ຕອນເຊົ້າຂອງວັນທີ 01 ກໍລະກົດ 2022, ທີ່ຫ້ອງປະຊຸມທາງໄກຊັ້ນ 3 ກະຊວງ ອຄ ໄດ້ຈັດກອງປະຊຸມປຶກສາຫາລື ກ່ຽວກັບການນໍາເຂົ້າ, ການສະໜອງ ແລະ ຈໍລະຈອນແຈກຢາຍນໍ້າມັນເຊື້ອໄຟ ໃນປະຈຸບັນ ໂດຍການເປັນປະທານຂອງທ່ານ ພູວຽງ ພົງສາ ຫົວໜ້າກົມການຄ້າພາຍໃນ ພ້ອມນີ້ມີຜູ້ຕາງໜ້າຈາກບັນດາກົມທີ່ນອນຢູ່ໃນຄະນະສະເພາະກິດ ຂອງກະຊວງ ອຄ, ກົມປະຊາສໍາພັນ ຫ້ອງວ່າການ ສໍານັກງານນາຍົກລັດຖະມົນຕີ, ກົມຄົ້ນຄວ້າສັງລວມ ຫສນຍ, ກົມຄົ້ນຄວ້າສັງລວມ ຫ້ອງວ່າການສູນກາງພັກ, ກົມສື່ມວນຊົນ ກະຊວງຖະແຫຼງຂ່າວ ແລະ ວັດທະນະທໍາ, ກົມເສດຖະກິດການຜະລິດ ສະພາແຫ່ງຊາດ, ສູນສະຖິຕິ ແລະ ຂໍ້ມູນຂ່າວສານ ກົມແຜນການ ແລະ ການຮ່ວມມື, ສະມາຄົມນໍ້າມັນເຊື້ອໄຟ, ບັນດາສໍານັກຂ່າວ 8 ສໍານັກ; ເຂົ້າຮ່ວມປະມານ 35 ທ່ານ.

      ຈຸດປະສົງຂອງກອງປະຊຸມຄັ້ງນີ້: 1/ ເພື່ອຮັບຟັງການອະທິບາຍກ່ຽວກັບ ການຄຸ້ມຄອງນໍ້າມັນເຊື້ອໄຟ ແລະ ການຄິດໄລ່ ໂຄງສ້າງລາຄານໍ້າມັນເຊື້ອໄຟ ຢູ່ພາຍໃນປະເທດ ຂອງ ສປປ ລາວເຮົາ; 2/ ເພື່ອສົນທະນາແລກປ່ຽນຂ້ໍມູນ ຮ່ວມກັບບັນດາແຂກທີ່ເຂົ້າຮ່ວມກອງປະຊຸມ ປິ່ນອ້ອມບັນຫາດັ່ງກ່າວ. ດັ່ງທີ່ຮູ້ກັນວ່າ, ປະຈຸບັນສະພາບເສດຖະກິດພາກພື້ນ ແລະ ໂລກ ເຂົ້າສູ່ໄລຍະຜັນຜວນ ເນື່ອງຈາກການຂວ້າມບາດທາງເສດຖະກິດ ແລະ ການປະຕິບັດການພິເສດທາງການທະຫານ ຂອງບັນດາປະເທດມະຫາອໍານາດ ໄດ້ສົ່ງຜົນເຮັດໃຫ້ນໍ້າມັນເຊື້ອໄຟໃນຕະຫລາດໂລກ ມີລາຄາເໜັງຕີງຂຶ້ນສູງສຸດເປັນປະຫວັດການ ເນື່ອງຈາກການສະໜອງບໍ່ພຽງພໍກັບຄວາມຕ້ອງການ; ຈາກສະພາບຄືແນວນີ້ ແນ່ນອນວ່າມີຜົນກະທົບໂດຍກົງເຮັດໃຫ້ລາຄາຂາຍຍ່ອຍນໍ້າມັນເຊື້ອໄຟພາຍໃນປະເທດເຮົາຕ້ອງໄດ້ປັບຂຶ້ນ ຕາມລາຄາຕະຫລາດໂລກ ເນື່ອງຈາກປະເທດລາວຕ້ອງໄດ້ນໍາເຂົ້ານໍໍ້າມັນເຊຶື້ອໄຟ ທີ່ເປັນປັດໄຈພື້ນຖານມາຮັບໃຊ້ການຜະລິດ ແລະ ການດໍາລົງຊີວິດ; ພ້ອມດຽວກັນ, ກໍສົ່ງຜົນໃຫ້ມີຄວາມຈໍາເປັນນໍາໃຊ້ເງິນຕາຕ່າງປະເທດ ຈໍານວນຫຼາຍຂຶ້ນໃນການຊື້ນໍ້າມັນ ແລະ ມີຜົນຕໍ່ຕົ້ນທຶນການຜະລິດ, ຂົນສົ່ງສິນຄ້າເຮັດໃຫ້ສິນຄ້າມີລາຄາເພີ່ມສູງຂຶ້ນ ໄປຕາມກັນ, ທັງເຮັດໃຫ້ການນໍາເຂົ້ານໍ້າມັນປະສົບບັນຫາຍ້ອນອັດຕາແລກປ່ຽນຜັນຜວນ ແລະ ສົ່ງຜົນໃຫ້ການນໍາເຂົ້ານໍ້າມັນຫຼຸດລົງ ເກີດສະພາບຂາດແຄນນໍາ້ມັນ ດັ່ງທີ່ພວກເຮົາໄດ້ປະສົບໃນໄລຍະສອງເດືອນທີ່ຜ່ານມາ.

ດ້ວຍເຫດນີ້, ການປັບລາຄາໃນແຕ່ລະຄັ້ງຜ່ານມາ ແມ່ນມີຄວາມຈໍາເປັນເພື່ອເຮັດໃຫ້ລາຄາປັບປ່ຽນທັນຕາມສະພາບການ. ເຖິງແມ່ນວ່າຈະໄດ້ປັບລາຄາຂາຍຍ່ອຍນໍ້າມັນຂຶ້ນແລ້ວກໍຕາມ ແຕ່ດ້ວຍປັດໄຈອື່ນໆ ຄຽງຄູ່ກັບຄວາມຜັນຜວນຂອງອັດຕາແລກປ່ຽນ ບວກກັບຄວາມຕ້ອງການໃຊ້ພະລັງງານສູງຂຶ້ນ ເພື່ອຮັບໃຊ້ການເປີດປະເທດພາຍຫລັງການລະບາດຂອງພະຍາດໂຄວິດ-19 ຊຶ່ງເປັນການເພີ່ມລາຍຈ່າຍຂອງຜູ້ປະກອບການ ເຮັດໃຫ້ຫຼາຍບໍລິສັດນໍາເຂົ້ານໍ້າມັນຕົກຢູ່ໃນສະພາບຂາດທຶນ ແລະ ບໍ່ສາມາດນໍາເຂົ້ານໍ້າມັນມາຮັບໃຊ້ສັງຄົມຢ່າງພຽງພໍ ແລະ ເປັນປົກກະຕິ. ໂດຍອີງໃສ່ສະພາບການເໜັງຕີງຂອງລາຄານໍ້າມັນໂລກ ໃນປະຈຸບັນເພີ່ມຂຶ້ນສູງ ສົ່ງຜົນກະທົບຕໍ່ການນໍາເຂົ້ານໍ້າມັນຂອງປະເທດເຮົາ ກໍຕ້ອງມີຄວາມຈໍາເປັນນໍາໃຊ້ເງິນຕາຕ່າງປະເທດເພີ່ມຂຶ້ນ ໃນຂະນະທີ່ແຫລ່ງສະໜອງເງິນຕາຕ່າງປະເທດຂອງເຮົາມີຈໍາກັດ. ຕໍ່ບັນຫາດັ່ງກ່າວ, ລັດຖະບານ ກໍ່ໄດ້ມີການສະເໜີ ຫລາຍວິທີທາງອອກເຊັ່ນ: ການຫລຸດອັດຕາ ອາກອນຊົມໃຊ້ນໍ້າມັນລົງ, ການໃຫ້ບູລິມະສິດ ໃນການແລກປ່ຽນເງິນຕາ, ການຈັດຊື້ນໍ້າມັນຈາກຫລາຍແຫລ່ງ ເພື່ອເປັນອີກທາງເລືອກໃນການສະໜອງນໍ້າມັນໃນສະເພາະໜ້າ ແລະ ຍາວນານ. ຄຽງຄູ່ກັນນີ້, ກະຊວງ ອຄ ຍັງໄດ້ຮ່ວມກັບຂະແໜງການກ່ຽວຂ້ອງ ເພື່ອຊຸກຍູ້ໃຫ້ບັນດາໂຮງງານປຸງແຕ່ງ/ໂຮງງານປະສົມນໍ້າມັນເຊື້ອໄຟ ພາຍໃນປະເທດເຊັ່ນ: ໂຮງງານກັ່ນນໍ້າມັນລາວເປັກ, ໂຮງງານປະສົມນໍ້າມັນເຊື້ອໄຟ ຍອດງື່ມພາວເວີ ແລະ ໂຮງງານນໍ້າມັນກາຊວນຊີວະພາບ ອາໂກຣເທັກ ເພື່ອເພີ່ມການສະໜອງນໍ້າມັນພາຍໃນປະເທດເຮົາຕື່ມ.

      ຊຶ່ງໃນນີ້ ຄະນະພະແນກຄຸ້ມຄອງສິນຄ້າ ແລະ ລາຄາ ກຄພນ ໄດ້ລາຍງານຫຍໍ້ກ່ຽວກັບສະພາບການຄຸ້ມຄອງທຸລະກິດນໍ້າມັນເຊື້ອໄຟ ຕາມດໍາລັດ 331/ນຍ ໂດຍສະເພາະການນໍາເຂົ້າ, ການສະໜອງແລະ ຈໍລະຈອນແຈກຢາຍນໍ້າມັນເຊື້ອໄຟ ໃນປະຈຸບັນ ຊຶ່ງໄດ້ອະທິບາຍການກໍານົດ ແລະ ການຄິດໄລ່ລາຄານໍ້າມັນເຊື້ອໄຟຂອງ ສປປ ລາວ ໃນດ້ານວິຊາການ; ພ້ອມດຽວກັນນີ້ ບັນດາແຂກທີ່ເຂົ້າຮ່ວມກອງປະຊຸມໄດ້ມີການສົນທະນາແລກປ່ຽນ ຄໍາຄິດເຫັນຢ່າງກົງໄປກົງມາ.

      ຕອນທ້າຍທ່ານປະທານ ໄດ້ໃຫ້ຄໍາເຫັນຕໍ່ ກອງປະຊຸມວ່າການຈັດປະຊຸມໃນຮູບແບບນີ້ແມ່ນເປັນຄັ້ງທໍາອິດ ແລະ ໄດ້ຮັບຜົນຕາມຄາດໝາຍ ພ້ອມທັງ ຮຽກຮ້ອງໃຫ້ບັນດາສໍານັກສື່ຂ່າວ ຊ່ວຍອະທິບາຍຊີ້ແຈງໃຫ້ປະຊາຊົນໃນສັງຄົມ ຮັບຮູ້ເຂົ້າໃຈເຖິງບັນຫາສະພາບການທ້າທາຍ ພາຍໃນປະເທດ ແລະ ຂອງໂລກ ແລະ ກຽມຮັບມືກັບສະພາບການດັ່ງກ່າວ; ຊຶ່ງຂະແໜງ ອຄ ພວກເຮົາກໍ່ຈະໄດ້ປັບປຸງ ກົນໄກການປະສານງານ ແລະ ການແລກປ່ຽນຂໍ້ມູນໃຫ້ວ່ອງໄວ ແລະ ຫລາຍຂຶ້ນຕື່ມ. ນອກຈາກນີ້, ກໍໄດ້ປະຊາສໍາພັນ Manage Page ຂອງກົມການຄ້າພາຍໃນ ໃນເຟັດບຸກ ແລະ ເບີໂທສາຍດ່ວນ 1510 ເຊິ່ງເຈົ້າໜ້າທີ່ກ່ຽວຂ້ອງ ຈະໄດ້ໃຊ້ມາດຕະການຕໍ່ຜູ້ລະເມີດຕາມກົດໝາຍ ແລະ ລະບຽບການ.

 ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ