ຕອນເຊົ້າ ເວລາ 9: 00 ໂມງ ຂອງວັນທີ 8 ກັນຍາ 2022 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Dr. Peter Haymond, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສະຫະລັດອາເມລິກາ ປະຈຳ ສປປ ລາວ ພ້ອມດ້ວຍຄະນະມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ Dr. Peter Haymond, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ທີ່ມີອຳນາດເຕັມແຫ່ງ ສະຫະລັດອາເມລິກາ ປະຈໍາສປປ ລາວ ເພື່ອເຮັດໃຫ້ສອງປະເທດ ລາວ-ອາເມລິກາ ໄດ້ພົວພັນຮ່ວມມື ແລະເສີມສ້າງສາຍພົວພັນທີ່ດີ ຊຶ່ງກັນ ແລະ ກັນ, ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນ ການລົງທຶນໃນພື້ນຖານໂຄງລ່າງ, ການຮ່ວມມື, ການຄ້າ ແລະ ວັດທະນາທຳ ໃຫ້ແກ່ລາວ. ນອກນັ້ນຍັງໄດ້ປຶກສາຫາລືກັນໃນວຽກງານຫຼາຍດ້ານທີ່ປິ່ນອ້ອມ ທາງດ້ານເສດຖະກິດໃຫ້ແກ່ ສປປ ລາວ ໃນໄລຍະຜ່ານມາທີ່ໄດ້ລົງທຶນໃສ່ຂົງເຂດເສດຖະກິດຂອງລາວ ໃນນີ້ ທ່ານ Dr. Peter Haymond, ເອກອັກຄະລັດຖະທູດກໍ່ໄດ້ສະເໜີໃນຕໍ່ໜ້າຈະເພີ່ມທະວີການຮ່ວມມື ລະຫວ່າງ ສະຫະລັດ ອາເມລິກາ ແລະ ສປປ ລາວ ພ້ອມທັງໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານທີ່ມີປະໂຫຍດສູງສຸດ.
ທ່ານ Dr. Peter Haymond, ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ທີ່ໃຫ້ຄໍາປຶກສາຫາລືຢ່າງກົງໄປກົງມາເປັນປະໂຫຍດໃຫ້ແກ່ສອງປະເທດ ແລະ ໃຫ້ຄໍາໝັ້ນສັນຍາວ່າຈະໃຫ້ການຮ່ວມມື ລະຫວ່າງ ສປປ ລາວ – ອາເມລິກາ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດໃຫ້ແກ່ສອງປະເທດໃນຕໍ່ໜ້າ.
ພາບ-ຂ່າວ ໂດຍ: ໄພຄໍາອີ
