ໂດຍໄດ້ຮັບການຕົກລົງເຫັນດີ ຈາກລັດຖະບານ ຂອງທັງສອງປະເທດ ແລະ ປະຕິບັດຕາມເນື້ອໃນບົດບັນທຶກກອງປະຊຸມ ການຮ່ວມມືພັດທະນາການຄ້າຊາຍແດນ ລາວ – ຫວຽດນາມ ຄັ້ງທີ XI ແລະ ແຜນການຮ່ວມມື ລະຫວ່າງ ສອງກະຊວງອຸດສາຫະກຳ ແລະ ການຄ້າ ລາວ – ຫວຽດນາມ ປະຈໍາປີ 2022. ໃນວັນທີ 11 ເມສາ 2022 ທີ່ໂຮງແຮມ ຄລາວພລາຊາ, ນະຄອນຫຼວງວຽງຈັນ ສປປ ລາວ, ສອງກະຊວງອຸດສາຫະກຳ ແລະ ການຄ້າ ລາວ – ຫວຽດນາມ ໄດ້ຮ່ວນກັນຈັດກອງປະຊຸມການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງທີ XII ຂຶ້ນ ໂດຍການເປັນປະທານ ຮ່ວມ ລະຫວ່າງ ທ່ານ ປອ ຄໍາແພງ ໄຊສົມແພງ, ກໍາມະການສູນກາງພັກ, ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ຫງຽນ ຮົງ ຢຽນ, ກໍາມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ສສ ຫວຽດນາມ, ກອງປະຊຸມຄັ້ງນີ້ ມີຜູ້ແທນຂັ້ນສູງຂອງສອງກະຊວງ ອຸດສາຫະກຳ ແລະ ການຄ້າ, ພະແນກອຸດສາຫະກຳ ແລະ ການຄ້າ ບັນດາແຂວງທີ່ມີຊາຍແດນຕິດຈອດລາວ-ຫວຽດນາມ, ນັກທຸລະກິດ ແລະ ພາກສ່ວນທີ່ກ່ຽວຂ້ອງຂອງສອງປະເທດເຂົ້າຮ່ວມ.
ໂດຍປົກກະຕິແລ້ວ ກອງປະຊຸມດັ່ງກ່າວ ແມ່ນຈະໄດ້ຈັດຂຶ້ນໃນທຸກໆ 2 ປີ ເຊິ່ງຈະຜັດປ່ຽນກັນເປັນເຈົ້າພາບ, ຄັ້ງລ່າສຸດແມ່ນຄັ້ງທີ XI ທີ່ໄດ້ຈັດຂຶ້ນທີ່ ແຂວງກວາງບິງ ສສ ຫວຽດນາມ ໃນລະຫວ່າງວັນທີ 26-28 ກັນຍາ 2018, ແຕ່ຍ້ອນສະພາບການແຜ່ລະບາດຂອງພະຍາດໂຄວິດ 19 ໄດ້ເຮັດໃຫ້ການຈັດກອງປະຊຸມດັ່ງກ່າວ ຕ້ອງໄດ້ຖືກຖິ້ມໄລຍະຫ່າງມາເຖິງ 4 ປີ; ເຖິງຢ່າງໃດກໍ່ຕາມ ຍ້ອນເຫັນໄດ້ຄວາມຈໍາເປັນອັນຮີບດ່ວນຂອງວຽກງານ ສອງກະຊວງ ໄດ້ເປັນເອກະພາບສູງຮ່ວມກັນຕັດສິນໃຈຢ່າງເດັດຂາດ ເອົາວຽກງານນີ້ເຂົ້າໃນບົດບັນທຶກແຜນການເຮັດວຽກປະຈໍາປີ 2022 ແລະ ພ້ອມກັນ ສະເໜີທັງສອງລັດຖະບານ ເພື່ອອະນຸມັດຈັດກອງປະຊຸມຄັ້ງນີ້ຂຶ້ນ ເພື່ອເປັນເວທີໃຫ້ແກ່ທັງສອງຂະແໜງການອຸດສາຫະກຳ ແລະ ການຄ້າ ພາກສ່ວນກ່ຽວຂ້ອງຂອງທັງສອງປະເທດ ລາວ-ຫວຽດນາມ ຮ່ວມກັນຕີລາຄາຄືນສະພາບການຮ່ວມມືພັດທະນາການຄ້າຊາຍແດນໃນໄລຍະຜ່ານມາ ແລະ ຮ່ວມກັນປຶກສາຫາລືຊອກຫາແນວທາງໃນການແກ້ໄຂຂໍ້ໍ້ຫຍຸ້ງຍາກຕ່າງໆທີ່ເກີດຂຶ້ນໃຫ້ຫຼຸດໜ້ອຍຖອຍລົງ ພ້ອມທັງຮ່ວມກັນວາງແຜນການຮ່ວມມືໃນຕໍ່ໜ້າ ເພື່ອເຮັດຈັ່ງໃດໃຫ້ວຽກງານການຄ້າເວົ້າລວມ, ເວົ້າສະເພາະແມ່ນການຄ້າຊາຍແດນ ສາມາດປະກອບສ່ວນເຂົ້າໃນການປະຕິບັດເປົ້າໝາຍການຮ່ວມມືຮອບດ້ານຂອງສອງຊາດ ໂດຍສະເພາະແມ່ນເປົ້າໝາຍການຮ່ວມມືທາງດ້ານເສດຖະກິດ ທີ່ສອງລັດຖະບານໄດ້ກຳນົດໄວ້ ໃນກອງປະຊຸມຂອງຄະນະກໍາມະທິການຮ່ວມມືທະວິພາຄີ ຄັ້ງທີ 44 ທີ່ນະຄອນຫຼວງຮ່າໂນ້ຍ ໃນວັນທີ 10 ມັງກອນ 2022, ເນື້ອໃນສັນຍາການຮ່ວມມື 5 ປີ 2021-2025 ແລະ ຍຸດທະສາດການຮ່ວມມື 10 ປີ 2021-2030 ຂອງສອງລັດຖະບານ. ພ້ອມດຽວກັນນີ້, ກອງປະຊຸມຄັ້ງນີ້ ໄດ້ຈັດເປັນກິດຈະກໍາໜຶ່ງ ໃນການປະກອບສ່ວນເຂົ້າໃນການສະເຫຼີມສະຫຼອງປີສາມັກຄີມິດຕະພາບ ສອງວັນປະຫວັດສາດຂອງສອງຊາດ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຄົບຮອບ 60 ປີ (5/9/1962-5/9/2022).
ກອງປະຊຸມໄດ້ຕີລາຄາສູງຜົນການຮ່ວມມືພັດທະນາການຄ້າຊາຍແດນ ລະຫວ່າງ ສອງປະເທດໃນໄລຍະຜ່ານມາ ບົນພື້ນຖານການປະຕິບັດເນື້ອໃນບົດບັນທຶກກອງປະຊຸມ ຄັ້ງທີ XI; ໃນນີ້, ສອງຝ່າຍໄດ້ພ້ອມກັນຍົກເອົາວຽກງານການຄົ້ນຄວ້າປັບປຸງສັນຍາການຄ້າ ແລະ ສັນຍາການຄ້າຊາຍແດນ ເຂົ້າໃນຂອບວຽກການຮ່ວມມືທາງດ້ານເສດຖະກິດຂອງສອງລັດຖະບານ ໃນກອງປະຊຸມ ຄັ້ງທີ 42 ປີ 2020 ແລະ ຄັ້ງທີ 43 ປີ 2021 ຂອງຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ແລະ ໄດ້ຕົກລົງເຫັນດີຮ່ວມກັນຄົ້ນຄວ້າສ້າງ “ຮ່າງ” ບົດບັນທຶກຄວາມເຂົ້າໃຈ ກ່ຽວກັບການພັດທະນາ ແລະ ເຊື່ອມໂຍງພື້ນຖານໂຄງລ່າງການຄ້າຊາຍແດນ ລາວ-ຫວຽດນາມ ເຊິ່ງລວມມີ: ຕະຫຼາດຊາຍແດນ, ຕະຫຼາດນັດ, ສູນວາງສະແດງສິນຄ້າ, ຮ້ານສັບພະສິນຄ້າ, ສູນການຄ້າ… ບົນເນື້ອໃນຈິດໃຈໃນການພັດທະນາຢ່າງເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຍດໂດຍສອດຄ່ອງກັບການພັດທະນາຕົວຈິງ ໃຫ້ສໍາເລັດໃນ ປີ 2022 ນີ້. ນອກນີ້, ໃນໄລຍະຜ່ານມາ ສອງຝ່າຍໄດ້ລົງເຮັດວຽກຢູ່ບັນດາຄູ່ດ່ານ ທີ່ສຳຄັນຂອງສອງເບື້ອງລາວ ແລະ ຫວຽດນາມ ເພື່ອເປັນການຕິດຕາມ ກວດກາ ການຈັດຕັ້ງປະຕິບັດເນີ້ືອໃນ ຂໍ້ຕົກລົງ ຮ່າໂນ້ຍ 2007 ກ່ຽວກັບການອໍານວຍຄວາມສະດວກໃຫ້ແກ່ຄົນ, ພາຫະນະ ແລະ ສິນຄ້າຜ່ານດ່ານ ລະຫວ່າງ ສອງປະເທດ. ພ້ອມດຽວກັນ, ບັນດາແຂວງທີ່ມີຊາຍແດນຕິດຈອດຂອງສອງປະເທດໄດ້ມີການວາງແຜນການສ້າງ ແລະ ພັດທະນາຕາໜ່າງຕະຫຼາດຊາຍແດນ ດ້ວຍຫຼາຍຮູບແບບ ເພື່ອອຳນວຍຄວາມສະດວກໃຫ້ແກ່ການແລກປ່ຽນຊື້-ຂາຍ ຂອງປະຊາຊົນສອງຟາກຊາຍແດນ ກໍ່ຄືນັກທຸລະກິດສອງປະເທດ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດຂອງທັງສອງປະເທດເວົ້າລວມ, ເວົ້າສະເພາະແມ່ນຊີວິດການເປັນຢູ່ຂອງປະຊາຊົນບັນດາເຜົ່າ
ລຽບຕາມຊາຍແດນ ລາວ-ຫວຽດນາມ ນັບມື້ນັບດີຂຶ້ນ.
ອີງຕາມຂໍ້ມູນສະຖິຕິ ການນໍາເຂົ້າ-ສົ່ງອອກສິນຄ້າ ລະຫວ່າງ ລາວ ແລະ ຫວຽດນາມ ແຕ່ປີ 2018 ຫາປີ 2021 ເຫັນວ່າ: ມູນຄ່າການຄ້າ ສາມາດບັນລຸໄດ້ 4,5 ຕື້ ໂດລາສະຫະລັດ. ໃນນີ້, ມູນຄ່າການສົ່ງອອກ ຂອງລາວໄປຫວຽດນາມ ບັນລຸໄດ້ 2,1 ຕື້ ໂດລາສະຫະລັດ ແລະ ການນໍາເຂົ້າ ຂອງລາວຈາກຫວຽດນາມ ບັນລຸໄດ້ 2,4 ຕື້ ໂດລາສະຫະລັດ.
ກ່ອນສະພາບການແຜ່ລະບາດ ຂອງພະຍາດ ໂຄວິດ 19 ສະພາບການຄ້າສອງຝ່າຍ ລະຫວ່າງ ລາວ-ຫວຽດນາມ ແມ່ນມີການຂະຫຍາຍຕົວໄປຕາມຄາດໝາຍທີ່ສອງລັດຖະບານວາງອອກ ກໍ່ຄືສາມາດບັນລຸເປົ້າໝາຍອັດຕາການຂະຫຍາຍຕົວຂອງມູນຄ່າການຄ້າ ຢ່າງໜ້ອຍ 10%/ປີ. ແຕ່ຕົກມາຮອດປີ 2020 ມູນຄ່າການຄ້າສອງຝ່າຍໄດ້ຫຼຸດລົງ (-11,5%) ທຽບໃສ່ປີ 2019 ຍ້ອນສະພາບການແຜ່ລະບາດຂອງພະຍາດໂຄວິດ 19 ແລະ ການນໍາໃຊ້ມາດຕະການໃນການກວດກາສະກັດກັ້ນການແຜ່ລະບາດຂອງພະຍາດດັ່ງກ່າວ ເປັນຕົ້ນແມ່ນ ການປ່ຽນຄົນຂັບລົດ, ການຄ່ຽນຖ່າຍລົດ ແລະ ສິນຄ້າ ເຮັດໃຫ້ການພົວພັນໄປມາ ແລະ ການຂົນສົ່ງສິນຄ້າ ລະຫວ່າງ ສອງປະເທດຖືກຜົນກະທົບຢ່າງຮ້າຍແຮງ. ຍ້ອນເຫດການນີ້ ຈຶ່ງເຫັນໄດ້ເຖິງຈຸດອ່ອນທີ່ຈໍາເປັນຕ້ອງພ້ອມກັນປັບປຸງຂັ້ນຂອດຕ່າງໆ ໃນການກວດກາຜ່ານດ່ານ ເພື່ອອໍານວຍຄວາມສະດວກໃຫ້ແກ່ ຄົນ, ສິນຄ້າ ແລະ ພາຫະນະໄປ-ມາ ລະຫວ່າງ ສອງປະເທດໃຫ້ດີຂຶ້ນກວ່າເກົ່າ ແລະ ໃຫ້ທັນກັບສະພາບການປ່ຽນແປງໃໝ່ຂອງຂົງເຂດ, ພາກພື້ນ ແລະ ສາກົນ ເວົ້າລວມ, ເວົ້າສະເພາະແມ່ນ ລະຫວ່າງ ສອງປະເທດ ລາວ-ຫວຽດນາມ.
ຍ້ອນສາຍສໍາພັນອັນແໜ້ນແຟ້ນຂອງ ສປປ ລາວ ແລະ ສສ ຫວຽດນາມ, ເຈົ້າໜ້າທີ່ ແລະ ກະຊວງທີ່ກ່ຽວຂ້ອງ ຂອງສອງປະເທດ ໄດ້ມີຄວາມພະຍາຍາມສູງ ໃນການຄົ້ນຄວ້າປັບປຸງຂັ້ນຕອນ ແລະ ຜ່ອນຜັນບາງມາດຕະການ ເພື່ອອໍານວຍຄວາມສະດວກໃຫ້ແກ່ການນໍາເຂົ້າ ແລະ ສົ່ງອອກ ເປັນແຕ່ລະໄລຍະ ສົ່ງຜົນເຮັດໃຫ້ມູນຄ່າການຄ້າລະຫວ່າງສອງປະເທດ ມີການຂະຫຍາຍຕົວແບບກ້າວກະໂດດ ໃນປີ 2021 ເຊິ່ງສາມາດບັນລຸໄດ້ 1,37 ຕື້ ໂດລາສະຫະລັດ ເພີ່ມຂຶ້ນ 33,32% ທຽບໃສ່ ປີ 2020 ກາຍຄາດໝາຍທີ່ສອງລັດຖະບານໄດ້ວາງໄວ້ ແລະ ຖືວ່າເປັນມູນຄ່າການຄ້າສອງຝ່າຍ ລາວ-ຫວຽດນາມ ທີ່ສູງທີ່ສຸດ ໃນໄລຍະ 10 ປີ ຜ່ານມາ. ໃນນັ້ນ, ສັງເກດເຫັນວ່າມີບາງລາຍການສິນຄ້າ ຂອງປີ 2021 ທຽບໃສ່ປີ 2020 ມີອັດຕາການນໍາເຂົ້າ-ສົ່ງອອກເພີ່ມຂຶ້ນຫຼາຍສົມຄວນ ເຊັ່ນ: ດ້ານສິນຄ້ານໍາເຂົ້າຈາກຫວຽດນາມປະເພດ ນໍ້າມັນເຊື້ອໄຟ ເພີ່ມຂຶ້ນ 96,69%, ຝຸ່ນ ເພີ່ມຂຶ້ນ 353,4%, ສາຍໄຟຟ້າ ເພີ່ມຂຶ້ນ 552,59%. ສ່ວນດ້ານສິນຄ້າສົ່ງອອກໄປຫວຽດນາມ ປະເພດຜັກ ແລະ ໝາກໄມ້ ເພີ່ມຂຶ້ນ 420,7%, ແຮ່ທາດ ເພີ່ມຂຶ້ນ 285,77%, ຝຸ່ນ ເພີ່ມຂຶ້ນ 142,56%, ຢາງພາລາ ເພີ່ມຂຶ້ນ 101,72%.
ເຖິງຢ່າງໃດກໍ່ຕາມ ອີງຕາມບາງຄໍາເຫັນຂອງ ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໃນວາລະພົບປະກັບ ທ່ານ ຟາມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ ທີ່ນະຄອນຫຼວງ ຮ່າໂນ້ຍ (ໃນວັນທີ 8 ມັງກອນ 2022) ທີ່ໄດ້ເຫັນວ່າ ມູນຄ່າການຄ້າສອງຝ່າຍ ລາວ-ຫວຽດນາມ ຖ້າທຽບໃສ່ມູນຄ່າການຄ້າກັບບັນດາປະເທດອ້ອມຂ້າງອື່ນໆ ແມ່ນຍັງໜ້ອຍຢູ່, ຍັງບໍ່ທັນສົມກັບທ່າແຮງ ແລະ ນະໂຍບາຍການສົ່ງເສີມຕ່າງໆຂອງສອງປະເທດທີ່ມີຕໍ່ກັນ. ດັ່ງນັ້ນ, ຈຳເປັນທີ່ສຸດຕ້ອງໄດ້ພ້ອມກັນສົ່ງເສີມ ແລະ ສ້າງເງື່ອນໄຂໃຫ້ແກ່ການພັດທະນາການຄ້າທັງສອງຝ່າຍໃຫ້ສາມາດຂະຫຍາຍຕົວຫຼາຍຂຶ້ນກວ່າເກົ່າ.
ເພື່ອໃຫ້ສາມາດບັນລຸໄດ້ຕາມເນື້ອໃນຈິດໃຈທີ່ກ່າວມາຂ້າງເທິງ ກອງປະຊຸມໄດ້ເປັນເອກະພາບກັນບາງບັນຫາສໍາຄັນ ດັ່ງນີ້:
- ຮ່ວມກັນປຶກສາຫາລື ໃນການກວດກາຄືນບັນດາເນື້ອໃນສັນຍາ, ຂໍ້ຕົກລົງ ແລະ ບົດບັນທຶກຮ່ວມກັນ ທີ່ເຫັນວ່າ ຍັງບໍ່ສອດຄ່ອງກັບສະພາບການຮ່ວມມືໃນປະຈຸບັນ ເຊັ່ນ: ສັນຍາສິນຄ້າຜ່ານແດນ ລາວ-ຫວຽດນາມ, ອານຸສັນຍາເພື່ອປັບປຸງສັນ ຍາສິນຄ້າຜ່ານແດນ ລາວ-ຫວຽດນາມ, ຂໍ້ຕົກລົງ ຮ່າໂນ້ຍ 2007 ກ່ຽວກັບ ການສ້າງເງື່ອນໄຂອໍານວຍຄວາມສະດວກໃຫ້ແກ່ ຄົນ, ພາຫະນະ ແລະ ສິນຄ້າ;
- ປຶກສາຫາລືກັນ ເພື່ອປັບປຸງກົນໄກການປະສານງານ ໃນການຈັດຕັ້ງຜັນຂະຫຍາຍບັນດາເນີ້ືອໃນສັນຍາ, ຂໍ້ຕົກລົງ, ບົດບັນທຶກ ແລະ ເອກະສານອື່ນໆທີ່ມີຮ່ວມກັນໃຫ້ໄດ້ຮັບປະສິດຕິຜົນສູງສຸດ ໂດຍສະເພາະການແກ້ໄຂບັນຫາທີ່ເກີດຂຶ້ນຈາກການປະຕິບັດເນື້ອໃນສັນຍາ ໃນໄລຍະຜ່ານມາ;
- ການຕີລາຄາຮ່ວມກັນຂອງທັງສອງຝ່າຍ ເພື່ອແນໃສ່ ການຖອດຖອນໄດ້ ຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນວຽກງານພັດທະນາການຄ້າຊາຍແດນໃນໄລຍະຜ່ານມາ ແລະ ຮ່ວມກັນຊອກຫາແນວທາງ, ວາງມາດຕະການໃນການແກ້ໄຂໃນຕໍ່ໜ້າ;
- ສືບຕໍ່ປັບປຸບກົນໄກປະສານງານ ໃນການອໍານວຍຄວາມສະດວກໃຫ້ແກ່ການນໍາເຂົ້າ-ສົ່ງອອກ ສິນຄ້າ ລະຫວ່າງສອງປະເທດ ພ້ອມທັງຄົ້ນຄວ້າແກ້ໄຂສິ່ງອຸດຕັນຕ່າງໆ ໃຫ້ຊຸກຍູ້ສົ່ງເສີມການນໍາເຂົ້າ-ສົ່ງອອກ ສິນຄ້າ ໃຫ້ບັນລຸຕາມຄາດໝາຍທີ່ສອງຝ່າຍໄດ້ກໍານົດ ໃນແຕ່ລະປີ;
- ຮ່ວມກັນປຶກສາຫາລື ແລະ ຄົ້ນຄ້ວາ ສ້າງເງື່ອນໄຂສະດວກໃຫ້ແກ່ວຽກງານສົ່ງເສີມການລົງທຶນທີ່ຕິດພັນກັບວຽກງານການຄ້າ, ຊຸກຍູ້ສົ່ງເສີມໃຫ້ມີການລົງ ທຶນ ເຂົ້າໃນຂົງເຂດການຜະລິດ ແລະ ປຸງແຕ່ງ ຢູ່ແຕ່ລະປະເທດ ເຮັດແນວໃດເພື່ອສ້າງຜະລິດຕະພັນ ແລະ ແລກປ່ຽນສິນຄ້າໄດ້ຫຼາຍຂຶ້ນ ປະກອບສ່ວນສ້າງມູນຄ່າການຄ້າ ລະຫວ່າງ ສອງຝ່າຍໃຫ້ນັບມື້ ນັບເພີ່ມຂຶ້ນ.
ກອງປະຊຸມການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງຕໍ່ໄປ ຄືຄັ້ງທີ XIII ຈະຈັດຂຶ້ນໃນປີ 2024 ທີ່ ສສ ຫວຽດນາມ, ສໍາລັບວັນເວລາ ແລະ ສະຖານທີ່ໃນການຈັດກອງປະຊຸມຢ່າງເປັນທາງການ ແມ່ນຝ່າຍເຈົ້າພາບຈະເປັນຜູ້ກຳນົດ ແລະ ແຈ້ງໃຫ້ກັນຊາບຕາມພາຍຫຼັງ; ເພື່ອເປັນການຍົກລະດັບຄວາມສໍາຄັນຂອງກອງປະຊຸມ ໃຫ້ມີຄວາມຄົບຖ້ວນທັງເນື້ອໃນ ແລະ ກິດຈະກໍາທີ່ຕິດພັນຢ່າງແທ້ຈິງ ສອງຝ່າຍເຫັນດີນໍາກັນວ່າ ນັບແຕ່ກອງປະຊຸມ ຄັ້ງທີ XII ເປັນຕົ້ນໄປ ສອງຝ່າຍຈະຈັດຕັ້ງຕະຫຼາດນັດເພື່ອວາງສະແດງ ແລະ ຈໍາໜ່າຍສິນຄ້າທີ່ເປັນຜົນຜະລິດ, ສິນຄ້າທີ່ເປັນເອກະລັກຂອງເຂດແຄວ້ນ ແລະ ສິນຄ້າທີ່ມີທ່າແຮງ ຂອງບັນດາແຂວງຊາຍແດນ ລາວ-ຫວຽດນາມ ໃຫ້ຜູ້ເຂົ້າຮ່ວມກອງປະຊຸມ ແລະ ປະຊາຊົນບ່ອນທີ່ຈັດກອງປະຊຸມ ໄດ້ທ່ຽວຊົມ, ທໍາຄວາມຮູ້ຈັກ ແລະ ເລືອກຊື້ສິນຄ້າດັ່ງກ່າວ, ພ້ອມກັນນັ້ນ ຈະຈັດກອງປະຊຸມພົບປະ ເຊື່ອມໂຍງທຸລະກິດແຂວງຊາຍແດນ ລາວ-ຫວຽດນາມ.
ພາບ: ນັກຂ່າວໜັງສືພິມເສດຖະກິດການຄ້າ
ຂ່າວ: ນ ຖື ແຫວນວົງສົດ ສຸນສະຖິຕິ ແລະ ຂໍ້ມູນຂ່າວສານ ກຜຮ
