ໃນວັນທີ 04 ກໍລະກົດ 2022 ທີ່ ໂຮງແຮມ ຄຣາວພລາຊາ, ນະຄອນຫຼວງວຽງຈັນ. ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໄດ້ຈັດ ‘‘ກອງປະຊຸມສ້າງຄວາມຮັບຮູ້ ແລະ ສົນທະນາແລກປ່ຽນ ກ່ຽວກັບການຄຸ້ມຄອງການຄ້າສິນຄ້າສອງດ້ານ ສຳລັບພະນັກງານຜູ້ບໍລິຫານລະດັບສູງຂອງພາກລັດ” ໂດຍການເປັນປະທານຮ່ວມຂອງ ທ່ານ ນ. ຈັນສຸກ ແສງພະຈັນ (ຮອງລັດຖະມົນຕີ, ກະຊວງອຸດສາຫະກຳ ແລະ ການຄ້າ) ແລະ ທ່ານ ນາງ ອີນາ, ມາຈູລີໂອນີແຕ, ເອກອັກຄະລັດຖະທູດສະຫະພາບເອີຣົບປະຈຳ ສປປ ລາວ ພາຍໃຕ້ການສະໜັບສະໜູນຈາກໂຄງການ EU P2P Export Control Programme.
ໜຶ່ງໃນພັນທະຂອງ ສປປ ລາວ ໃນນາມເປັນສະມາຊິກຂອງອົງການສະຫະປະຊາຊາດ (ສປຊ) ແມ່ນການຜັນຂະຫຍາຍຍັດຕິສະພາຄວາມໝັ້ນຄົງ ຂອງອົງການສະຫະປະຊາຊາດ ປີ 2004 (United Nations Security Council – UNSC) ວ່າດ້ວຍການບໍ່ແຜ່ຜາຍອາວຸດທຳລາຍລ້າງຜານ. ໂດຍຍັດຕິດັ່ງກ່າວ ໄດ້ຮຽກຮ້ອງໃຫ້ບັນດາປະເທດສະມາຊິກ ຕ້ອງໄດ້ມີມາດຕະການຕ່າງໆໃນການສະກັດກັ້ນ ແລະ ຫຼຸດຜ່ອນການສະສົມອາວຸດທຳລາຍລ້າງຜານຕ່າໆ ຊຶ່ງປະກອບມີ: ອາວຸດ ເຄມີ, ຊີວະພາບ, ລັງສີ ແລະ ນິວເຄຼຍ ຫຼື ທີ່ເອີ້ນວ່າອາວຸດ CBRN. ສຳລັບມາດຕະການໃນການສະກັດກັ້ນ ແລະ ຫລຸດຜ່ອນ ທີ່ສາກົນ ແລະ ພາກພື້ນໄດ້ຈັດຕັ້ງປະຕິບັດ ແມ່ນການສ້າງລະບົບການຄຸ້ມຄອງສິນຄ້າສອງດ້ານ ຊຶ່ງສິນຄ້າສອງດ້ານນີ້ກໍ່ແມ່ນ ສິນຄ້າ ແລະ ເຕັກໂນໂລຊີ ທີ່ສາມາດນຳໃຊ້ໄດ້ທັງໃນທາງພົນລະເຮືອນ ແລະ ທາງການທະຫານ ຊຶ່ງອາດຖືກນຳໃຊ້ໂດຍກົງ ຫຼື ທາງອ້ອມ ເພື່ອ ອອກແບບ, ພັດທະນາ ຫຼື ຜະລິດ ເປັນອາວຸດທໍາລາຍລ້າງຜານ ຫຼື ລະບົບນຳສົ່ງຂອງອາວຸດທໍາລາຍລ້າງຜານດັ່ງກ່າວ.
ສຳລັບ ສປປ ລາວ ໄດ້ເລີ່ມກະກຽມລະບົບຄຸ້ມຄອງສິນຄ້າສອງດ້ານຢ່າງເປັນທາງການ ນັບແຕ່ປີ 2015 ເປັນຕົ້ນມາ, ໂດຍກະຊວງອຸດສາຫະກຳ ແລະ ການຄ້າ ແລະ ສະຫະພາບເອີີຣົບ ໄດ້ຮ່ວມກັນຈັດກອງປະຊຸມເຜີຍແຜ່ ແລະ ຈັດຝຶກອົບຮົມສ້າງຄວາມເຂັ້ມແຂງ ກ່ຽວກັບການຄຸ້ມຄອງສິນຄ້າສອງດ້ານ ໃຫ້ແກ່ບັນດາເຈົ້າໜ້າທີ່ໆກ່ຽວຂ້ອງ ຂອງ ສປປ ລາວ ລວມທັງການສ້າງນິຕິກຳຄຸ້ມຄອງທີ່ໄດ້ເລີ້ມຕົ້ນສ້າງໃນປີ 2019 ຄື ດຳລັດວ່າດ້ວຍການຄຸ້ມຄອງສິນຄ້າສອງດ້ານ. ໃນໄລຍະຜ່ານມາ ກະຊວງອຸດສາຫະກຳ ແລະ ການຄ້າ ໄດ້ສຸມໃສ່ການສ້າງດຳລັດດັ່ງກ່າວ ຮ່ວມກັບບັນດາກະຊວງທີ່ກ່ຽວຂ້ອງ ໂດຍໄດ້ມີການແຕ່ງຕັ້ງຄະນະຮັບຜິດຊອບດຳລັດນີ້ ສະເພາະ. ມາຮອດປະຈຸບັນ, ການປັບປຸງຮ່າງດຳລັດດັ່ງກ່າວໄດ້ສຳເລັດສົມບູນທາງດ້ານວິຊາການແລ້ວ ແລະ ຂັ້ນຕອນຕໍ່ໄປ ກະຊວງອຸດສາຫະກຳ ແລະ ການຄ້າ ຈະໄດ້ນຳສົ່ງຮ່າງດຳລັດດັ່ງກ່າວ ໃຫ້ກະຊວງຍຸຕິທຳ ເພື່ອກວດກາຄວາມສອດຄ່ອງທາງດ້ານນິຕິກຳ ກ່ອນທີ່ຈະຍື່ນໃຫ້ຫ້ອງການສຳນັກງານນາຍົກລັດຖະມົນຕີ ເພື່ອພິຈາລະນາເອົາເຂົ້າຜ່ານໃນກອງປະຊຸມຂອງລັດຖະບານ.
ສຳລັບຈຸດປະສົງຂອງກອງປະຊຸມຄັ້ງນີ້ ແມ່ນ 1) ເພື່ອສ້າງຄວາມຮັບຮູ້ເພີ້ມຕື່ມກ່ຽວກັບລະບົບການຄຸ້ມຄອງສິນຄ້າສອງດ້ານ ຊຶ່ງຄັ້ງນີ້ໄດ້ເນັ້ນຈັດໃຫ້ແກ່ບັນດາຂະແໜງການພາກລັດໂດຍສະເພາະຂັ້ນຄະນະກົມຜູ້ຊີ້ນຳວຽກງານດັ່ງກ່າວ ແລະ 2) ເພື່ອເປີດໂອກາດໃນການສົນທະນາແລກປ່ຽນກັນຕື່ມ ກ່ຽວກັບວຽກງານການຄຸ້ມຄອງສິນຄ້າສອງດ້ານ.
ແຫລ່ງຂ່າວ: ກົມການນໍາເຂົ້າ ແລະ ສົ່ງອອກ ກຊ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
