ໃນວັນທີ 16 ມີນາ 2022, ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ຕາງໜ້າລັດຖະມົນຕີເສດຖະກິດອາຊຽນຂອງ ສປປ ລາວ ນໍາພາຄະນະຜູ້ແທນຂອງ ສປປ ລາວ ເຂົ້າຮ່ວມກອງປະຊຸມທາງໄກລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 28 ແລະ ກອງປະຊຸມກ່ຽວຂ້ອງ ທີ່ ກະຊວງອຸດສາຫະກໍາ ແລະ ການຄ້າ. ກອງປະຊຸມຄັ້ງນີ້ ພາຍໃຕ້ການເປັນປະທານຂອງ ທ່ານ Pan Sorasak, ລັດຖະມົນຕີ ກະຊວງການຄ້າ ກໍາປູເຈຍ ໂດຍມີບັນດາລັດລັດຖະມົນຕີເສດຖະກິດອາຊຽນ ແລະ ເລຂາທິການໃຫຍ່ອາຊຽນ ເຂົ້າຮ່ວມ.

             ຈຸດປະສົງຂອງກອງປະຊຸມດັ່ງກ່າວແມ່ນເພື່ອປຶກສາຫາລື ແລະ ບັນຫາສໍາຄັນຕ່າງໆເພື່ອຊຸກຍູ້ໃຫ້ບັນດາໜ້າວຽກພາຍໃຕ້ເສົາຄໍ້າເສດຖະກິດສໍາເລັດຕາມເປົ້າໝາຍທີ່ວາງໄວ້ ໂດຍສະເພາະບັນຫາສໍາຄັນແມ່ນ  ລັດຖະມົນຕີເສດຖະກິດອາຊຽນໄດ້ຮັບຮອງເອົາເອກະສານຄື: 1) ແຜນວຽກບູລິມະສິດປະຈໍາປີ 2022 ຂອງບັນດາໜ່ວຍງານພາຍໃຕ້ຄວາມຮັບຜິິດຊອບລັດຖະມົນຕີເສດຖະກິດອາຊຽນ; 2) ແຜນວຽກບູລິມະສິດພາຍໃຕ້ເສົາຄໍ້າເສດຖະກິດທີ່ສະເໜີໂດຍກໍາປູເຈຍໃນນາມປະທານອາຊຽນປີ 2022 ຈໍານວນ 19 ແຜນວຽກ ທີ່ຈະເລັ່ງໃຫ້ສໍາເລັດພາຍໃນປີນີ້ ພາຍໃຕ້ຄໍາຂວັນ “ອາຊຽນ ແກ້ໄຂສິ່ງທ້າທາຍຮ່ວມກັນ” ຊຶ່ງບັນດາແຜນວຽກດັ່ງກ່າວນັ້ນ ໄດ້ເນັ້ນໃສ່ປັບປຸງການເຊື່ອມຈອດດີຈີຕອນ, ວິທະຍາສາດ ແລະ ເຕັກໂນໂລຊີ; ຮັດແຄບຊ່ອງວ່າງຄວາມແຕກໂຕນດ້ານການພັດທະນາເພື່ອຄວາມສາມາດດ້ານການແຂ່ງຂັນຂອງອາຊຽນ; ແລະ ສົ່ງເສີມພາກພື້ນອາຊຽນໃຫ້ມີການເຊື່ອມໂຍງ, ທົ່ວເຖິງ, ສາມາດປັບຕົວ ແລະ ມີຄວາມສາມາດແຂ່ງຂັນຫຼາຍຂຶ້ນ; ແລະ 3) ເພື່ອກະກຽມໃຫ້ແກ່ການຍົກລະດັບສັນຍາການຄ້າດ້ານສິນຄ້າອາຊຽນ ໃຫ້ສືບຕໍ່ອໍານວຍຄວາມສະດວກແກ່ການຄ້າໃນພາກພື້ນ ກອງປະຊຸມໄດ້ຮັບຮອງເອົາເອກະສານຫຼັກການລວມ ແລະ ພາລະບົດບາດຂອງຄະນະກໍາມະການເຈລະຈາ ພ້ອມທັງປະກາດເລີ່ມການເຈລະຈາຍົກລະດັບສັນຍາດັ່ງກ່າວ.

        ກອງປະຊຸມໄດ້ປຶກສາຫາລື ແລະ ແລກປ່ຽນທັດສະນະໃນຫຼາຍປະເດັນທີ່ສໍາຄັນ ເຊັ່ນ: ຄວາມຄືບໜ້າການຈັດຕັ້ງປະຕິບັດແຜນຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ-19 ຂອງບັນດາປະເທດສະມາຊິກອາຊຽນ, ການກະກຽມຍົກລະດັບສັນຍາການຄ້າດ້ານສິນຄ້າລະຫວ່າງອາຊຽນ-ອິນເດຍ; ແລະ ທິດທາງໃນການການຮ່ວມມືເສດຖະກິດກັບພາຍນອກ ແລະ ການຍົກລະດັບສັນຍາການຄ້າເສລີກັບບັນດາປະເທດຄູ່ຮ່ວມເຈລະຈາ.

            ກອງປະຊຸມຄັ້ງນີ້ຍັງໄດ້ເຫັນດີໃຫ້ຂະຫຍາຍເວລາໃນການຈັດຕັ້ງປະຕິບັດ ບົດບັນທຶກຄວາມເຂົ້າໃຈ ວ່າດ້ວຍການຈັດຕັ້ງປະຕິບັດມາດຕະການທີ່ບໍ່ແມ່ນພາສີຕໍ່ສິນຄ້າຈຳເປັນພາຍໃຕ້ແຜນປະຕິບັດງານຮ່າໂນ້ຍ ວ່າດ້ວຍການສ້າງຄວາມເຂັ້ມແຂງໃນການຮ່ວມມືເສດຖະກິດອາຊຽນ ແລະ ການເຊື່ອມຈອດຕ່ອງໂສ້ການສະໜອງເພື່ອຮັບມືກັບການລະບາດຂອງໂຄວິດ-19 ໄປຮອດເດືອນພະຈິກ 2024 ແລະ ເຫັນດີໃຫ້ເພີ່ມລາຍການສິນຄ້າທີ່ຈໍາເປັນ ໂດຍສະເພາະສິນຄ້າປະເພດສະບຽງອາຫານ ແລະ ສິນຄ້າກະສິກໍາ ເຂົ້າໃນບົດບັນທຶກຄວາມເຂົ້າໃຈດັ່ງກ່າວ ເພື່ອອໍານວຍຄວາມສະດວກໃຫ້ແກ່ການຄ້າ ແລະ ບໍ່ໃຫ້ມີການກໍານົດມາດຕະການກີດຂວາງການໄຫຼວຽນຂອງສິນຄ້າພາຍໃນອາຊຽນດ້ວຍກັນ.

          ພ້ອມກັນນີ້, ບັນດາລັດຖະມົນຕີເສດຖະກິດອາຊຽນ ຍັງໄດ້ພົບປະກັບສະພາທີ່ປຶກສາທຸລະກິດອາຊຽນ ເພື່ອຮັບຊາບຄວາມຄືບໜ້າການຮ່ວມມືລະຫວ່າງພາກລັດ ແລະ ພາກທຸລະກິດເພື່ອປະກອບສ່ວນເຂົ້າໃນການຈັດຕັ້ງປະຕິບັດບັນດາໜ້າວຽກເພື່ອບັນລຸເປົ້າໝາຍປະຊາຄົມເສດຖະກິດອາຊຽນ 2025 ແລະ ການຜັນຂະຫຍາຍຂໍ້ລິເລີ່ມຂອງອາຊຽນ ໂດຍສະເພາະໃນການຟື້ນຟູເສດຖະກິດພາຍຫຼັງການລະບາດຂອງພະຍາດໂຄວິດ-19 ແລະ ການຮັບມືກັບກາລະໂອກາດ ແລະ ສິ່ງທ້າທາຍຕໍ່ພາກທຸລະກິດ ຈາກການຫັນເປັນດີຈີຕອນ ເພື່ອປະກອບສ່ວນເຂົ້າໃນຕ່ອງໂສ້ການສະໜອງຂອງພາກພື້ນ ແລະ ຂອງໂລກ.

ພາບ-ຂ່າວ:  ໄດ້ມາຈາກ ກົມການຄ້າການຕ່າງປະເທດ ກະຊວງ ອຄ.

ຮຽບຮຽງ: ໄພຄໍາອີ