ທີ່ນະຄອນຫລວງວຽງຈັນ ວັນທີ 25 ເມສາ 2022ຶ, ທ່ານ ປອ. ຄຳແພງ ໄຊສົມແພງ ລັດຖະມົນຕີຕາງຫນ້າໃຫ້ກະຊວງ ອຄ. ໃນໂອກາດນີ້ໃຫ້ສຳພາດຂ່າວຕໍ່ບັນດາສື່ມວນຊົນ, ສຳນັກຂ່າວຕ່າງໆ ໃນມື້ນີ້ ກະຊວງ ອຄ. ໄດ້ຈັດພິທີລົງນາມແຜນການຊ່ວຍເຫລືອທາງດ້ານເຕັກນິກ ຂອງໂຄງການ “ກໍ່ສ້າງລະບົບ ການຄ້າຜ່ານເອເລັກໂຕຣນິກ ສຳລັບຜະລິດຕະພັນ ກະສິກຳ ລາວ” ລະຫວ່າງ ກົມສົ່ງເສີມການຄ້າ, ກະຊວງ ອຄ. ສປປ ລາວ ຮ່ວມກັບ ບໍລິສັດ ອານຮຸຍອີ້ຊາງ ດີຈີຕອນ ເທັກໂນໂລຍີຈຳກັດ ທີເປັນບໍລິສັດຕົວແທນຂອງກະຊວງການຄ້າຈີນ ກໍ່ຄືລັດຖະບານແຫ່ງ ສປຈີນ.
ຕາງຫນ້າໃຫ້ ລັດຖະບານ ແລະ ໃນນາມກະຊວງ ອຄ. ສປປ ລາວ ຂ້າພະເຈົ້າ ຂໍສະແດງຄວາມຂອບໃຈເປັນຢ່າງຍິ່ງມາຍັງ ລັດຖະບານ ສປ ຈີນ ທີ່ໄດ້ໃຫ້ການຊ່ວຍເຫລືອ ໂຄງການ ກໍ່ສ້າງລະບົບ ການຄ້າຜ່ານເອເລັກໂຕຣນິກ ສຳລັບຜະລິດຕະພັນ ກະສິກຳ ລາວ ດັ່ງກ່າວນີ້ ຕາມການສະເໜີຂອງກະຊວງ ອຄ. ກໍຄືລັດຖະບານແຫ່ງ ສປປ ລາວ. ໂຄງການດັ່ງກ່າວ ແມ່ນເປັນໂຄງການຫນື່ງ ທີ່ຢູ່ພາຍໃຕ້ກອບການຊ່ວຍເຫລືອ ບ້ວງ 4 ຕື້ຢວນ ເຊິ່ງເປັນການຊ່ວຍເຫຼືອທີ່ ສະຫາຍ ສີຈິີ້ນຜິງ, ເລຂາທິການໃຫຍ່ພັກກອມມູນິດຈີນ, ປະທານປະເທດ ແຫ່ງ ສປ ຈີນ ໄລຍະຢ້ຽມຢາມເປັນທາງການຢູ່ ສປປ ລາວ ໃນເດືອນ ພະຈິກ ປິ 2017 ແລະ ໄດ້ປະກາດວ່າ ຈະປະຕິບັດ 08 ໂຄງການຊ່ວຍເຫຼືອລ້າໃຫ້ແກ່ ສປປ ລາວ, ໃນ 08 ໂຄງການນີ້ ລວມມີໂຄງການກໍ່ສ້າງຊ່ວຍເຫຼືອລ້າລະບົບ e-commerce (ອີ-ຄອມເມີສ) ສໍາລັບຜະລິດຕະພັນກະສິກຳລາວ. ຂ້າພະເຈົ້າ ຕີລາຄາສູງຕໍ່ການຊ່ວຍເຫຼືອນີ້ ເຫັນວ່າເປັນໂຄງການທີ່ມີຄວາມສຳຄັນບຸລິມະສິດ ຕໍ່ກັບການສົ່ງເສີມສີນຄ້າ ລາວ ສ້າງຄວາມອາດສາມາດໃນການເຂົ້າເຖິງຜູ້ຊື້ ແລະ ຕະຫລາດ ພ້ອມດຽວກັນ ໃນເບື້ອງການສະຫນອງ ແມ່ນສາມາດເຕົ້າໂຮມ ແລະ ເຊື່ອມລົງໄປເຖິງ ຜູ້ຜະລິດ ແລະ ຜູ້ຂາຍໂດຍກົງ. ແນ່ນອນວ່າ, ລະບົບການຄ້າຜ່ານອີເລັກໂຕນິກທີ່ໄດ້ຮັບການຊ່ວຍເຫຼືອຄັ້ງນີ້ ຈະເປັນໂຄງການລິເລີ່ມຮ່ວມກັນຈອງພາກລັດ ແລະ ເອກະຊົນເພື່ອຊ່ວຍພັດທະນາ, ຄຸ້ມຄອງ ການຄ້າຜະລິດຕະພັນກະສິກຳ ຂະຫຍາຍຕາໜ່າງການຄ້າກ້າວໄປເຖິງສ້າງມູນຄ່າການຄ້າສິນຄ້າລາວ ໃຫ້ນັບມື້ສູງຂື້ນ ປະກອບສ່ວນເຂົ້າໃນ ການຍົກສູງຄຸນນະພາບສິນຄ້າ ແລະ ສ້າງວຽກເຮັດງານທຳໃຫ້ແກ່ຊາວກະສິກອນ ໃນຊົນນະບົດລາວ ປະຕິບັດນະໂຍບາຍແກ້ໄຂຄວາມທຸກຍາກ ໃຫ້ ສປປ ລາວ ສາມາດຫຼຸດຜົ້ນອອກຂຈາກປະເທດດ້ອຍພັດທະນາ ໃນປີ 2026 ຕາມຄາດໝາຍທີ່ວາງໄວ້.
ໂຄງການດັ່ງກ່າວນີ້ ໄດ້ເລີ່ມປະສານສົມທົບຮ່ວມກັບ ຈັດຕັ້ງປະຕິບັດບັດ ການກະກຽມນັບແຕ່ ການລົງນາມກຳນົດການຮ່ວມມືທາງດ້ານເສດຖະກິດເຕັກນິກ ໃນວັນທີ 30 ພຶດສະພາ 2018, ເຮັດການສຳຫລວດເພື່ອກຳນົດເປັນໂຄງການໃນປີ 2019, ໄດ້ລົງນາມໃນສານແລກປ່ຽນ ແລະ ກຳນົດເປັນໂຄງການໃນວັນທີ 22 ເມສາ 2020, ພາຍຫລັງໄດ້ຮັບແຈ້ງຊື່ບໍລິສັດຕົວແທນຂອງຝ່າຍຈີນ ຜູ້ຊ່ວຍສ້າງເວບໄຊ ທີ່ເປັນແພຣດຟອມນີ້, ບໍລິສັດດັ່ງກ່າວໄດ້ເຮັດວຽກຮ່ວມກັບກົມສົ່ງເສີມການຄ້າ, ກະຊວງ ອຄ. ຢ່າງໃກ້ຊິດ ໂດຍມີການຈັດປະຊຸມຢ່າງເປັນທາງການຮ່ວມກັນຫລາຍກວ່າ 6 ຄັ້ງ ໃນປີ 2021-2022 ເພື່ອກຳນົດທຸກລາຍລະອຽດໃນການກໍ່ສ້າງເວບໄຊຈຳຫນ່າຍສິນຄ້າກະສິກຳ ດັ່ງກ່າວ. ພິເສດ, ເພື່ອອຳນວຍຄວາມສະດວກໃຫ້ຜູ້ຜະລິດ ໂຄງການດັ່ງກ່າວຈະໄດ້ ສ້າງຈຸດບໍລິການ 20 ຈຸດທົ່ວປະເທດ ເພື່ອເຮັດໃຫ້ຜູ້ຜະລິດ ສາມາດເຂົ້າເຖິງການບໍລິການ ແລະ ສາມາດແຈ້ງສິນຄ້າທີ່ຕົນມີໃຫ້ກັບສູນ ເພື່ອເອົາເຂົ້າວາງຂາຍໃນເວັບໄຊ ອີຄອມເມີສ ຂອງໂຄງການ. ພ້ອມດຽວກັນ, ກໍຈະມີການຈັດຝຶກອົບຮົມໃຫ້ ຜູ້ຜະລິດ, ຜູ້ຂາຍ, ບັນດາຜູ້ສົນໃຈ ໃຫ້ຮູ້ນຳໃຊ້ເວັບໄຊທີ່ໂຄງການສ້າງຂຶ້ນ.
ເພື່ອເປັນຂໍ້ມູນໃຫ້ບັນດາທ່ານຮັບຊາບ, ມາຮອດ 3 ເດືອນຕົ້ນປີ 2022 ມູນຄ່າການຄ້າ ລາວຈີນມີມູນຄ່າລວມເຖິງ 800 ລ້ານ ໂດລາສະຫະລັດ, ທຽບໃສ່ປີຜ່ານມາ ເພີ່ມຂຶ້ນ 19,9%. ໂຄງການດັ່ງກ່າວຈະເປັນການເພີ່ມທະວີການຮ່ວມມື ທາງດ້ານການຄ້າຂອງ ສປປ ລາວ ກັບ ສປ ຈີນ ເພື່ອຊຸກຍູ້ໃຫ້ ມູນຄ່າການຄ້າ ຂອງສອງປະເທດ ເພີ່ມຂຶ້ນ ແລະ ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງ ສປປ ລາວ, ທັງເປັນໂອກາດ ເຮັດໃຫ້ລາວ ສາມາດສ້າງໂອກາດໃນການສົ່ງອອກສິນຄ້າກະສິກຳ ໂດຍສະເພາະແມ່ນໃນ 13 ພືດ ແລະ 1 ສັດໃຫຍ່ ທີ່ລັດຖະບານລາວ ໄດ້ຮັບການເປີດຕະຫລາດຈາກ ສປ ຈີນແລ້ວ ຄືປະເພດ ເຂົ້າ, ສາລີແຂງ, ມັນຕົ້ນແຫ້ງ, ຫມາກກ້ວຍ, ຫມາກໂມ, ມັນດ້າງ, ຫມາກນັອດ, ພືດຕະກຸນຖົ່ວ, ຫມາກໄມ້ຕະກຸນຫມາກກ້ຽງ ແລະ ລວມທັງສິນຄ້າກະສິກຳທ່າແຮງອຶ່ນໆ ທີ່ທາງວິຊາການຈະໄດ້ລົງສຳຫລວດໃນບັນດາທ້ອງຖີ່ນ ທົ່ວປະເທດ ພາຍຫລັງໄດ້ລິເລີ່ມໂຄງການນີ້.
ເຖິງຢ່າງໃດກໍ່ຕາມ ກະຊວງ ອຄ. ຍັງມີເປົ້າຫມາຍໃນການສືບຕໍ່ສົ່ງເສີມການຜະລິດ, ການສົ່ງອອກ, ດຶງດູດການລົງທຶນ ເພື່ອຊ່ວຍໃຫ້ທຸລະກິດ ກໍຄືປະຊາຊົນຜູ້ປູກ, ຜູ້ລ້ຽງ ໃຫ້ສາມາດສົ່ງອອກສິນຄ້າໄດ້ ໂດຍສະເພາະ ໃນສະພາບການແຜ່ລະບາດຂອງພະຍາດໂຄວິດ 19 ນີ້ ເຊີ່ງກະຊວງເຊື່ອຫມັ້ນວ່າ ການສ້າງ ໂຄງການ ການຄ້າຜ່ານເອເລັກໂຕຣນິກນີ້ ຈະເຮັດໃຫ້ພວກເຮົາຊ່ວຍຜູ້ປະກອບການສາມາດຜ່ານຜ່າອຸປະສັກໄດ້.
ອີກດ້ານຫນື່ງ ກະຊວງໄດ້ມີແຜນຊຸກຍູ້ສົ່ງເສີມການສົ່ງອອກສິນຄ້າ ຜ່ານທາງລົດໄຟ ລາວ-ຈີນ ທີ່ໄດ້ເປີດໃຫ້ບໍລິການໃນທ້າຍປີ 2021 ຜ່ານມາ, ເສັ້ນທາງລົດໄຟລາວ-ຈີນນີ້ ກໍາລັງພັດທະນາໃຫ້ສາມາດອຳນວຍຄວາມສະດວກຮອບດ້ານ ໃນການຂົນສົ່ງສິນຄ້າ ເຊິ່ງເປັນຊ່ອງທາງທີ່ປະຫຍັດຕົ້ນທຶນ, ເຂົ້າເຖິງຕະຫຼາດໃຫຍ່ ສ້າງຄວາມສາມາດໃນການແຂ່ງຂັນກັບ ສິນຄ້າຂອງປະເທດເພື່ອນບ້ານໄດ້ ແລະ ສຳຄັນທີ່ສຸດແມ່ນ ສາມາດເຊື່ອມໂຍງກັບ ສປ ຈີນ ກໍຄືພາກພື້ນ ແລະ ທົ່ວໂລກ.
ແຫຼງຂ່າວ-ພາບ: ໄດ້ມາຈາກ ກົມສົ່ງເສີມການຄ້າ ກະຊວງ ອຄ.
ຮຽບຮຽງ: ໄພຄໍາອີ
