ໃນຕອນເຊົ້າ, ວັນທີ 8 ກຸມພາ 2022,  ທ່ານ ປອ. ຄຳ​ແພງ ໄຊ​ສົມ​ແພງ ລັດຖະມົນຕີ ກະຊວງ ອຄ ພ້ອມຄະນະ ໄດ້ພົບປະ ​​​ທ່ານ ຄໍາຜອຍ ວັນນະສານ ເຈົ້າ​ແຂວງ ແຂວງຜົ້ງສາລີ ພ້ອມ​ດ້ວຍຄະນະ ທີ່​ຫ້ອງວ່າ​ການ​ປົກ​ຄອງ​ແຂວງຜົ້ງສາລີ. ໃນໂອກາດດັ່ງກ່າວ ທ່ານ​ເຈົ້າ​ແຂວງ​ ໄດ້​ກ່າວສະແດງຄວາມຕ້ອນຮັບ ທ່ານລັດ​ຖະ​ມົນ​ຕີ​ກະ​ຊວງ ອຄ ພ້ອມຄະນະ ດ້ວຍຄວາມອົບອຸ່ນ ແລະ ທ່ານໄດ້ແຈ້ງໃຫ້ຊາບ ກ່ຽວກັບ​ສະ​ພາບຈຸດພິເສດຂອງແຂວງ ໂດຍສະເພາະສະພາບການພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາ. ທັງສອງທ່ານໄດ້ແລກປ່ຽນທັດສະນະ ແລະ ຄໍາຄິດຄໍາເຫັນ ຢ່າງກົງໄປກົງມາ ຕໍ່ການຈັດຕັ້ງປະຕິບັດວຽກງານ ຂອງຂົງເຂດອຸດສາຫະກຳ ແລະ ການຄ້າ ເປັນຕົ້ນ:​ ​1) ການສ້າງຄວາມເຂັ້ມແຂງ ໃຫ້ແກ່ພະນັກງານ ຂອງຂະແໜງອຸດສາຫະກຳ ແລະ ການຄ້າ ໃນທົ່ວແຂວງ; 2) ການສະໜອງທຶນ ໃຫ້ແກ່ຫົວໜ່ວຍວິສາຫະກິດຂະໜາດນ້ອຍ ແລະ ຂະໜາດກາງ ຂອງແຂວງ ເຮັດແນວໃດໃຫ້ເຂົາເຈົ້າສາມາດເຂົ້າເຖິງແຫ່ຼງທຶນດອກເບ້ຍຕ່ຳ ທີ່ກຳລັງຈັດຕັ້ງປະຕິບັດໃນປັດຈຸບັນ ໃຫ້ໄດ້ຫລາຍກ່ວາເກົ່າ; 3) ສະເໜີພິຈາລະນາ ຄົ້ນຄວ້າ ບິແບ່ງໂກຕ້າລັດຖະກອນ ສຳລັບປີ 2022 ນີ້ ໃຫ້ທາງແຂວງຜົ້ງສາລີຕື່ມ,​ 4) ສະເໜີ ຊ່ວຍຄົ້ນຄວ້າ ນໍາເອົາລາຍການສິນຄ້າທ່າແຮງຂອງແຂວງເຊັ່ນ: ຊາ, ໝາກ     

ແໜ່ງ, ໝາກເດື່ອຍ ທີ່ຍັງບໍ່ທັນໄດ້ຮັບຮອງ ລົງນາມໃນອະນຸສັນຍາສອງຝ່າຍ ລາວ-ຈີນ ເພື່ອເຈລະຈາເອົາເຂົ້າແຜນຮ່ວມກັບຝ່າຍຈີນ; 5) ຂໍໃຫ້ທາງກະຊວງ ຊ່ວຍປະສານຫາຂະແໜງການທີ່ກ່ຽວຂ້ອງ ຂອງ ສປປ ລາວ ແລະ ລັດຖະບານ ສປ ຈີນ ຊ່ວຍຄົ້ນຄວ້າພິຈາລະນາເປີດດ່ານທ້ອງຖິ່ນ (ປ່າຄາ-ບ້ານຈອມ) ແລະ ເປີດດ່ານສາກົນ ລານຕຸ້ຍ-ເມືອງຄັງ ເພື່ອໃຫ້ສາມາດລະບາຍສິນຄ້າ ໃຫ້ເປັນປົກກະຕິ.

           ທ່ານລັດຖະມົນຕີ ກະຊວງ ອຄ ຍັງໄດ້ແລກປ່ຽນທັດສະນະກ່ຽວກັບການຈັດຕັ້ງປະຕິບັດ 2 ວາລະແຫ່ງຊາດ ໂດຍສະເພາະວາລະວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ເວົ້າລວມ, ເວົ້າສະເພາະ ວຽກງານຈຸດສຸມທີ່ຕິດພັນກັບຄວາມຮັບຜິດຊອບຂອງ ຂະແໜງ ອຄ ກໍຄື: ການສົ່ງເສີມການຜະລິດ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ເພື່ອສ້າງຖານລາຍຮັບທີ່ເຂັ້ມແຂງ-ຍືນຍົງ ຊື່ງຈະໄດ້ເລັ່ງໃສ່ 3 ໜ້າວຽກ ເປັນຫລັກຄື: 1) ການປັບປຸງສະພາບແວດລ້ອມ ແລະ ແກ້ໄຂຄວາມຫຍຸ້ງ

ຍາກ ຂອງການດຳເນີນທຸລະກິດ; 2) ຊຸກຍູ້ການຜະລິດປຸງແຕ່ງສິນຄ້າທີ່ມີທ່າແຮງ ແລະ ຕະຫລາດຮອງຮັບ ເພື່ອການສົ່ງອອກ; ແລະ 3) ສົ່ງເສີມການຜະລິດ ແລະ ບໍລິການຕາມແລວທາງເສດຖະກິດພາຍໃນ ແລະ ພາກພື້ນ.

       ໃນຕອນເຊົ້າຂອງວັນດຽວກັນ, ທ່ານ ປອ. ຄຳ​ແພງ ໄຊ​ສົມ​ແພງ ພ້ອມດ້ວຍຄະນະ, ໄດ້ພົບປະ ແລະ ເຮັດວຽກ ກັບ ພະແນກອຸດສາຫະກໍາ ແລະ ການຄ້າແຂວງ ຜົ້ງສາລີ, ຊຶ່ງມີ ທ່ານ ວີສອນ ລາວເມົາ ຮອງເຈົ້າແຂວງ ຜູ້ຊີ້ນໍາຂົງເຂດເສດຖະກິດ, ຄະນະນໍາພະແນກ, ຫົວໜ້າ-ຮອງຫົວໜ້າຫ້ອງການ ອຸດສາຫະກຳ ແລະ ການຄ້າ ເມືອງ ແລະ ພະນັກງານຫຼັກແຫຼ່ງຂອງພະແນກ ອຄ ແຂວງຜົ້ງສາລີ ເຂົ້າຮ່ວມຢ່າງພ້ອມພຽງ ຢູ່ທີ່​ຫ້ອງປະຊຸມ ຫ້ອງວ່າ​ການ​ປົກ​ຄອງ​ແຂວງ​.

       ໃນໂອກາດດັ່ງກ່າວນີ້, ທ່ານ ທະນູຄໍາ ປິດຈະວົງ ​ຫົວໜ້າພະແນກ ອຸດສາຫະກໍາ ແລະ ການຄ້າ ແຂວງຜົ້ງສາລີ ໄດ້ລາຍງານ ການຈັດຕັ້ງປະຕິບັດເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການທີ່ຈະປະຕິບັດໃນຕໍ່ໜ້າ ໃຫ້ທີ່ປະຊຸມຊາບ, ຄຽງຄູ່ກັນນັ້ນ, ກໍໄດ້ມີບາງຂໍ້ສະເໜີ ທີ່ໄດ້ມີການປຶກສາຫາລືລົງເລິກ ແລະ ການແລກປ່ຽນຄໍາຄິດຄໍາເຫັນກັບ ບັນດາກົມ ທີ່ກ່ຽວຂ້ອງເຊັ່ນ: ການໃຫ້ທັດສະນະແນະນຳ ແລະ ບົດຮຽນ ທີ່ໄດ້ຈັດຕັ້ງປະຕິບັດ ໃນລະດັບຕ່າງໆ ໂດຍໃຫ້ໄປຕາມກົດໝາຍ, ລະບຽບການ ແລະ ນິຕິກຳທີ່ກ່ຽວຂ້ອງ ຊຶ່ງເປັນການຊ່ວຍໃຫ້ ພະແນກ ອຄ ແຂວງ ສາມາດນຳໄປຈັດຕັ້ງປະຕິບັດໄດ້ແທ້ ແລະ ແທດເໝາະກັບຕົວຈິງຕື່ມ.

        ໃນຕອນທ້າຍ ຂອງການພົບປະ ແລະ ເຮັດວຽກ ຮ່ວມກັບພະແນກ ອຄ ແຂວງຜົ້ງສາລີ ຄັ້ງນີ້ ທ່ານ ປອ. ຄໍາແພງ ໄຊສົມແພງ ໄດ້ຖືໂອກາດໂອ້ລົມ ແລະ ໃຫ້ທິດຊີ້ນຳບາງວຽກງານ ເຊັ່ນ: ການປັບປຸງສະພາບແວດລ້ອມ ແລະ ແກ້ໄຂຄວາມຫຍຸ້ງຍາກຂອງການເລີ້ມຕົ້ນທຸລະກິດ ໂດຍເພີ່ມທະວີການຈັດຕັ້ງປະຕິບັດຄໍາສັ່ງ ຂອງທ່ານນາຍົກລັດຖະ

ມົນຕີ ສະບັບເລກທີ 02/ນຍ, ເລກທີ 03/ນຍ ແລະ ເລກທີ 12/ນຍ ຢ່າງເຂັ້ມງວດ. ໄດ້ກຳນົດເປັນຄາດໝາຍສູ້ຊົນ ເອົາໃຈໃສ່ແກ້ໄຂບັນດາຕົວຊີ້ວັດທີ່ຍັງຄົງຄ້າງ ໃນຄໍາສັ່ງ ເລກທີ 02/ນຍ ແລະ 03/ນຍ ເພືີ່ອໃຫ້ອັນດັບຄວາມສະດວກ ຂອງການດໍາເນີນທຸລະກິດຢູ່ລາວຢູ່ໃນອັບດັບທີ່ດີຂຶີ້ນ; ຊຸກຍູ້ການຜະລິດ ແລະ ປຸງແຕ່ງ ສິນຄ້າທີ່ມີທ່າແຮງ ແລະ ຕະຫລາດຮອງຮັບ ເພືີ່ອການສົ່ງອອກໂດຍສົ່ງເສີມໃຫ້ສິນຄ້າໄດ້ຮັບການຢັ້ງຢືນກາຫມາຍມາດຕະຖານແຫ່ງຊາດ ແລະ ກາຫມາຍຄຸນນະພາບ, ສຳຄັນແມ່ນການຍົກປະສິດທິ

ພາບ ແລະ ອໍານວຍຄວາມສະດວກໃນການແຂ່ງຂັນເພືີ່ອສົ່ງອອກສິນຄ້າ ຊຶ່ງທາງກະຊວງ ໃຫ້ການຊຸກຍູ້ສົ່ງເສີມ ແລະ ອຳນວຍຄວາມສະດວກ ໂດຍສົມທົບກັບກະຊວງກະສິກຳ ແລະ ປ່າໄມ້, ໃນການເລັ່ງເຈລະຈາໃນກອບຕ່າໆ; ໄດ້ນຳໃຊ້ ທຸກການເຂົ້າຮ່ວມງານວາງສະແດງ ເພື່ອເປັນບ່ອນພົບປະທຸລະກິດລາວກັບຕ່າງປະເທດ, ສ້າງເປັນເວທີໃຫ້ສິນຄ້າລາວໄດ້ມີການຈຳຫນ່າຍ ແລະ ສ້າງໃຫ້ມີໂອກາດໃນການພົບຄູ່ຄ້າ ແລະ ຄູ່ພັດທະນາຮ່ວມກັນ, ເປັນຕົ້ນ ການເຂົ້າຮ່ວມງານວາງສະແດງໂລກ ກໍ່ໄດ້ເຮັດໃຫ້ທຸລະກິດລາວ ໂດຍສະເພາະ ສະພາການຄ້າ ແລະ ອຸດສາຫະກຳ ແຫ່ງຊາດ ໄດ້ມີໂອກາດເຊັນບົດບັນທຶກການຮ່ວມມືເຮັດທຸລະກິດຮ່ວມກັນ ກັບ ສະພາການຄ້າປະເທດໂປແລນ ພາຍໃຕ້ການຮ່ວມມືຂອງ ປະເທດອາລັບ, ຖືວ່າເປັນການເຊັນສັນຍາທີ່ເຮັດໃຫ້ ສປປ ລາວ ສາມາດເຂົ້າຕະຫລາດ ທັງເອີຣົບ ແລະ ອາລັບ; ສ້າງສິ່ງອໍານວຍຄວາມສະດວກ, ສະໜອງທຶນຈາກກອງທຶນສົ່ງເສີມ SME ແລະ ຈາກແຫຼ່ງອື່ນໆຈໍານວນໜຶ່ງ ແລະ ສ້າງ​ຄວາມ​ເຂັ້ມ​ແຂງ​ໃຫ້ SME ໃນ​ການ​ເຂົ້າເຖີງ​ແຫຼ່ງ​ທຶນ ໂດຍ​ສະ​ເພາະ​​ການ​ຝຶກ​ອົບ​ຮົມ ແລະ ການ​ແນ​ະ​ນຳ​ສ້າງ​ແຜນ​ທຸ​ລະ​ກິດ, ການ​ວາງ​ແຜນ​ການ​ເງິນ ແລະ ການ​ຖື​ບັນ​ຊີ​ຢູ່​ທຸກ​ແຂວງ​ໃນ​ຂອບເຂດ​ທົ່ວ​ປະ​ເທດ ແລະ ສາມາດເພີ່ມ​ຈໍາ​ນວນ​ຜູ້​ປະ​ກອບ​ກິດ​ຈະ​ການ SME ໃຫ້​​ຂະຫ​ຍາຍ​ຕົວຫຼາຍຂຶ້ນ.

        ໃນໂອກາດນີ້ ທ່ານ ປອ ຄໍາແພງ ໄຊສົມແພງ ກໍຕາງໜ້າໃຫ້ກະຊວງອຸດສາຫະກຳ ແລະ ການຄ້າ ມອບ:​ 1) ມອບເງິນຈໍານວນ 5.000.000 ກີບ ເພື່ອຊ່ວຍເຫຼືອ ໃຫ້ແກ່ພະແນກ ອຄ ແຂວງຜົ້ງສາລີ ນໍາໃຊ້ເຂົ້າໃນການຕ້ານ​ ແລະ ສະກັດກັ້ນ ການລະບາດຂອງພະຍາດໂຄວິດ-19; 2) ມອບເສື້ອ 30 ຜືນ, ຖົງຜ້າ 30 ຖົງ, ປາກກາ 50 ກ້ານ, ແລະ ປື້ມຄູ່ມື ກອງທຶນສົ່ງເສີມທຸລະກິດ ຂະໜາດນ້ອຍ ແລະ ຂະໜາດກາງ (SMEs) ຈໍານວນ 100 ຫົວ, ຈອກ ແລະ ຄັນຮົ່ມ 10 ຊຸດ; ແລະ 3) ມອບປຶ້ມແຜນຍຸດທະສາດພັດທະນາຊັບພະຍາກອນມະນຸດ ຂອງຂະແໜງອຸດສາຫະກໍາ ແລະ ການຄ້າ ປີ 2021-2025 ແລະ ວິໄສທັດຮອດປີ 2030 ຈໍານວນ 09 ຫົວໃຫ້ພະແນກ ອຄ ແຂວງ ແລະ ບັນດາຫ້ອງການ ອຄ ເມືອງ ເພື່ອນໍາໄປຜັນຂະຫຍາຍຈັດຕັ້ງປະຕິບັດໃຫ້ເກີດປະໂຫຍດສູງສຸດ. 

        ຫຼັງຈາກນັ້ນ, ທ່ານ ປອ ຄໍາແພງ ໄຊສົມແພງ, ກໍໄດ້ເຂົ້າຮ່ວມພິທີ ມອບໃບອະນຸຍາດນໍາໃຊ້ກາໝາຍ ໜຶ່ງເມືອງ ໜຶ່ງຜະລິດຕະພັນ ODOP ແຫ່ງຊາດໃຫ້ກັບຫົວໜ່ວຍທຸລະກິດ ໝາກຂາມປ້ອມອົບແຫ້ງ ແກ້ວສະຫວັນ ຂອງແຂວງຜົ້ງສາລີ.

ແຫລ່ງຂ່າວ: ຫ້ອງການ ກະຊວງ ອຄ

ຮຽບຮຽງໂດຍ: