ວັນທີ 01 ກໍລະກົດ 2022,  ທ່ານ ມະໄລທອງ ກົມມະສິດ, ກຳມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມດ້ວຍ​ຄະນະ ເຂົ້າຮ່ວມງານວາງສະແດງສິນຄ້າມິດຕະພາບ ລາວ-ຫວຽດນາມ 4 ແຂວງພາກໃຕ້ ສປປ ລາວ (ເຊກອງ, ສາລະວັນ, ຈຳປະສັກ ແລະ ອັດຕະປື) ແລະ 4 ແຂວງພາກກາງ ສສ ຫວຽດນາມ (ກວາງນາມ, ດາໜັງ, ເທື່ອທຽນເຫວ້ ແລະ ກອນຕູມ)  ໂດຍມີ ​​​ທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າ​ແຂວງ ແຂວງເຊກອງ ພ້ອມ​ດ້ວຍຄະນະປະຈຳ ແລະ ຄະນະນຳແຂວງ ນຳພາເຂົ້າຮ່ວມ ເຊິ່ງງານວາງສະແດງດັ່ງກ່າວເປັນການປະກອບສ່ວນສຳຄັນ ໃຫ້ແກ່ການສະເຫຼີມສະຫຼອງປີສາມັກຄີ ມິດຕະພາບ ລາວ-ຫວຽດນາມ.

      ໃນຕອນເຊົ້າວັນທີ 2 ກໍລະກົດ 2022, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ, ໄດ້ພົບປະເຮັດວຽກກັບ ພະແນກອຸດສາຫະກໍາ ແລະ ການຄ້າ ແຂວງເຊກອງ, ໂດຍການຕ້ອນຮັບຂອງ ທ່ານ ດາວວີ ສວຍທະລັງສີ, ກໍາມະການພັກແຂວງ, ຫົວໜ້າພະແນກອຸດສາຫະກຳ ແລະ ການຄ້າ ແຂວງເຊກອງ, ມີຄະນະພະແນກ, ອ້າຍເອື້ອຍນ້ອງສະມາຊິກພັກ-ພະນັກງານຫຼັກແຫຼ່ງ ແລະ ພະນັກງານລັດຖະກອນທັງໝົດ ຂອງພະແນກ ອຄ ແຂວງ ເຂົ້າຮ່ວມຢ່າງພ້ອມພຽງ ໄດ້ຈັດຂຶ້ນທີ່ຫ້ອງປະຊຸມຂອງພະແນກ; ການພົບປະເຮັດວຽກໄດ້ດຳເນີນໄປຢ່າງມີບັນຍາກາດອັນດີ ພາຍຫຼັງທ່ານຫົວໜ້າພະແນກ ອຸດສາຫະກໍາ ແລະ ການຄ້າແຂວງ ໄດ້ຂຶ້ນຜ່ານບົດສະຫຼຸບລາຍງານການປະຕິບັດວຽກງານອຸດສາຫະກຳ ແລະ ການຄ້າ ທີ່ພົ້ນເດັ່່ນ ໃນໄລຍະ 6 ເດືອນຜ່ານມາ ພ້ອມດ້ວຍ ໄດ້ສະເຫນີບັນຫາທີ່ທາງພະແນກ ພົບພໍ້, ມີຄວາມຫຍຸ້ງຍາກ ແລະ ແລກປ່ຽນບົດຮຽນຮ່ວມກັບກະຊວງ.

      ພາຍຫຼັງໄດ້ຮັບຟັງການລາຍງານ, ທ່ານ ລັດຖະມົນຕີ ກໍໄດ້ມີຄໍາເຫັນ ແລກປ່ຽນບົດຮຽນ ແລະ ບາງຄຳເຫັນຊີ້ນຳ ວຽກງານຈຸດສຸສຳຄັນ ແລະ ເລັ່ງດ່ວນທີ່ ຂະແໜງການຕ້ອງໄດ້ ເປັນເອກະພາບກັນ, ພ້ອມກັນຮັບຮູ້ເຂົ້າໃຈ ແລະ ຈັດຕັ້ງປະຕິບັດ ໃນໄລຍະທີ່ສະພາບເສດຖະກິດ ປັດຈຸບັນມີຄວາມຜັນຜວນ ຍ້ອນຜົນກະທົບຈາກ ການແຜ່ລະບາດໂຄວິດ-19, ບວກກັບການແກ່ງແຍ້ງແຂ່ງຂັນທາງດ້ານເສດຖະກິດ-ການຄ້າຂອງບັນດາປະເທດມະຫາອຳນາດ, ສົມທົບກັບສະພາບຄວາມບໍ່ສະຫງົບ.

      ພາຍຫຼັງພົບປະເຮັດວຽກກັບພະແນກ ອຄ ແຂວງແລ້ວ, ທ່ານລັດຖະມົນຕີ ພ້ອມດ້ວຍຄະນະ ໄດ້ຍາດເວລາໄປຢ້ຽມຢາມຕິດຕາມສະພາບ ໂຮງງານປຸງແຕ່ງຜະລິດຕະພັນໄມ້ ແລະ ໂຮງງານແປ້ງມັນຕົ້ນ ຂອງແຂວງ ເພື່ອເກັບກຳສະພາບຄວາມຫຍຸ້ງຍາກປິ່ນອ້ອມ ການຜະລິດ ແລະ ສົ່ງອອກ ເຊິ່ງທ່ານລັດຖະມົນຕີ ກໍໄດ້ໃຫ້ຄຳເຫັນແລກປ່ຽນ ແລະ ໃຫ້ທິດຊີ້ນຳຕໍ່ພະແນກ ແລະ ກົມກ່ຽວຂ້ອງ ໃຫ້ຕິດຕາມສະພາບ ແລະ ຄົ້ນຄວ້າຫາວິທີທາງໃຫ້ການຊ່ວຍເຫຼືອແກ່ຫົວໜ່ວຍການຜະລິດດັ່ງກ່າວ.

      ໃນຕອນບ່າຍຂອງວັນດຽວກັນ ທ່ານ ລັດຖະມົນຕີ ພ້ອມດ້ວຍຄະນະ, ໄດ້ພົບປະເຮັດວຽກກັບ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກ, ໂດຍການຕ້ອນຮັບຂອງ ທ່ານ ປອ. ບຸນຍະເດດ ທອງສະຫວັນ, ກໍາມະການພັກແຂວງ, ຫົວໜ້າພະແນກອຸດສາຫະກຳ ແລະ ການຄ້າ ແຂວງຈຳປາສັກ, ມີຄະນະພະແນກ, ອ້າຍເອື້ອຍນ້ອງສະມາຊິກພັກ-ພະນັກງານຫຼັກແຫຼ່ງ ຂອງພະແນກ ອຄ ແຂວງ ເຂົ້າຮ່ວມ ເຊິ່ງໄດ້ຈັດຂຶ້ນທີ່ຫ້ອງປະຊຸມຂອງພະແນກ.

ແຫລ່ງຂໍ້ມູນຂ່າວ: ຫ້ອງການ ກະຊວງ ອຄ

ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ