ການສ້າງສະພາບແວດລ້ອມທີ່ເອື້ອອໍານວຍແກ່ການດໍາເນີນທຸລະກິດ, ຫຼຸດຜ່ອນຂັ້ນຂອດ ແລະ ໄລຍະເວລາໃນການອະນຸຍາດດໍາເນີນທຸລະກິດ ແລະ ສ້າງຄວາມສະດວກໃນຂອດການຈໍລະຈອນສິນຄ້າ ເພື່ອເອື້ອອໍານວຍໃຫ້ ສິນຄ້າ ຂອງ ສປປ ລາວ ສາມາດສົ່ງອອກໄດ້ວ່ອງໄວ ແລະ ເພີ່ມຂື້ນ ຄຽງຄູ່ກັນນັ້ນ, ໃຫ້ເລັ່ງສຸມໃນ ການສ້າງສະພາບແວດລ້ອມເອື້ອຍອໍານວຍໃນການເຮັດທຸລະກິດ ພາຍໃນ ເພື່ອດຶງດູດການລົງທຶນຕ່າງປະເທດ ໂດຍສະເພາະ ດ້ານກະສິກໍາ ໃຫ້ເປັນສິນຄ້າອຸດສາຫະກໍາ ທີ່ມີຄຸນນະພາບທຽບເທົ່າສາກົນ ແລະ ສາມາດສະໜອງແກ່ຕະຫຼາດພາຍໃນ ແລະ ຕ່າງປະເທດໄດ້.

      ໃນໂອກາດການລົງຢ້ຽມຢາມ ໃນຄັ້ງນີ້, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ອຄ ກໍໄດ້ໃຫ້ກຽດຕາງໜ້າໃຫ້ ກະຊວງ ອຄ ມອບ: 1) ເງິນຕ້ານ ​ແລະ ສະກັດກັ້ນໂຄວິດ 19 ​ໃຫ້ພະແນກ ອຄ ​ແຂວງໄຊສົມບູນ​ຈຳນວນ ​​5,000,000 ກີບ; 2) ມອບອຸປະກອນເຄື່ອງໃຊ້ຈໍານວນໜຶ່ງ ປະກອບມີ: ໜ້າກາກ, ເຈລລ້າງມື ແລະ ນໍ້າເຫຼົ້າ 90 ເພື່ອນໍາໃຊ້ ປ້ອງກັນເຊື້ອພະຍາດໂຄວິດ 19; 3) ມອບເສື້ອ ແລະ ຖົງຜ້າ ຂອງກອງທຶນສົ່ງເສີມທຸລະກິດ ຂະໜາດນ້ອຍ ແລະ ຂະໜາດກາງ ຈໍານວນ 10 ຊຸດ;  4) ມອບ ປື້ມນິຕິກໍາ, ກົດໝາຍ ແລະ ບັນດາຂໍ້ຕົກລົງ ທີ່ຕິດພັນກັບ ວຽກງານຂະແໜງການຄ້າພາຍໃນ; ແລະ 5) ມອບປຶ້ມແຜນຍຸດທະສາດພັດທະນາຊັບພະຍາກອນມະນຸດ ຂອງຂະແໜງອຸດສາຫະກຳ ແລະ ການຄ້າ ແຕ່ປີ 2021-2025 ແລະ ວິໄສທັດຮອດປີ 2030 ຈໍານວນ 06 ຫົວໃຫ້ພະແນກ ອຄ ແຂວງໄຊສົມບູນ ແລະ ບັນດາຫ້ອງການ ອຄ ເມືອງ ເພື່ອນໍາໄປຜັນຂະຫຍາຍຈັດຕັ້ງປະຕິບັດໃຫ້ເກີດປະໂຫຍດສູງສຸດ.

       ໃນວັນຕອນເຊົ້າຂອງວັນດຽວກັນ, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ (ອຄ) ພ້ອມດ້ວຍຄະນະ ໄດ້ເປັນກຽດເຂົ້າຮ່ວມ ແລະ ເປັນປະທານໃນພິທີມອບ-ຮັບ ເຮືອນຮົ່ມ ໃຫ້ກຸ່ມຜູ້ຜະລິດຜັກບ້ານທົ່ງຄູນ, ເມືອງອານຸວົງ, ແຂວງໄຊສົມບູນ ​ ຈໍານວນ 4 ຫລັງ ທີ່ຢູ່ພາຍໃຕ້ການຊ່ວຍເຫຼືອຂອງ ອົງການຜະລິດຕະພາບແຫ່ງອາຊີ ກັບ ອົງການຜະລິດຕະພາບແຫ່ງອາຊີ ຫຼື ອົງການ Asian Productivity Organization (APO), ຊຶ່ງໃນພິທີດັ່ງກ່າວຍັງໄດ້ຮັບກຽດເປັນປະທານຮ່ວມ ຂອງ ທ່ານ ສຸກສະຫວາດ ວົງພູມເຫຼັກ, ຄະນະປະຈຳພັກແຂວງ, ຮອງເຈົ້າແຂວງແຂວງ ໄຊສົມບູນ, ເຈົ້າເມືອງອານຸວົງ, ພະແນກ ອຄ ແຂວງ, ກະສິກໍາ ແລະ ປ່າໄມ້ເມືອງ, ຫ້ອງວ່າການເມືອງ, ນາຍບ້ານບ້ານທົ່ງຄູນ ແລະ ພາກກ່ຽວຂ້ອງຈາກແຂວງໄຊສົມບູນເຂົ້າຮ່ວມ.

      ຕອນທ້າຍ, ທ່ານ ປອ. ຄຳ​ແພງ ໄຊ​ສົມ​ແພງ, ກຳມະການສູນກາງພັກ, ເລຂາຄະນະບໍລິີຫານງານພັກກະ  ຊວງ, ລັດຖະມົນຕີ ກະຊວງ ອຄ ກໍໄດ້ສະແດງຂອບໃຈ ແລະ ຍ້ອງຍໍຊົມເຊີຍ ນໍາມາຍັງການນໍາຂອງແຂວງໄຊສົມບູນ ແລະ ພະແນກ ອຄ ທີ່ໃຫ້ການຕ້ອນຮັບຢ່າງອົບອຸ່ນ, ອົງການ APO ແລະ ທຸກພາກສ່ວນທີ່ກ່ຽວຂ້ອງທັງຢູ່ສູນກາງ ແລະ ທ້ອງຖິ່ນ ທີ່ໄດ້ເປັນເຈົ້າການ ແລະ ໃຫ້ການຮ່ວມມື  ກະຊວງອຸດ ອຄ ໃນການຈັດຕັ້ງປະຕິບັດວຽກງານ ກັບ ທ້ອງຖິ່ນໃນຄັ້ງນີ້ິ້ ຂອງພວກເຮົາຈົນປະສົບຜົນສໍາເລັດຢ່າງຈົບງາມ, ເນື່ອງຈາກປະຈຸບັນ ເຫັນວ່າບັນຫາການແຜ່ລະບາດຂອງເຊື້ອພະຍາດ ໂຄວິດ 19 ທ່ານ ປອ. ຄໍາແພງ ໄຊສົມແພງ ກໍໄດ້ສະເໜີໃຫ້ທຸກພາກສ່ວນ ທັງສູນກາງ ແລະ ທ້ອງຖິ່ນ ຂໍໃຫ້ສືບຕໍ່ປະສານສົມທົບ, ຊຸກຍູ້ ແລະ ສົ່ງເສີມທຸກຂົງເຂດວຽກງານ ທີ່ຕິດພັນກັບຂະແໜງ ອຸດສະຫະກໍາ ແລະ ການຄ້າ ຢ່າງພ້ອມພຽງ ເພື່ອນໍາພາວຽກງານ ອຄ ກໍຄື ການພັດທະນາເສດຖະກິດຂອງ ສປປ ລາວ ພວກເຮົາໃຫ້ນັບມື້ນັບເຂັ້ມແຂງຍິ່ງຂື້ນ.

ພາບ-ຂ່າວ: ໄດ້ມາຈາກພະແນກ ອຄ ແຂວງໄຊສົມບູນ

ຮຽບຮຽງ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ.  ກຜຮ/ ກະຊວງ ອຄ,