ໃນຕອນເຊົ້າເວລາ 9:30 ໂມງ ຂອງວັນທີ 4 ກໍລະກົດ 2022, ທີ່ຫ້ອງຮັບແຂກໃຫຍ່ ຊັ້ນ04 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ Annette KNOBLOCH, ເອກອັກຄະລັດຖະທູດ ເຢຍລະມັນ ປະຈໍາ ສປປ ລາວ ໃນໂອກາດເຂົ້າພົບປະ ປຶກສາຫາລືທົບທວນຄືນດ້ານການຄ້າ-ການລົງທຶນພື້ນຖານໂຄງລ່າງ ຢູ່ສປປ ລາວ ແລະ ໃນໂອກາດທີ່ທ່ານໄດ້ຮັບການແຕ່ງຕັ້ງ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ ຜູ້ໃໝ່; ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ ນາງ Annette KNOBLOCH, ເອກອັກຄະລັດຖະທູດ ເຢຍລະມັນ ປະຈໍາ ສປປ ລາວ ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງ ທ່ານ ທູດ ໄດ້ສົນທະນາກ່ຽວກັບວຽກງານການຮ່ວມມື ລະຫວ່າງ ສປປ ລາວ- ສສ. ເຢຍລະມັນ ທີ່ມີການພົວພັນເສີ່ມສ້າງທີ່ດີຍາວນານເປັນໄລຍະເວລາຄົບຮອບ 60 ປີ, ດ້ານວັດທະນາທໍາ, ດ້ານສັງຄົມ ແລະ ດ້ານເສດຖະກິດເປັນຕົ້ນ ລະຫວ່າງ ສປປ ລາວ ແລະ ສສ. ເຢຍລະມັນ ໃນນີ້ມູນຄ່າການຄ້າສອງຝ່າຍ 5 ເດືອນ ຕົ້ນປີ 2022 ສາມາດປະຕິບັດໄດ້ 49.3 ລ້ານໂດລາສະຫະລັດ, ໃນນັ້ນ ມູນຄ່າການນໍາເຂົ້າປະຕິບັດໄດ້ 7.4 ລ້ານໂດລາສະຫະລັດ ແລະ ມູນຄ່າການສົ່ງອອກປະຕິບັດໄດ້ 41.8 ລ້ານໂດລາສະຫະລັດ. ສິນຄ້າຫຼັກທີ່ ສປປ ລາວ ນໍາເຂົ້້າ ຈາກ ສສ. ເຢຍລະມັນ ໃນ 5 ເດືອນຕົ້ນປີ 2022 ປະກອບມີ: ຜະລິດຕະພັນອຸດສາຫະກໍາທັນຍາພືດ, ເຂົ້າ, ສາລີ; ພາຫະນະທາງບົກ (ນອກຈາກລົດຈັກ,ລົດໄຖ); ກາກ ແລະ ສິ່ງເສດເຫືຼອຈາກອຸດສາຫະກໍາຜະລິດອາຫານ; ເຄື່ືອງນຸ່ງຫົົ່ມ; ເມັດພືດ ແລະ ໝາກໄມ້ທີ່ມີນໍ້າມັນ; ເຄືື່ອງມື ແລະ ອຸປະກອນທັດສະນະສາດ; ແລະ ສິນຄ້າ ອື່ນໆ. ສິນຄ້າຫຼັກທີ່ ສປປ ລາວ ສົ່ງອອກ ສສ. ເຢຍລະມັນ ປະກອບມີ: ເຄື່ອງນຸ່ງຫົ່ມ; ກາເຟ (ບໍ່ທັນໄດ້ປຸງແຕ່ງ); ເກີບ; ເຄື່ອງສໍາລັບການເດີນທາງ; ຊາ (ບໍ່ທັນໄດ້ປຸງແຕ່ງ), ຂີ້ຄັງ, ຍານ, ຂີ້ຊີ, ໄໝ ແລະ ອື່ນໆ. ນອກຈາກນີ້ທັງສອງຝ່າຍຍັງແລກປ່ຽນຄໍາຄິດຄໍາເຫັນຢ່າງກົງໄປກົງມາໃນຫຼາຍດ້ານເພື່ອຊອກຫາທາງອອກໃນອະນາຄົດໃຫ້ໄດ້ປັບປຸງວຽກງານການຮ່ວມມືຂອງສອງຝ່າຍ ດີຂຶ້ນກວ່າເກົ່າໃນຕໍ່ໜ້າ.
ພ້ອມດຽວກັນນີ້, ທ່ານ ນາງ Annette KNOBLOCH, ເອກອັກຄະລັດຖະທູດ ເຢຍລະມັນ ປະຈໍາ ສປປ ລາວ ໄດ້ສະແດງຄວາມຍິນດີຕໍ່ທ່ານລັດຖະມົນຕີ ທີ່ໄດ້ມາຮັບຕໍາແໜ່ງໜ້າທີ່ໃໝ່ ແລະ ໃຫ້ຄໍາໝັ້ນວ່າ ໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ສສ. ເຢຍລະມັນ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດ.
ພາບ-ຂ່າວ ໂດຍ: ໄ ພຄໍາອີ ສູນສະຖິຕິ ແລະ ຂໍ້ມູນຂ່າວສານ ກຜຮ/ກະຊວງ ອຄ.
