ຕອນເຊົ້າເວລາ 10:30 ໂມງ ຂອງວັນທີ 27 ມິຖຸນາ 2022, ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Han Dong-man, ຜູ້ຕາງໜ້າທູດພິເສດ ຂອງທ່ານ ລັດຖະມົນຕີ ກະຊວງການຕ່າງປະເທດ ແຫ່ງ ສ ເກົາຫຼີ, ໃນໂອກາດເຂົ້າພົບປະປຶກສາຫາລື ດ້ານການຄ້າ-ການລົງທຶນ ແລະ ການທ່ອງທ່ຽວ ຢູ່ສປປ ລາວ; ມີບັນດາທ່ານຫົວໜ້າ-ຮອງຫົວໜ້າກົມ, ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 12 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ Han Dong-man, ຜູ້ຕາງໜ້າທູດພິເສດ ຂອງທ່ານ ລັດຖະມົນຕີກະຊວງການຕ່າງປະເທດແຫ່ງ ສ ເກົາຫຼີ ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງທ່ານຜູ້ຕາງໜ້າທູດພິເສດ ໄດ້ສົນທະນາກ່ຽວກັບວຽກງານການຮ່ວມມື ລະຫວ່າງ ສປປ ລາວ-ສ ເກົາຫຼີ ໂດຍສະເພາະ ປີ 2030 ຈະເປັນເຈົ້າພາບຈັດງານວາງສະແດງໂລກ (World Expo) ທີ່ ນະຄອນປູຊານ, ສ ເກົາຫຼີ ແລະ ຍັງໄດ້ທົບທວນຄືນການລົງທຶນຢູ່ ສປປ ລາວ ໃນໄລຍະຜ່ານມາ, ໃນນີ້ມູນຄ່າການຄ້າສອງຝ່າຍ ລະຫວ່າງ ສປປ ລາວ ແລະ ສ ເກົາຫຼີ ໃນບັນດາຂະແໜງການຮ່ວມມືຕ່າງໆສືບຕໍ່ເພີ່ມຂຶ້ນຢ່າງຕໍ່ເນື່ອງ ເປັນຕົ້ນ ການຄ້າ-ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ດ້ານສາທາລະນະສຸກ, ການພັດທະນາຟື້ນຖານໂຄງລ່າງ ແລະ ອື່ນໆ, ລວມທັງການຮ່ວມມືຂອບອາຊຽນ, ຂອບການຮ່ວມມືແມ່ນໍ້າຂອງ – ສ ເກົາຫຼີ ແລະ ຂອບການຮ່ວມມື ຢູ່ສະຫະປະຊາຊາດ, ເຊິ່ງທັງໝົດນັ້ນໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຢູ່ ສປປ ລາວ; ນອກຈາກນີ້ທັງສອງຝ່າຍ ຍັງແລກປ່ຽນຄໍາຄິດຄໍາເຫັນຢ່າງກົງໄປກົງມາໃນຫຼາຍດ້ານ ເພື່ອຊອກຫາທາງອອກໃນອະນາຄົດໃຫ້ໄດ້ປັບປຸງວຽກງານການຮ່ວມມືຂອງສອງຝ່າຍ ດີຂຶ້ນກວ່າເກົ່າ.
ພ້ອມດຽວກັນນີ້, ທ່ານ Han Dong-man, ຜູ້ຕາງໜ້າທູດພິເສດ ຂອງທ່ານ ລັດຖະມົນຕີ ກະຊວງການຕ່າງປະເທດແຫ່ງ ສ ເກົາຫຼີ ໄດ້ສະແດງຄວາມຍິນດີຕໍ່ທ່ານລັດຖະມົນຕີ ທີ່ໄດ້ມາຮັບຕໍາແໜ່ງໜ້າທີ່ໃໝ່ ແລະ ໃຫ້ຄໍາໝັ້ນວ່າ ໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ສ ເກົາຫຼີ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດແກ່ສອງປະເທດ ຫຼາຍຂຶ້ນກວ່າເກົ່າ.
ພາບ-ຂ່າວໂດຍ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ ກຜຮ. ກະຊວງ ອຄ.
