ຕອນບ່າຍຂອງວັນທີ 08 ກໍລະກົດ 2022, ທີ່ກະຊວງ ອຸດສາຫະກໍາ ແລະ ການຄ້າ ໄດ້ຈັດພິທີທໍາລາຍສິນຄ້າໝົດອາຍຸການນໍາໃຊ້ ແລະ ສິນຄ້າຫ້າມຜະລິດ, ນໍາເຂົ້າ, ສົ່ງຜ່ານ, ຊື້-ຂາຍ ປະເພດຢາສູບໄຟຟ້າ ໂດຍການເຂົ້າຮ່ວມຂອງທ່ານ ນ ຈັນສຸກ ແສງພະຈັນ ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ, ທ່ານ ພູວຽງ ພົງສາ ຫົວໜ້າກົມການຄ້າພາຍໃນ ພ້ອມນີ້ມີຜູ້ຕາງໜ້າຈາກພະແນກກ່ຽວຂ້ອງຂອງກົມການຄ້າພາຍໃນ, ກົມກວດກາ ກະຊວງ ອຄ, ກົມອາຫານ ແລະ ຢາ ກະຊວງສາທາລະນະສຸກ, ແລະ ນັກຂ່າວຈໍານວນໜຶ່ງ, ເຂົ້າຮ່ວມປະມານ 15 ທ່ານ.

ປະຕິບັດຕາມແຜນປົກກະຕິ, ຕາມແຫຼ່ງຂ່າວ ແລະ ເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ບໍລິໂພກ-ຊົມໃຊ້. ໃນຕົ້ນເດືອນເມສາ ປີ 2022 ຜ່ານມາ, ກົມການຄ້າພາຍໃນ ໃນນາມອົງການຈັດຕັ້ງປະຕິບັດວຽກງານກວດກາການຄ້າ ຂັ້ນສູນກາງ ໄດ້ແຕ່ງຕັ້ງເຈົ້າໜ້າທີ່ກວດກາການຄ້າ ລົງເຄື່ອນໄຫວຕິດຕາມກວດກາຕາມແຫຼ່ງ ທີ່ມີການໂຄສະນາການຊື້-ຂາຍຢາສູບໄຟຟ້າ ທາງອອນລາຍ ເຊິ່ງເປັນຜະລິດຕະພັນຫ້າມຜະລິດ, ນໍາເຂົ້າ, ສົ່ງຜ່ານ, ຊື້-ຂາຍ ຕາມທີ່ໄດ້ກໍານົດໄວ້ໃນຂໍ້ 2 ມາດຕາ 48 ພາກ 8 ຂອງກົດໝາຍວ່າດ້ວຍການຄວບຄຸມຢາສູບ ສະບັບເລກທີ 09/ສພຊ, ລົງວັນທີ 16 ພະຈິກ 2021 ແລະ ມີການຈໍາໜ່າຍສິນຄ້າທີ່ໝົດອາຍຸຕາມຫ້າງຊັບພະສິນຄ້າ. ຜ່ານການລົງກວດກາຕົວຈິງ ຂອງເຈົ້າໜ້າທີ່ກວດກາການຄ້າ ແມ່ນພົບເຫັນຫົວໜ່ວຍ ທຸລະກິດທີ່ມີການຈໍາໜ່າຍສິນຄ້າ ເຊິ່ງເປັນຜະລິດຕະພັນ ເຄື່ອງສໍາອາງປະເພດ: ໂຟມລ້າງໜ້າ, ຄີມທາຜິວ, ລິບສະຕິກ, ຢາສີດຜົມ, ໂລຊັ້ນກັນແດດ, ແປ້ງ ແລະ ອື່ນໆ ທີ່ໝົດອາຍຸການນໍາໃຊ້ມີ 23 ລາຍການ, ຫ້າຮ້ອຍກວ່າກ່ອງ/ກັບ ລວມມູນຄ່າ 10.200.000 ກີບ. ຢາສູບໄຟຟ້າພ້ອມດ້ວຍອຸປະກອນ, ນໍ້າຢາຕື່ມຢາສູບ ຈໍານວນ 226 ອັນ ລວມມູນຄ່າ 22.635.000 ກີບ ສິນຄ້າ, ຜະລິດຕະພັນດັ່ງກ່າວ ເປັນສິນຄ້າໝົດອາຍຸການນໍາໃຊ້, ບໍ່ມີເອກະສານຢັ້ງຢືນແຫຼ່ງທີ່ມາ ບໍ່ຮັບປະກັນຄວາມປອດໄພແກ່ຜູ້ຊົມໃຊ້, ສະເພາະຢາສູບໄຟຟ້າ ກໍເປັນຜະລິດຕະພັນທີ່ຫ້າມການຜະລິດ, ນໍາເຂົ້າ ແລະ ຊື້-ຂາຍ ຢູ່ສປປ ລາວ.

ຕໍ່ກັບບັນຫາດັ່ງກ່າວ ຖືເປັນການລະເມີດກົດໝາຍ ແລະ ລະບຽບການ ສະນັ້ນ, ຄະນະລົງກວດກາ ຈຶ່ງໄດ້ຍຶດສິນຄ້າ, ຜະລິດຕະພັນດ່ັງກ່າວມາທໍາລາຍ ນີ້ກໍເພື່ອປົກປ້ອງຜົນປະໂຫຍດອັນຊອບທໍາໃຫ້ແກ່ຜູ້ຊົມໃຊ້ ແລະ ເປັນການປ້ອງກັນສຸຂະພາບ ແລະ ຈັດຕັ້ງປະຕິບັດກົດໝາຍຄວບຄຸມຢາສູບໃຫ້ປະກົດຜົນເປັນຈິງ. ພ້ອມດຽວກັນນັ້ນກໍໄດ້ມີມາດຕະການຕໍ່ຫົວໜ່ວຍທຸລະກິດທີ່ລະເມີດ ຕາມກົດໝາຍ ແລະ ລະບຽບການຢ່າງເຂັ້ມງວດ.

ໃນຕໍ່ໜ້າອົງການປະຕິບັດວຽກງານກວດກາການຄ້າ, ກົມການຄ້າພາຍໃນ ຈະໄດ້ລົງຊຸກຍູ້ການຈັດຕັ້ງວຽກງານກວດກາການຄ້າ ຢູ່ຂັ້ນທ້ອງຖິ່ນ ໃນຂອບເຂດທົ່ວປະເທດ ໃຫ້ມີການເຄື່ອນໄຫວຢ່າງເປັນປົກກະຕິຕາມແຜນປະຈໍາເດືອນ, ງວດ, ປີ ແລະ ຈະສືບຕໍ່ຊອກແຫຼ່ງຂ່າວ, ແຫຼ່ງທີ່ມາ, ແຫຼ່ງຈໍາໜ່າຍສິນຄ້າປະເພດດັ່ງກ່າວເປັນປະຈໍາ ເພື່ອເປັນການປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້ ໃຫ້ໄດ້ຮັບຄວາມຍຸຕິທໍາ ແລະ ຫັນຫົວໜ່ວຍທຸລະກິດເຂົ້າສູ່ລະບຽບກົດໝາຍ.

ແຫຼ່ງຂ່າວ: ພະແນກກວດກາການຄ້າ ກົມການຄ້າພາຍໃນ

ພາບ-ຮຽບຮຽງໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກຜຮ