ໃນວັນທີ 5 ເມສາ 2022, ທີ່ຫ້ອງປະຊຸມຊັ້ນ 3 ກະຊວງອຸດສາຫະກຳ ແລະ ການຄ້າ ໄດ້ຈັດພິທີເຊັນບົດບັນທຶກກອງປະຊຸມຂັ້ນລັດຖະມົນຕີ ລະຫວ່າງ ທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານລັດຖະມົນຕີ ກະຊວງກະສິກຳ ແລະ ປ່າໄມ້ ໂດຍມີຕາງໜ້າຈາກກົມວິຊາການ ຂອງສອງກະຊວງເຂົ້າ​ຮ່ວມ ປະມານ 11 ທ່ານ, ຍິງ 01 ທ່ານ.

     ຈຸດ​ປະ​ສົງເພື່ອສືບຕໍ່ປຶກສາຫາລື ກ່ຽວກັບການມອບ-ຮັບ ວຽກງານປຸງແຕ່ງກະສິກຳ ແລະ ປ່າໄມ້ ລະຫວ່າງກະຊວງອຸດສາຫະກຳ ແລະ ການຄ້າ ແລະ ກະຊວງກະສິກຳ ແລະ ປ່າໄມ້, ຄັ້ງວັນທີ 11 ພະຈິກ 2021 ຕາມດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງກະສິກໍາ ແລະ ປ່າໄມ້ ສະບັບເລກທີ 603​/ນຍ, ລົງວັນທີ 15 ຕຸລາ 2021 ແລະ ດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງອຸດສາຫະກຳ ແລະ ການຄ້າ ສະບັບເລກທີ 604/ນຍ, ລົງວັນທີ 15 ຕຸລາ 2021.

     ໂດຍສອງກະຊວງ ຕົກລົງເຫັນດີເປັນເອກະພາບ ກ່ຽວກັບການມອບ-ຮັບວຽກງານປຸງແຕ່ງກະສິກໍາ ແລະ ປ່າໄມ້ໃຫ້ກະຊວງກະສິກໍາ ແລະ ປ່າໄມ້ ດັ່ງນີ້:

-        ເປັນຜູ້ຄຸ້ມຄອງ, ຊຸກຍູ້, ສົ່ງເສີມ, ພັດທະນາ ໂຮງງານອຸດສາຫະກໍາປຸງແຕ່ງກະສິກໍາ ແລະ ປ່າໄມ້ ເຊັ່ນ: ການອອກອະນຸຍາດສ້າງຕັ້ງໂຮງງານ ລວມມີ: ບົດວິພາກເສດຖະກິດ-ເຕັກນິກ ແລະ ອອກໃບຢັ້ງຢືນດໍາເນີນກິດຈະການໂຮງງານ, ມາດຕະຖານໂຮງງານ, ປະຕິບັດມາດຕະຖານຫລັກການຜະລິດທີ່ດີ (GMP), ການຄຸ້ມຄອງຂອງຜະລິດຕະພັນ; ການໂຈະ, ຖອນ, ຍົກເລີກ ໃບຢັ້ງຢືນດໍາເນີນກິດຈະການໃນ 11 ລາຍການຂອງດຳລັດ 603/ນຍ;

-        ການຈັດຕັ້ງກຳລັງການຜະລິດ, ພັດທະນາການຜະລິດ, ຄຸ້ມຄອງການຜະລິດຕາມທິດຫັນເປັນທັນສະໄໝ;

-        ຊຸກຍູ້, ສົ່ງເສີມການຜະລິດເປັນວັດຖຸດິບ, ຄຸນນະພາບຂອງຜົນຜະລິດ, ການຄຸ້ມຄອງວັດຖຸດິບສົ້ນເຂົ້າ, ການຄຸ້ມຄອງຜະລິດຕະພັນສົ້້ນອອກ;

-        ເປັນຜູ້ເຈລະຈາ ທາງດ້ານສຸຂະນາໄມພືດ ແລະ ສັດ (SPS) ເພື່ອເປີດຕະຫລາດ, ຄວບຄຸມດ້ານເຕັກນິກ ໃຫ້ໄປຕາມມາດຕະຖານປະເທດຄູ່ຄ້າ, ມາດຕະຖານຂອງແຕ່ລະປະເທດ ແລະ ເງື່ອນໄຂຕາມສົນທິສັນຍາ ແລະ ສັນຍາສາກົນ ທີ່ ສປປ ລາວ ເປັນພາຄີ ເຊັ່ນ: ມາດຕະຖານການປູກ; ຢັ້ງຢືນເຂດການຜະລິດ, ແນວພັນ, ຖິ່ນກໍາເນີດ, ມາດຕະຖານການຜະລິດ, ຢັ້ງຢືນພະຍາດຕ່າງໆ, ແມງໄມ້-ສັດຕູພືດ, ສານເຄມີຕົກຄ້າງ, ເຕັກນິກການຜະລິດ, ການປະສົມປຸ໋ຍຕ່າງໆ;

-        ປະສານສົມທົບກັບກະຊວງອຸດສາຫະກໍາ ແລະ ການຄ້າ ໃນການຈັດຕັ້ງປະຕິບັດວຽກງານປຸງແຕ່ງກະສິກໍາ ແລະ ປຸງແຕ່ງໄມ້ ເພື່ອໃຫ້ວຽກງານສາມາດດໍາເນີນໄປຢ່າງເປັນລະບົບ, ຖືກຕ້ອງ ແລະ ສອດຄ່ອງກັບດໍາລັດ ຂອງສອງກະຊວງ.

-        ປະຕິບັດສິດ ແລະ ຫນ້າທີ່ອື່ນໆ ຕາມທີ່ກຳນົດໄວ້ໃນດຳລັດສະບັບເລກທີ 603/ນຍ.

*        ກ່ຽວກັບການຄຸ້ມຄອງມະຫາພາກ ມອບໃຫ້ກະຊວງອຸດສາຫະກຳ ແລະ ການຄ້າ ດັ່ງນີ້:

-        ເປັນຜູ້ຄຸ້ມຄອງມະຫາພາກ ເຊັ່ນ: ການຂຶ້ນທະບຽນວິສາຫະກິດ, ຕິດຕາມ ກວດກາ ມາດຕະຖານເຕັກນິກໂຮງງານ ຄວາມປອດໄພ, ສຸຂະນາໄມແຮງງານ ແລະ ສິ່ງແວດລ້ອມໂຮງງານ, ສົ່ງເສີມການປະຕິບັດຫລັກການຜະລິດທີ່ດີ (GMP), ມາດຕະຖານສິນຄ້າ ທີ່ຊົມໃຊ້ພາຍໃນ ແລະ ສົ່ງອອກຕ່າງປະເທດ;

-        ເປັນຜູ້ເຈລະຈາ ກ່ຽວກັບໂກຕ້າສົ່ງອອກຜະລິດຕະພັນກະສິກໍາ (ພືດ-ສັດ) ແລະ ຜະລິດຕະພັນປຸງແຕ່ງ;

-        ປະສານສົມທົບກັບກະຊວງກະສິກໍາ ແລະ ປ່າໄມ້ ໃນການຈັດຕັ້ງປະຕິບັດວຽກງານປຸງແຕ່ງກະສິກໍາ ແລະ ປຸງແຕ່ງໄມ້ ເພື່ອໃຫ້ວຽກງານສາມາດດໍາເນີນໄປຢ່າງເປັນລະບົບ, ຖືກຕ້ອງ ແລະ ສອດຄ່ອງກັບດໍາລັດ ຂອງສອງກະຊວງ;

-        ແລກປ່ຽນນິຕິກຳ ແລະ ຂໍ້ມູນສະຖິຕິ ຕ່າງໆ ທີ່ກ່ຽວຂ້ອງກັບວຽກປຸງແຕ່ງ ກະສິກຳ ແລະ ປ່າໄມ້ ຮ່ວມກັບ ກະຊວງກະສິກຳ ແລະ ປ່າໄມ້;

-        ປະຕິບັດສິດ ແລະ ຫນ້າທີ່ອຶ່ນໆ ຕາມທີ່ກຳນົດໄວ້ໃນດຳລັດສະບັບເລກທີ 604/ນຍ.     

      ພ້ອມດຽວກັນນີ້, ສອງກະຊວງ ຍັງເຫັນດີໃຫ້ຂະແໜງການຂອງຕົນຢູ່ຂັ້ນທ້ອງຖິ່ນ ດຳເນີນການມອບ-ຮັບວຽກງານປຸງແຕ່ງກະສິກຳ ແລະ ປ່າໄມ້ ຢ່າງຂາດຕົວ ຕາມເນື້ອໃນຂອງບົດບັນທຶກມອບ-ຮັບ ວຽກງານປຸງແຕ່ງກະສິກຳ ແລະ ປ່າໄມ້ ລະຫວ່າງ ກະຊວງອຸດສາຫະກຳ ແລະ ການຄ້າ ແລະ ກະຊວງກະສິກຳ ແລະ ປ່າໄມ້, ຄັ້ງວັນທີ 11 ພະຈິກ 2021 ແລະ ເນື້ອໃນບົດບັນທຶກພົບປະຄັ້ງນີ້.

 ຮູບພາບໂດຍ: ຫ້ອງການກະຊວງ ອຄ

ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ