ໃນຕອນບ່າຍ ຂອງວັນທີ 03 ສິງຫາ 2022, ເວລາ 15:30 ໂມງ ທີ່ ຫ້ອງຮັບແຂກ ຊັ້ນ 4 ກະຊວງອຸດສາຫະກຳ ແລະ ການຄ້າ, ທ່ານ keijo Ensio Norvanto (ເຄໂຈ ເອັນຊິໂອ ນໍແວນໂຕ), ເອກອັກຄະລັດຖະທູດ ແຟັງລັງ ປະຈຳ ສປປ ລາວ ໄດ້ເຂົ້າຢ້ຽມຂໍ່ານັບ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໃນໂອກາດທີ່ມາດຳລົງຕໍາແໜ່ງເປັນເອກອັກຄະລັດຖະທູດ ປະຈຳ ສປປ ລາວ ຄົນໃຫມ່. ເປັນກຽດເຂົ້າຮ່ວມມີບັນດາ ທ່ານຫົວໜ້າຫ້ອງການ ຫົສໜ້າກົມ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 15 ທ່ານ.
ໃນການພົບປະຄັ້ງນີ້ ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ກ່າວສະແດງຄວາມຍິນດີ ແລະ ຊົມເຊີຍຕໍ່ການດຳລົງຕໍາແໜ່ງເປັນເອກອັກຄະລັດຖະທູດ ແຟັງລັງ ປະຈຳ ສປປ ລາວ ຄົນໃຫມ່ ເຊີ່ງເປັນໂອກາດທີ່ດີ ເພື່ອເປັນການເສີມຂະຫຍາຍ ສາຍພົວພັນການຮ່ວມມືທັງສອງຝ່າຍ ລາວ-ແຟງລັງ ໃຫ້ມີຄວາມແນ້ນແຟ້ນໃຫ້ດີກວ່າເກົ່າ ໂດຍນັບຕັ້ງແຕ່ສ້າງສາຍພົວພັນການທູດນຳກັນ ໃນວັນທີ 21 ມັງກອນ 1975 ເປັນຕົ້ນມາ ເວົ້າເຖິງການລົງທຶນ ນັບແຕ່ປີ 2008 ຮອດປັດຈຸບັນ ການລົງທຶນຂອງ ແຟັງລັງ ໃນ ສປປ ລາວ ມີຈໍານວນວິສາຫະກິດທັງໝົດ 4 ຫົວໜ່ວຍ ແລະ ມີມູນຄ່າການລົງທຶນທັງໝົດປະມານ 75,2 ຕື້ກີບ. ເຊິ່ງຂະແຫນງການທີ່ມາລົງທືນແມ່ນມີ: ກະສິກຳ, ປ່າໄມ້ ແລະ ການປະມົງ. ການສະຫນອງໄຟຟ້າ, ອາຍແກັສ, ອາຍຮ້ອນ, ແລະ ອາກາດປັບແຕ່ງ. ໃນນັ້ນທາງ ສປປ ລາວ ເຮົາກໍ່ໄດ້ ສົ່ງອອກເຄື່ອງນຸ່ງຫົ່ມ ແລະ ກາເຟເມັດ ໃນປີ 2020 ແລະ ສົ່ງອອກນ້ຳຕານ ໃນປີ 2021 ໄປຍັງ ແຟັງລັງ, ສ່ວນສິນຄ້າຕົ້ນຕໍທີ່ ສປປ ລາວ ນຳເຂົ້າຈາກ ແຟັງລັງ ກໍ່ປະກອບດ້ວຍ ພາຫະນະທາງບົກ ແລະ ຊີ້ນສ່ວນອາໄຫຼ່, ອາຫານເສີມສຳລັບຜະລິດອາຫານສັດ, ເຄື່ອງໄຟຟ້າ ແລະ ອຸປະກອນກົນຈັກ
ທ່ານ keijo Ensio Norvanto (ເຄໂຈ ເອັນຊິໂອ ນໍແວນໂຕ), ເອກອັກຄະລັດຖະທູດ ແຟັງລັງ ປະຈຳ ສປປ ລາວ ກໍ່ໄດ້ກ່າວເຖິງ ສະພາບການຮ່ວມມືສອງຝ່າຍ ມາເຖິງປັດຈຸບັນ ເຫັນວ່າແມ່ນມີການພົວພັນໄມຕີຈິດມິດຕະພາບ ແລະ ການຮ່ວມມືທີ່ສ້າງສັນ, ຜ່ານມາ ລັດຖະບານແຟງລັງ ໄດ້ເຫັນຄວາມສຳຄັນຂອງ ລັດຖະບານລາວ ມາໂດຍຕະຫຼອດ, ການພົວພັນຮ່ວມມືລະຫວ່າງ ສອງປະເທດມາຮອດປັດຈຸບັນ ແມ່ນຢູ່ໃນລະດັບດີ; ສະແດງອອກຢູ່ບ່ອນວ່າ ລັດຖະບານແຟງລັງ ສືບຕໍ່ໃຫ້ການຊ່ວຍເຫຼືອແກ່ ລັດຖະບານລາວ ທັງໃນກອບສອງຝ່າຍ ແລະ ຫຼາຍຝ່າຍ ດັ່ງນັ້ນ, ລັດຖະບານມີຄວາມມຸ້ງມາດປາດຖະໜາຈະຍາດແຍ່ງ ແລະ ຂົນຂວາຍໃຫ້ ມາລົງທຶນຄ້າຂາຍ ແລະ ຮ່ວມມືໃນຂະແໜງການຕ່າງໆ ທີ່ ແຟງລັງ ມີທ່າແຮງ ກໍຄື ສອງປະເທດເຫັນວ່າມີຜົນປະໂຫຍດຮ່ວມກັນ.
ທ່ານລັດຖະມົນຕີ ກະຊວງ ອຸດສາຫະກຳ ແລະ ການຄ້າ ກ່າວວ່າ ສອງປະເທດ ລາວ-ຟິນແລນ ມີອັນຄືກັນ ແລະ ຕ່າງກັນ ຟິນແລ່ນ ມີບົດຮຽນໃນການພັດທະນາຫຼາຍ ສາມາດແລກປ່ຽນບົດຮຽນກັນ ໃນການຮ່ວມມືໃນຕໍ່ໜ້າ ໂດຍສະເພາະບົດຮຽນທີ່ມີຜົນສຳເລັດສາມາດມາໝູນໃຊ້ໃນປະເທດລາວ ຟິນແລ່ນ ເປັນປະເທດທີມີການສຶກສາທີ່ດີຫຼາຍ ເປັນລະບົບສຶກສາແບບເປີດ ຊຸກຍູ້ຫົວຄິດປະດິດສ້າງ ດ້ານນະວັດຕະກຳຫຼາຍ ເຫັນວ່າເປັນບົດຮຽນພື້ນຖານໃນການພັດທະນາຊັບພະຍາກອນມະນຸດ ເປັນໂອກາດໃນການລົງທຶນໃນດ້ານການສຶກສາ 2) ຟິນແລ່ນ ມີການພັດແບບຍືນຍົງ ມີຊື່ສຽງໃນປົກປັກຮັກສາສິ່ງແວດລ້ອມ ປ້່າໄມ້ ຊຶ່ງລາວກໍ່ມີທິດພັດທະນາ ແບບສີຂຽວ 3) ການທ່ອງທ່ຽວ ກໍແມ່ນຂົງເຂດໜຶ່ງ ທີ່ຈະຊຸກຍູ້ໃຫ້ນັກທຸລະກິດ ເຂົ້າມາສຶກສາເບິ່ງລົງທຶນ ພັດທະນາ ສົ່ງເສີມດ້ານການທ່ອງທ່ຽວ ນອກນັ້ນກໍເນັ້ນເຖິງທ່າແຮງໃນການລົງທຶນໃນອຸດສາຫະກຳປຸງແຕ່ງ ແລະ ການສະໜັບໜູນເງິນທຶນໃຫ້ແກ່ສົ່ງເສີມວິສາຫະກິດຂະໜາດນ້ອຍ ແລະ ກາງ. ສະພາການຄ້າ ແລະ ອຸດສາຫະກຳແຫ່ງຊາດ ກໍ່ເປັນຂົວຕໍ່ລະຫວ່າງ ພາກທຸລະກິດ ກັບກະຊວງອຸດສາຫະກຳ ແລະ ການຄ້າ ມີກົນການການປະຊຸມ ມີສະມາຄົມທຸລະກິດຕ່າງໆ ເປັນເວທີທີ່ ນັກລົງທຶນສາມາດເຂົ້າມາແລກປ່ຽນນຳກັນ. ສຳລັບກະຊວງອຸດສາຫະກຳ ແລະ ການຄ້າ ກໍມີນິຄົມ VITA PARK.
ຂ່າວ: ເພັດປະກາຍ ສີສົມບູນ
ພາບ: ໄພຄຳອີ ວິໄລຄຳ
