9 ປີຂອງການເປັນສະມາຊິກອົງການໆຄ້າໂລກ (ອຄລ), ສປປ ລາວ ໄດ້ສຳເລັດການຈັດຕັ້ງປະຕິບັດບັນດາພັນທະ ແລະ ປະກອບສ່ວນເຂົ້າໃນການເຈລະຈາບັນດາຂໍ້ລິເລີ່ມຕ່າງໆ, ໄດ້ສ້າງສະພາບແວດລ້ອມທີ່ເອື້ອອຳນວຍຄວາມສະດວກໃນການດຳເນີນທຸລະກິດ, ຊ່ວຍດຶງດູດການລົງທຶນໂດຍກົງຈາກຕ່າງປະເທດເພີ່ມຂຶ້ນ 34% ທຽບໃສ່ກ່ອນການເຂົ້າເປັນສະມາຊິກ.
ໃນວັນທີ 2 ກຸມພາ 2022 ທີ່ກະຊວງອຸດສາຫະກຳ ແລະ ການຄ້າ (ອຄ) ໄດ້ມີການຈັດກອງປະຊຸມແລກປ່ຽນຄຳຄິດເຫັນ ເນື່ອງໃນໂອກາດການເຂົ້າເປັນສະມາຊິກອົງການການຄ້າໂລກ ຂອງ ສປປ ລາວ ຄົບຮອບ 9 ປີ ( 02/02/2013 – 02/02/2022 ) ໃນຫົວຂໍ້ “ຄວາມສຳຄັນຂອງຂໍ້ລິເລີ່ມກ່ຽວກັບການອຳນວຍຄວາມສະດວກດ້ານ ການລົງທຶນເພື່ອການພັດທະນາໃນຂອບອົງການການຄ້າໂລກ ຕໍ່ການຟື້ນຟູເສດຖະກິດໃນຍຸກໂຄວິດ-19 ໂດຍການເປັນປະທານກ່າວເປີດຂອງ ທ່ານ ຄຳແພງ ໄຊສົມແພງ, ລັດຖະມົນຕີກະຊວງ ອຄ, ມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດ ຈຳນວນ 80 ຄົນ ໂດຍກອງປະຊຸມໄດ້ຮັບການສະໜັບສະໜູນດ້ານງົບປະມານຈາກໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ Laos Business Environnent (LBE) ຂອງ USAID.
ທ່ານ ປອ ຄຳແພງ ໄຊສົມແພງ ກ່າວໃນພິທີເປີດກອງປະຊຸມວ່າ: 9 ປີ ຂອງການເປັນສະມາຊິກ ອຄລ, ສປປ ລາວ ໄດ້ສຳເລັດການຈັດຕັ້ງປະຕິບັດບັນດາພັນທະ ແລະ ປະກອບສ່ວນເຂົ້າໃນການເຈລະຈາບັນດາຂໍ້ລິເລີ່ມຕ່າງໆ ເພື່ອຍາດແຍ່ງເອົາຜົນປະໂຫຍດດ້ວຍການປັບປຸງນິຕິກຳຕ່າງໆໃຫ້ມີຄວາມສອດຄ່ອງ, ມີຄວາມໂປ່ງໃສ ແລະ ສ້າງສະພາບແວດລ້ອມທີ່ເອື້ອອຳນວຍຄວາມສະດວກໃນການດຳເນີນທຸລະກິດ ເພື່ອເຮັດໃຫ້ນັກລົງທຶນ ມີຄວາມເຊື່ອໝັ້ນຕໍ່ນະໂຍບາຍການຄ້າ ແລະ ການລົງທຶນຂອງ ສປປ ລາວ. ສຳລັບ ສປປ ລາວ ການຍາດແຍ່ງເອົາຜົນປະໂຫຍດຈາກການເຊື່ອມໂຍງເສດຖະກິດກັບພາກພື້ນ ແລະ ສາກົນ ແມ່ນເຫັນໄດ້ຈາກຕົວເລກສະຖິຕິຂອງບົດສຶກສາຜົນຂອງການເຊື່ອມໂຍງເສດຖະກິດກັບສາກົນໃນປີ 2018 ທີ່ສະແດງໃຫ້ເຫັນວ່າ ການເຊື່ອມໂຍງເສດຖະກິດກັບສາກົນ ປະກອບສ່ວນໃຫ້ມີ: ການລົງທຶນໂດຍກົງຈາກຕ່າງປະເທດເພີ່ມຂຶ້ນ 34% ທຽບໃສ່ກ່ອນການເຂົ້າເປັນສະມາຊິກ ອຄລ; ການຄ້າດ້ານການບໍລິການເພີ່ມຂຶ້ນ 16,39%; ອັດຕາການຈ້າງງານເພີ່ມຂຶ້ນ 11,89% ແລະ ລາຍຮັບຄົວເຮືອນເພີ່ມຂຶ້ນ 5,23% ແລະ ເມື່ອບໍ່ດົນມານີ້ ສປປ ລາວ ໄດ້ສຳເລັດການເຂົ້າຮ່ວມເປັນພາຄີຂອງສັນຍາວ່າດ້ວຍ ເຕັກໂນໂລຊີຂໍ້ມູນຂ່າວສານ (Information Technology Agreement) ໃນຂອບ ອຄລ ໃນເດືອນ ພະຈິກ 2021 ຜ່ານມາ ຊຶ່ງເປັນການສົ່ງສັນຍານທີ່ດີໃນການເປີດກວ້າງການຄ້າ, ການສ້າງຄວາມເຊື່ອໝັ້ນໃນລະບົບການຄ້າຫຼາຍຝ່າຍ, ດຶງດູດການລົງທຶນຕ່າງປະເທດ ແລະ ພັດທະນາເສດຖະກິດຂອງ ສປປ ລາວ ໃນຂະແໜງໄອຊີທີ (ICT). ນອກຈາກນັ້ນ, ສປປ ລາວ ຍັງໄດ້ເຂົ້າຮ່ວມສະໜັບສະໜູນຂໍ້ລິ່ເລີ່ມໃໝ່ໃນຂອບ ອຄລ ຄື: ການຄ້າເອເລັກໂຕຣນິກ, ການອໍານວຍຄວາມສະດວກທາງດ້ານການລົງທຶນເພື່ອການພັດທະນາ, ຈຸນລະວິສາຫະກິດ-ວິສາຫະກິດຂໜາດນ້ອຍ ແລະ ກາງ ແລະ ອື່ນໆ.
ໃນກອງປະຊຸມຄັ້ງນີ້, ໄດ້ເຜີຍແຜ່ກ່ຽວກັບສະພາບການເຈລະຈາໃນປັດຈຸບັນຂອງ ອຄລ ແລະ ການປະກອບສ່ວນຂອງ ສປປ ລາວ ໂດຍ ທ່ານ ນາງ ວິໄລພອນ ຊິນດາວົງ ຮອງຫົວໜ້າກົມນະໂຍບາຍການຄ້າຕ່າງປະເທດ, ພ້ອມທັງໄດ້ ມີການຈັດເວທີສົນທະນາແລກປ່ຽນຄໍາຄິດເຫັນລະຫວ່າງພາກລັດ ແລະ ພາກທຸລະກິດ ກ່ຽວກັບການອໍານວຍຄວາມສະດວກດ້ານການລົງທຶນເພື່ອການພັດທະນາ ຕໍ່ການຟື້ນຟູເສດຖະກິດໃນຍຸກໂຄວິດ-19 ໂດຍມີ ທ່ານ ທະນົງສິນ ກັນລະຍາ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ທ່ານ ນາງ ວິໄລພອນ ຊິນດາວົງ ຮອງຫົວໜ້າກົມນະໂຍບາຍການຄ້າຕ່າງປະເທດ, ທ່ານ ວິເລດ ກິນນາວົງ ຮອງຫົວໜ້າກົມສ່ວຍສາອາກອນ, ກະຊວງການເງິນ ແລະ ທ່ານ ນາງ ມະນີພອນ ອິນຕາວັນ ຫົວໜ້າພະແນກ, ກົມຄຸມຄອງທະນາຄານທຸລະກິດ, ທະນາຄານແຫ່ງ ສປປ ລາວ ຜົນຂອງການສົນທະນາ ຈະນໍາໃຊ້ເປັນຂໍ້ມູນເພື່ອກະກຽມການເຈລະຈາຂໍ້ລິເລີ່ມດັ່ງກ່າວ ແລະ ການກຳນົດນະໂຍບາຍການຄ້າ ກໍຄືການເຊື່ອມໂຍງເສດຖະກິດກັບສາກົນໃນອະນາຄົດ.
ສປປ ລາວ ເຂົ້າເປັນສະມາຊິກ ອຄລ ໃນວັນທີ 2 ກຸມພາ 2013 ເປັນປະເທດອັນດັບທີ 158 ຂອງໂລກ ຜ່ານການເຈລະຈາຫຼາຍຫຼົບຫຼາຍຕ່າວນັບແຕ່ປີ 1997 ແລະ ມາຮອດປັດຈຸບັນສະມາຊິກ ອຄລ ທັງໝົດ 164 ປະເທດ.
ຂ່າວ: ສັນຕິ, ພາບ: ສອນໄຊ ໜັງສືພິມເສດຖະກິດການຄ້າ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
