ຕອນເຊົ້າ ວັນທີ 07 ມິຖຸນາ 2022 ທີ່ກະຊວງອຸດສາຫະກຳ ແລະ ການຄ້າ ໄດ້ຈັດພິທີຖະແຫຼງຂ່າວ ເນື່ອງໃນໂອກາດງານສະເຫຼີມສະຫຼອງວັນຮັບຮອງສາກົນ 9 ມິຖຸນາ ໄດ້ບັນຈົບຄົບຮອບ 13 ປີ. ຖະແຫຼງການໂດຍ ​ທ່ານ ນາງ ຈັນສຸກ ແສງພະຈັນ  ຮອງເລຂາຄະນະພັກ, ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ ເຊິ່ງມີເນື້ອໃນ ແລະ ຄຳເຫັນຕໍ່ວັນດັ່ງກ່າວວ່າ: ວັນທີ 9 ມິຖຸນາ ແມ່ນວັນຮັບຮອງສາກົນ, ເຊິ່ງໄດ້ໜູນວຽນມາບັນຈົບຄົບຮອບ 13 ປີ. ໃນປີ 2022 ນີ້ ສປປ ລາວ ໄດ້ພ້ອມກັບບັນດາປະເທດສະມາຊິກອົງການຮັບຮອງຫ້ອງທົດລອງສາກົນ (ILAC) ແລະ ຄະນະກຳມະທິການການຮັບຮອງສາກົນ (IAF) ຈັັດການສະເຫຼີມສະຫຼອງວັນດັ່ງກ່າວພາຍໃຕ້ຄຳຂວັນທີ່ວ່າ: “ການຮັບຮອງແມ່ນຄວາມຍືນຍົງໃນການເຕີບໂຕ ຂອງເສດຖະກິດ ແລະ ສິ່ງແວດລ້ອມ” (Accreditation: Sustainability in Economic Growth and the Environment) ເຊິ່ງມີຄວາມໝາຍສໍາຄັນ ທີ່ເຮັດໃຫ້ພວກເຮົາຮູ້ວ່າ ວຽກງານການຮັບຮອງ ແລະ ການປະເມີນຄວາມສອດຄ່ອງ ໄດ້ກາຍເປັນອົງປະກອບໜຶ່ງ ໃນເປົ້າໝາຍການພັດທະນາແບບຍືນຍົງ ຂອງອົງການສະຫະປະຊາຊາດ (The Sustainable Development Goals-SDGs) ທີ່ວາງເປົ້າໝາຍໃຫ້ສຳເລັດພາຍໃນປີ 2030 ນີ້. ແນໃສ່ເພື່ອຫຼຸດຜ່ອນບັນຫາຄວາມບໍ່ສົມດຸນທາງດ້ານສິ່ງແວດລ້ອມ ແລະ ສັງຄົມໃນປັດປັດຈຸບັນ ແລະ ອະນາຄົດ. ການຮັບຮອງແມ່ນຮັບຮູ້ຢ່າງເປັນທາງການ ກ່ຽວກັບຄວາມອາດສາມາດໃນການຈັດຕັ້ງປະຕິບັດມາດຕະຖານສາກົນ, ເຊິ່ງມີຄວາມຈໍາເປັນຕໍ່ກັບອົງການຮັບຮອງ ໜ່ວຍງານຢັ້ງຢືນຜະລິດຕະພັນ, ລະ​ບົບໜ່ວຍງານກ​ວດ​ກາ ແລ​ະ​  ຫ້ອງ​ທົດ​ລອງກວດ​ສອບ ແລະ ​ຫ້ອງ​ທົດ​ລອງສອບ​ທຽບ, ເພື່ອແນໃສ່ການບໍລິການທີ່ມີຄວາມໂປ່ງໃສ, ເປັນກາງ, ມີຂັ້ນຕອນໃນການຈັດຕັ້ງປະຕິບັດວຽກ​ງານ, ມີຄວາມສາມາດໃນດ້ານວິຊາສະເພາະທີ່ແນ່ນອນ, ປະຕິບັດຂັ້ນຕອນທີ່ໄດ້ກຳນົດຕາມມາດຕະຖານສາກົນ ISO/IEC 17011,  ເພື່ອສ້າງຄວາມເຊື່ອໝັ້ນ ແລະ ຄວາມໜ້າເຊື່ອຖືໃຫ້ແກ່ອົງກອນ, ໜ່ວຍງານນັ້ນໆ ແລະ ຍັງເປັນການປົກປ້ອງຜົນປະໂຫຍດອັນຊອບທຳ ຂອງຜູ້ທີ່ມາໃຊ້ບໍລິການອີກດ້ວຍ.

      ຈຸດປະສົງຂອງການສະເຫຼີມສະຫຼອງວັນຮັບຮອງສາກົນ (World Accreditation day) ໃນຄັ້ງນີ້ແມ່ນ ເພື່ອເປັນການເຜີຍແຜ່ວຽກງານການຮັບຮອງອອກສູ່ສັງຄົມເປັນຕົ້ນແມ່ນ ຜູ້ປະກອບການ, ນັກລົງທຶນ, ນັກທຸລະກິດ, ຜູ້ຜະລິດ ແລະ ຜູ້ຊົມໃຊ້ທັງໝົດ ໄດ້ເຂົ້າໃຈຢ່າງເລິກເຊິ່ງ ກ່ຽວກັບບົດບາດ ແລະ ຄວາມສຳຄັນຂອງວຽກງານການຮັບຮອງ ຕໍ່ການພັດທະນາເສດຖະກິດ-ສັງຄົມ ໃນລະດັບຊາດ, ພາກພື້ນ ແລະ ສາກົນ. ພ້ອມກັນນັ້ນ ກໍ່ເພື່ອພັດທະນາວຽກງານການຮັບຮອງ ໃຫ້ກາຍເປັນປັດໄຈສຳຄັນໃນການຊຸກຍູ້ສົ່ງເສີມການຄ້າ, ການຜະລິດອຸດສາຫະກຳ ຕາມນະໂຍບາຍການພັດທະນາແບບຍືນຍົງ ແລະ ຕິດພັນກັບສິ່ງແວດລ້ອມຢ່າງເປັນຮູບປະທໍາ. ນອກນັ້ນ ການຮັບຮອງການຜະລິດ, ລະບົບການກວດສອບ, ການຢັ້ງຢືນຄຸນນະພາບຂອງຜະລິດຕະພັນ ແລະ ສິນຄ້າ, ຍັງຊ່ວຍຍົກສູງສະມັດຕະພາບການຜະລິດ ແລະ ສ້າງຄວາມເຊື່ອໝັ້ນໃຫ້ແກ່ຜູ້ຊົມໃຊ້ ແລະ ບັນລຸເປົ້າໝາຍ ການສ້າງຄວາມຍຸຕິທຳໃນສັງຄົມ.

          ປັດຈຸບັນນີ້ ວຽກງານການຮັບຮອງ ຂອງ ສປປ ລາວ ເຮົາໄດ້ມີການເຄື່ອນໄຫວຢ່າງຕັ້ງໜ້າພາຍໃຕ້ ໜ້າທີ່ ແລະ ຄວາມຮັບຜິດຊອບ ຂອງກົມມາດຕະຖານ ແລະ ວັດ

ແທກ ທີ່ຂຶ້ນກັບ ກະຊວງອຸດສາຫະກໍາ ແລະ ການຄ້າ, ໃນຊຸມປີຜ່ານມາ, ພາຍໃຕ້ຄວາມຮັບຜິດຊອບດັ່ງກ່າວສາມາດຮ່ວມມືປະສານງານກັບອົງການຮັບຮອງສາກົນ ດຳເນີນການຮັບຮອງຫ້ອງທົດລອງ ຢູ່ໃນ ສປປ ລາວ ໄດ້ຈຳນວນ 11 ຫ້ອງທົດລອງ ຕາມການກຳນົດຂອງມາດຕະຖານສາກົນ ວ່າດ້ວຍການຄຸ້ມຄອງບໍລິຫານຫ້ອງທົດລອງ (ISO/IEC 17025). ໃນນັ້ນຂົງເຂດຫ້ອງທົດລອງສອບທຽບຈຳນວນ 3 ຫ້ອງທົດລອງ, ຂົງເຂດຫ້ອງທົດລອງກວດສອບ ຈຳນວນ 08 ຫ້ອງທົດລອງ ທີ່ຜ່ານການຍອມຮັບ ແລະ ຮັບຮູ້ຈາກອົງການຈັດຕັ້ງສາກົນ.

           ທັງໝົດທີ່ກ່າວມານີ້ ແມ່ນການສັງລວມເອົາບັນດາການເຄື່ອນໄຫວວຽກການຮັບຮອງຂອງ ສປປ ລາວ ແລະ ເປັນການສະເຫຼີມສະຫຼອງວັນຮັບຮອງສາກົນ 9 ມິິຖຸຸນາ ຄົບຮອບ 13 ປີ ອີກດ້ວຍ.

ແຫຼ່ງຂ່າວ: ກົມມາດຕະຖານ ແລະ ວັດແທກ

ຮູບພາບໂດຍ: ທ ທິລາວັນ ວົງວິຈິດ ສູນສະຖິຕິ ແລະ ຂໍ້ມູນຂ່າວສານ ກຜຮ 

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ