ໃນຕອນເຊົ້າເວລາ 8:30 ໂມງ ຂອງວັນທີ 22 ກໍລະກົດ 2022 ສະຫະພັນແມ່ຍິງກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສຳມະນາສ້າງຄວາມເຂັ້ມແຂງດ້ານການຈັດຕັ້ງ ແລະ ສ້າງທັກສະເປັນຜູ້ນຳ ໃຫ້ແກ່ແມ່ຍິງພາຍໃຕ້ຫົວຂໍ້: “ການເປັນຜູ້ນຳຍຸກໃໝ່ ນຳພາຄອງໃຈ”, ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ 20 ກໍລະກົດ ຄົບຮອບ 67 ປີ (20 ກໍລະກົດ 1955 – 20 ກໍລະກົດ 2022) ທີ່ ໂຮງແຮມແລນມາກ ໂດຍການເປັນປະທານຮ່ວມ ທ່ານ ນ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ນ ສົມໝາຍ ພົມູນິວົງ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ກະຊວງອຸດສາຫະກຳ ແລະ ການຄ້າ ມີຜູ້ເຂົ້າຮ່ວມພິທີ 200 ສະຫາຍ ແລະ ມີໜ່ວຍເຂົ້າຮ່ວມທັງໝົດ 23 ໜ່ວຍ
ຈຸດປະສົງກອງປະຊຸມຄັ້ງນີ້ ເວົ້າລວມເພື່ອເປັນການຈັດຕັ້ງຜັນຂະຫຍາຍ 10 ແຜນງານ 65 ໂຄງການ ຂອງ ສູນກາງສະຫະພັນແມ່ຍິງລາວ, ເວົ້າສະເພາະ ແມ່ນສະຫຼຸບຕີລາຄາປະເມີນຜົນການຈັດຕັ້ງປະຕິບັດຂໍ້ແຂ່ງຂັ້ນ 3 ດີ ຂອງສະຫະພັນແມ່ຍິງກະຊວງອຸດສາຫະກຳ ແລະ ການຄ້າ ໃຫ້ມີລັກສະນະຕໍ່ເນື່ອງ ແລະ ຕິດພັນກັບຂະບວນການແຂ່ງຂັນຮັກຊາດ-ພັດທະນາ ຂອງກົມກອງເປັນຂະບວນຟົດຟື້ນ, ມີປະສິດທິພາບ ແລະ ໄດ້ຮັບຜົນສຳເລັດຕາມລະດັບຄາດໝາຍ.
ຜ່ານການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງເອື້ອຍນ້ອງແມ່ຍິງບັນດາໜ່ວຍ ມີບຸກຄົນເຂົ້າຮ່ວມແຂ່ງຂັນທັງໝົດມີ 559 ສະຫາຍ ແລະ ມີໜ່ວຍເຂົ້າຮ່ວມທັງໝົດ 23 ໜ່ວຍ ຊຶ່ງສາມາດປະເມີນຜົນການຈັດຕັ້ງປະຕິບັດຕາມມາດຖານຂອງ (ພົນລະເມືອງດີ, ພັດທະນາດີ ແລະ ສ້າງຄອບຄົວດີ) ແລະ ໄດ້ມີການມອບໃບຍ້ອງຍໍບຸກຄົນ 3 ດີ ໃຫ້ແກ່ສະມາຊິກສະຫະພັນແມ່ຍິງກະຊວງ ອຄ ເຊີ່ງເປັນກຽດມອບໂດຍ: ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຄ ດັ່ງນີ້:
- ປະເພດບຸກຄົນຄັດເລືອກໄດ້ດັ່ງນີ້:
- ບຸກຄົນ 3 ດີປະເພດ 1 ມີ: 504 ສະຫາຍ, ກວມ 90,16% ຂອງຜູ້ເຂົ້າຮ່ວມແຂ່ງຂັນທັງໝົດ 559 ສະຫາຍ.
- ບຸກຄົນ 3 ດີ ປະເພດ 2 ມີ: 55 ສະຫາຍ, ກວມ 9,83% ຂອງຜູ້ເຂົ້າຮ່ວມແຂ່ງຂັນທັງໝົດ 559 ສະຫາຍ.
- ປະເພດໜ່ວຍ 3 ດີ ຄັດເລືອກໄດ້ດັ່ງນີ້: ມີ 23 ໜ່ວຍເຂົ້າແຂ່ງຂັນ.
- ໜ່ວຍ 3 ດີ ປະເພດ 1 ມີ: 21 ໜ່ວຍ, ກວມ 91,30%
- ໜ່ວຍ 3 ດີ ປະເພດ 2 ມີ: 2 ໜ່ວຍ, ກວມ 8,69%
ເພື່ອເປັນການສືບຕໍ່ຈັດຕັ້ງປະຕິບັດວຽກງານຂະບວນການແຂ່ງຂັນ 3 ດີຕາມເອກະສານແນະນຳກ່ຽວກັບການຈັດຕັ້ງ ໄດ້ກຳນົດທິດທາງໃນຕໍ່ໜ້າ ຄື:
ປະຕິບັດຂໍ້ແຂ່ງຂັນ 3 ດີຂອງສູນກາງສະຫະພັນແມ່ຍິງລາວ, ຄະນະບໍລິຫານງານສະຫະພັນແມ່ຍິງກະຊວງອຸດສາຫະກຳ ແລະ ການຄ້າ, ຄະນະໜ່ວຍສະຫະພັນແມ່ຍິງອ້ອມຂ້າງກະຊວງຈະສືບຕໍ່ແຂ່ງຂັນກັນຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີໃຫ້ມີປະສິດທິຜົນສູງ ຊຶ່ງໄດ້ຈັດຕັ້ງປະຕິບັດວຽກງານດັ່ງນີ້:
1.ຄະນະບໍລິຫານງານສະຫະພັນແມ່ຍິງກະຊວງຈະສືບຕໍ່ຈັດຕັ້ງເຜີຍແຜ່ເອກະສານແນະນຳ ແລະ ແຈ້ງການຂອງສູນ
ກາງສະຫະພັນແມ່ຍິງລາວກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 3 ດີ ໃຫ້ແກ່ຄະນະໜ່ວຍລວມທັງເອື້ອຍນ້ອງແມ່ຍິງບັນດາໜ່ວຍອ້ອມຂ້າງໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງທົ່ວເຖິງ.
2. ຄະນະໜ່ວຍສະຫະພັນແມ່ຍິງອ້ອມຂ້າງຈະຕ້ອງໄດ້ນຳເອົາເນື້ອໃນວຽກງານດັ່ງກ່າວໄປຜັນຂະຫຍາຍໃຫ້ແກ່ສະມາຊິກທີ່ຢູ່ໃນຂອບເຂດຄວາມຮັບຜິດຊອບຂອງຕົນ ສ້າງເປັນແຜນການລະອຽດ ເພື່ອພ້ອມກັນຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີໃຫ້ສອດຄ່ອງກັບສະພາບຈຸດພິເສດ ແລະ ເງື່ອນໄຂຕົວຈິງຂອງກົມກອງຂອງຕົນ ໂດຍປະສານສົມທົບກັບຄະນະພັກ, ອຳນາດານປົກຄອງຂັ້ນຂອງຕົນຢ່າງລະອຽດຈະແຈ້ງ ເພື່ອຮັບປະກັນໃນການຈັດຕັ້ງປະຕິບັດໃຫ້ເປັນຂະບວນການຟົດຟື້ນ, ພົ້ນເດັ່ນ ແລະ ມີປະສິດທິຜົນສູງກວ່າເກົ່າ.
3. ເອົາແຜນການຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບການຈັດຕັ້ງປະຕິບັດວຽກງານວິຊາສະເພາະ ແລະ ຂະ
ບວນການຕ່າງໆຂອງອົງການຈັດຕັ້ງມະຫາຊົນອື່ນໆ ໃນກົມກອງຂອງຕົນ ໂດຍສະເພາະແມ່ນຕິດພັນກັບແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຂະບວນການແຂ່ງຂັນຮັກຊາດ ແລະ ພັດທະນາທີ່ຕິດພັນກັບວຽກງານ 3 ສ້າງ.
4. ສືບຕໍ່ເປີດຂະບວນການແຂ່ງຂັນ 3 ດີຂອງບັນດາໜ່ວຍສະຫະພັນແມ່ຍິງຊຸມປີຕໍ່ໜ້າໃຫ້ປະກົດຜົນເປັນຈິງ.
5. ຄະນະສະຫະພັນແມ່ຍິງແຕ່ລະຂັ້ນຈະໄດ້ພ້ອມກັນເອົາໃຈໃສ່ ແລະ ເປັນເຈົ້າການໃນການຕິດຕາມ, ຊຸກຍູ້ການຈັດຕັ້ງປະຕິບັດຂໍ້ແຂ່ງຂັນ 3 ດີ ແລະ ປະເມີນຜົນເພື່ອສະຫຼຸບລາຍງານໃຫ້ຂັ້ນເທິງທັນກັບເວລາທີ່ກຳນົດໄວ້, ໂດຍໃຫ້ແຕ່ລະໜ່ວຍລາຍງານວຽກ 3 ດີ ໃນກອງປະຊຸມສ່ອງແສງປະຈຳໄຕມາດ ແລະ ສະຫະພັນແມ່ຍິງກະຊວງລາຍງານໃຫ້ສູນກາງສະຫະພັນແມ່ຍິງລາວປະຈຳ 6 ເດືອນ ແລະ ປະຈຳປີ.
ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຄ ຍັງໄດ້ໂອ້ລົມຕໍ່ກອງປະຊຸມໂດຍສະເພາະຕ້ອງເອົາໃຈໃສ່: ພ້ອມກັນບຸກບືນປະກອບສ່ວນຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ XI ຂອງສູນກາງພັກ ແລະ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ອຄ ໃຫ້ໄດ້ຮັບຜົນຕາມລະດັບຄາດໝາຍ ທີ່ໄດ້ວາງໄວ້, ປະຕິບັດມະຕິກອງປະຊຸມໃຫຍ່ແມ່ຍິງລາວທົ່ວປະເທດຄັ້ງທີ VIII ໃຫ້ໄດ້ຮັບຜົນ, ສືບຕໍ່ສຶກສາອົບຮົມການເມືອງແນວຄິດໃຫ້ມີຄວາມໜັກແໜ້ນ, ຮັກສາໄດ້ຄວາມສາມັກຄີເປັນເອກະພາບ ແລະ ຮັກສາມູນເຊື້ອວັດທະນາທຳອັນດີງາມຂອງແມ່ຍິງລາວ ແລະ ຕັ້ງໜ້າພັດທະນາຕົນເອງໃນທຸກດ້ານ ເປັນຕົ້ນແມ່ນ: ດ້ານທິດສະດີການເມືອງ, ດ້ານວິຊາສະເພາະ, ດ້ານພາສາຕ່າງປະເທດ, ເອົາໃຈໃສ່ພັດທະນາແບບແຜນການດຳລົງຊີວິດ, ຮູ້ສ້າງເສດຖະກິດຄອບຄົວ ເພິ່ງຕົນເອງກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ເພື່ອຫຼຸດພົ້ນອອກຈາກຄວາມທຸກຍາກໄປເທື່ອລະກ້າວ.
ທ່ານຍັງເວົ້າຕື່ມອີກວ່າ: ເວົ້າລວມເວົ້າສະເພາະແລ້ວຕ້ອງໄດ້ພ້ອມກັນຝຶກຝົນຫຼໍ່ຫຼອມຕົນເອງໃຫ້ກ່າຍເປັນແມ່ຍິງ 3 ດີ (ພັດທະນາດີ, ພົນລະເມືອງດີ ແລະ ສ້າງຄອບຄົວດີ) ເພື່ອພ້ອມກັນກ້າວໜ້າ ແລະ ໃຫ້ກາຍເປັນພະນັກງານສືບທອດທີ່ມີຕຸນສົມບັດ ແລະ ຄວາມຮູ້, ຄວາມສາມາດໃຫ້ທຽບທັນກັບການປ່ຽນແປງໃໝ່ໃນແຕ່ລະໄລຍະ, ນອກຈາກນີ້ແລ້ວຂໍຮຽກຮ້ອງໃຫ້ອົງການຈັດຕັ້ງທຸກພາກສ່ວນ ຈົ່ງພ້ອມກັນເອົາໃຈໃສ່ ຊຸກຍູ້ສົ່ງເສີມແມ່ຍິງທີ່ມີຄວາມຮູ້, ຄວາມສາມາດໃຫ້ໄດ້ເຂົ້າໃນຕຳແໜ່ງນຳພາ-ຄຸ້ມຄອງ ເທົ່າທຽມກັບເພດຊາຍ ເພື່ອໃຫ້ກາຍເປັນຜູ້ນຳທີ່ມີປະສິດພາບ ແລະ ຮັບປະກັນສິດສະເໝີພາບບົດບາດ ຍິງ-ຊາຍ.
ຂ່າວ: ນ.ເພັດປະກາຍ ສີສົມບູນ
ພາບ: ໄພວັນ ໂຄດວັນທາ
