ວັນທີ 29 ມີນາ 2022, ເວລາ 15:30 ໂມງ ທີ່ຫ້ອງປະຊຸມທາງໄກ ຊັ້ນ 3 ກະຊວງອຸດສາຫະກຳ ແລະ ການຄ້າ, ໄດ້ຈັດກອງປະຊຸມປຶກສາຫາລື ວຽກງານການຄ້າໃນໄລຍະຜ່ານມາ ຜ່ານລະບົບກອງປະຊຸມທາງໄກ ລະຫວ່າງ ທ່ານ ປອ. ຄໍາແພງ ໄຊສົມແພງ ລັດຖະມົນຕີກະຊວງ ອຄ ແຫ່ງ ສປປ ລາວ ກັບ ທ່ານ ຈຸລິນ ລັກສະນະວິສິດ, ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງພານິດ ແຫ່ງຣາຊະອານາຈັກໄທ ພ້ອມ​ດ້ວຍ​ຄະນະກົມກ່ຽວຂ້ອງຂອງກະຊວງພານິດໄທ ແລະ ທີ່ປຶກສາທູດເສດຖະກິດ ແລະ ການຄ້າ ແຫ່ງຣາຊະອານາຈັກໄທປະຈໍາ ສປປ ລາວ, ​ ຝ່າຍລາວມີ ຕາງຫນ້າຈາກກົມກ່ຽວຂ້ອງ ຂອງກະຂວງອຸດສາຫະກຳ ແລະ ການຄ້າ ຊຶ່ງມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 15 ທ່ານ.      ຈຸດປະສົງຂອງກອງປະຊຸມຄັ້ງນີ້ ແມ່ນການປຶກສາຫາລື ແລະ ຍົກບັນຫາກ່ຽວກັບການຄ້າໃນໄລຍະຜ່ານມາ ແລະ ວຽກງານຈະຮ່ວມມືກັນໃນປີ 2022 ແລະ ໃນອະນາຄົດ ຊຶ່ງທາງທ່ານ ລັດຖະມົນຕີ ກະຊວງ ອຄ ແຫ່ງ ສປປ ລາວໄດ້ມີຄໍາເຫັນຕໍ່ 04 ບັນຫາທີ່ທາງຝ່າຍໄທ ໄດ້ປະສານມາກ່ອນໜ້າ ຄື: 1/ ຜັກດັນການເປີດດ່ານ ເພື່ອການຂົນສົ່ງສິນຄ້າ ລະຫວ່າງກັນ: ຂໍໃຫ້ ສປປ ລາວ ເປີດດ່ານທີ່ປິດໄປ ຕາມມາດຕະການຄວບຄຸມໂຄວິດ-19 ໃຫ້ສາມາດຂົນສົ່ງສິນຄ້າລະຫວ່າງກັນໄດ້ ເພື່ອບັນລຸເປົ້າໝາຍເພີ່ມມູນຄ່າການຄ້າ 11.000 ລ້ານໂດລາສະຫະລັດ ໃນປີ 2025; 2/ ອໍານວຍຄວາມສະດວກທາງດ້ານການຄ້າ ບໍລິເວນດ່ານຊາຍແດນ: ຂໍໃຫ້ ສປປ ລາວ ອຳນວຍຄວາມສະດວກ ເລື່ອງການຜ່ານພິທີການກົມພາສີປະຈຳດ່ານຊາຍແດນ ເຊັ່ນ: ສາມາດອະນຸມັດເອກະສານຮັບຮອງແຫຼ່ງກຳເນີດສິນຄ້າ ຫລື ຟອມ(Form D)ໄດ້ໂດຍບໍ່ຕ້ອງມາຜ່ານກົມພາສີ ທີ່ນະຄອນຫຼວງວຽງຈັນ ເຮັດໃຫ້ຊັກຊ້າ ແລະ ຖ້າ ສປປ ລາວ ສາມາດເຊື່ອມຕໍ່ລະບົບຮັບ-ສົ່ງເອກະສານແບບເອເລັກໂຕນິກ (e-form D) ໄດ້ຕາມທີ່ຕົກລົງກັນໄວ້ກັບອາຊຽນ ASEAN Single Window  ຈະຊ່ວຍແກ້ໄຂບັນຫານີ້ໄດ້ເຊັ່ນກັນ; 3/ ການແກ້ໄຂບັນຫາຈຸດປ່ອຍລົດຂົນສົ່ງສິນຄ້າຜ່ານແດນ ຊັກຊ້າບໍລິເວນດ່ານບໍ່ເຕັນ-ບໍ່ຫານ. 4/ ລົດໄຟ ລາວ-ຈີນ: ຊ່ວຍອຳນວຍຄວາມສະດວກໃນການຂົນສົ່ງສິນຄ້າ ໂດຍສະເພາະໝາກໄມ້ຂອງໄທ ໄປຍັງ ສປ ຈີນ ໂດຍໃຊ້ເສັ້ນທາງລົດໄຟ ໄທ-ລາວ-ຈີນ ດ້ວຍ.

     ພ້ອມນີ້ ຍັງໄດ້ສະເໜີສົນທະນາແລກປ່ຽນ ແລະ ຂໍການແກ້ໄຂ ຈາກຝ່າຍໄທພິຈາລະນາໃຫ້ການອຳນວຍຄວາມສະດວກ ຕື່ມອີກ ເປັນຕົ້ນ:

1/ ການສົ່ງອອກສາລີ ໄດ້ຮັບຜົນກະທົບຈາກມາດຕະການທີ່ບໍ່ແມ່ນພາສີ ຈາກຝ່າຍໄທນັບແຕ່ປີ 2010 ເປັນຕົ້ນມາ, ຊື່ງໄດ້ຖືກຈໍາກັດລະດູການໃນການນໍາເຂົ້າສາລີ ຈາກ ສປປ ລາວ ໂດຍກໍານົດການນຳເຂົ້າສາລີ ພຽງແຕ່ 07 ເດືອນ/ປີ ຊຶ່ງເລີ່ມແຕ່ວັນທີ 01 ກຸມພາ ຫາ ວັນທີ 31 ສິງຫາ ຂອງທຸກປີ ຊຶ່ງເປັນອຸປະສັກ ແລະ ເພີ່ມຕົ້ນທຶນໃຫ້ແກ່ຜູ້ປະກອບການຫຼາຍຂຶ້ນ ແລະ ໃນທີ່ສຸດຜູ້ປະກອບການກໍ່ຫັນຈາກການປູກສາລີໄປປູກພືດອື່ນທີ່ເສດຖະກິດກວ່າ ແລະ ເຮັດໃຫ້ຜົນຜະລິດສາລີໜ້ອຍລົງ. ອີງຕາມສະຖິຕິການສົ່ງອອກສາລີໄປໄທ ແມ່ນນັບມື້ນັບໜ້ອຍລົງ, ໃນປີ 2013 ບັນລຸເຖິງ 126.903 ໂຕນ ເທົ່າກັບ 40.581.009 ໂດລາສະຫະລັດປະຈຸບັນເຫຼືອພຽງ 22.030 ໂຕນ ເທົ່າກັບ 2.670.900 ໂດລາສະຫະລັດ.

2/ ການນໍາເຂົ້າກາເຟເມັດດິບ ແລະ ກາເຟຂົ້ວ ຈາກລາວໄປໄທ ເຫັນວ່າ ມີກຳແພງ ທີ່ບໍ່ແມ່ນອັດຕາພາສີ ໂດຍສະເພາະແມ່ນການຈຳກັດປະລິມານທາງອ້ອມ ດ້ວຍການແບ່ງປັນໂຄຕ້ານຳເຂົ້າໃຫ້ຜູ້ປະກອບການທີ່ມີເງື່ອນໄຂ ຊື່ງເຫັນວ່າບໍ່ທັນສອດຄ່ອງກັບເງື່ອນໄຂສັນຍາການຄ້າດ້ານສິນຄ້າອາຊຽນ ສະເຫນີຝ່າຍໄທ ພິຈາລະນາ ແລະ ແກ້ໄຂ ຕາມທາງຄວນດ້ວຍ.

3/ ສະເໜີຝ່າຍໄທ ຊ່ວຍແກ້ໄຂບັນຫາການນຳເຂົ້ານໍ້າມັນປາມ ຈາກ ປະເທດມາເລເຊຍ ມາຜ່ານແດນໄທ ເພື່ອນຳເຂົ້າ ສປປ ລາວ ໂດຍບໍ່ຈຳກັດປະລິມານ ແລະ ດ່ານ ທີ່ຈະນຳເຂົ້າ ແລະ ສົ່ງຕໍ່ມາ ສປປ ລາວ ເພື່ອເປັນການປະຢັດເວລາ ແລະ ປະຢັດຕົ້ນທຶນໃນການຂົນສົ່ງໃຫ້ພາກທຸລະກິດ.

4/ ການອຳນວຍຄວາມສະດວກໃນການສົ່ງອອກມັນຕົ້ນໄປໄທ ຈາກແຂວງສາລະວັນ ຢູ່ດ່ານຖາວອນບ້ານປາກແຊງ, ຈັງຫວັດອຸບົນຣາຊະທານີ.

     ສໍາລັບ ທ່ານ ຈຸລິນ ລັກສະນະວິສິດ, ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງພານິດ ແຫ່ງຣາຊະອານາຈັກໄທ ໄດ້ສະເໜີປຶກສາຫາລື ກ່ຽວກັບການເປີດດ່ານເພື່ອອໍານວຍຄວາມສະດວກໃນການຂົນສົ່ງສິນຄ້າ ອີກ 9 ດ່ານປະເພນີ ຫລື ດ່ານທ້ອງຖິ່ນທີ່ໄດ້ປິດລົງ ເນື່ອງຈາກສະພາບການລະບາດພະຍາດໂຄວິດ-19; ການແກ້ໄຂບັນຫາຈຸດປ່ອຍລົດຂົນສົ່ງສິນຄ້າຜ່ານແດນຊັກຊ້າບໍລິເວນດ່ານບໍ່ເຕັນ-ບໍ່ຫານ ທີ່ມີການປ່ຽນຖ່າຍຫົວລາກລົດກ່ອນຜ່ານໄປຈີນ ຊຶ່ງທາງຝ່າຍລາວມີຫົວລາກລົດໜ້ອຍບໍ່ພຽງພໍກັບຄວາມຕ້ອງການ ຂອງບໍລິສັດເບື້ອງໄທ.    

    ທັງສອງຝ່າຍໄດ້ຮັບຮູ້ບັນຫາຊຶ່ງກັນ ແລະ ກັນ ແລະ ຈະນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ນໍາສະເໜີຕໍ່ຄະນະລັດຖະບານຂອງຕົນ ເພື່ອພິຈາລະນາແກ້ໄຂໃນຂັ້ນຕໍ່ໄປ.      ຕອນທ້າຍ ທ່ານ ລັດຖະມົນຕີ ກະຊວງ ອຄ ໄດ້ສະແດງຄວາມຂອບໃຈຕໍ່ຄຳເວົ້າອັນຈົບງາມຂອງທ່ານ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງພານິດແຫ່ງຣາຊະອານາຈັກໄທ ຕໍ່ການພົວພັນການຄ້າຂອງສອງປະເທດ, ເຊື່ອໝັ້ນວ່າ ດ້ວຍບົດຮຽນອັນອຸດົມສົມບູນຂອງທ່ານຮອງນາຍົກ ແລະ ການເຮັດວຽກຮ່ວມກັນຢ່າງໃກ້ຊິດຂອງສອງຊາດລາວ-ໄທ ຈະສືບຕໍ່ໄດ້ຮັບການເສີມຂະຫຍາຍ ໃຫ້ມີຫມາກຜົນຍິ່ງໆຂຶ້ນ. ພ້ອມທັງອວຍພອນໃຫ້ການພົວພັນມິດຕະພາບ ແລະ ການຮ່ວມມືລາວ-ໄທ ທີ່ມີມູນເຊື້ອຈົ່ງໄດ້ຮັບການພັດທະນາຢ່າງຫມັ້ນຄົງ ແລະ ເຂົ້າສູ່ລວງເລິກ; ເນື່ອງໃນໂອກາດປີໃໝ່ລາວ ແລະ ໄທ ທີ່ຈະມາເຖິງນີ້ ຂໍອວຍພອນໃຫ້ ທ່ານ ຮອງນາຍົກລັດຖະມົນຕີ ຈຸລິນ ລັກສະນະວິສິດ ພ້ອມຄອບຄົວ ຈົ່ງມີແຕ່ຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານ ທີ່ຍິ່ງໃຫຍ່ກວ່າເກົ່າ.

ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ