ໃນເວລາ 11:00 ໂມງ ຂອງວັນທີ 12 ຕຸລາ 2022, ທີ່ຫ້ອງປະຊຸມທາງໄກ ຊັ້ນ 03 ກະຊວງອຸດສາຫະກໍາ ແລະ ການຄ້າ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ດຣ ອາມີ ເບຣາ (Dr. Ami Bera), ສະພາທ້ອງຖິ່ນ ລັດແຄລີຟໍເນຍ ສ. ອາເມລິກາ ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 16 ທ່ານ. ທ່ານ ດຣ ອາມີ ເບຣາ (Dr. Ami Bera) ເນື່ອງໃນ​ໂອ​ກາດ​ເຂົ້າພົບປະເພື່ອປຶກສາຫາລື ດ້ານການພັດທະນາ ແລະ ການຮ່ວມມື ບັນດາໂຄງການ ຂອງກະຊວງອຸດສາຫະກຳ ແລະ ການຄ້າ ສປປ ລາວ ພາຍໃຕ້ການຊ່ວຍເຫຼືອຈາກ ລັດຖະບານ ສ.ອາເມລິກາ ແລະ  ທາງຄະນະກໍ່ໄດ້ສະແດງຄວາມສົນໃຈຕໍ່ໃນຮ່ວມມື ກ່ຽວກັບລົດພະລັງງານໄຟຟ້າ (Electric Vehicle) ໃນຕໍ່ໜ້າ.

 ໂອກາດນີ້ ທ່ານຮອງລັດຖະມົນຕີ ກໍ່ໄດ້ສະແດງຄວາມຍິນດີຕ້ອນຮັບ ແລະ ກ່າວຄຳຂອບໃຈຕໍ່ ລັດຖະບານ ສ.ອາເມລິກາ ໂດຍສະເພາະ ຄະນະ ຈາກສະພາທ້ອງຖິ່ນ ລັດແຄລີຟໍເນຍ ສ. ອາເມລິກາ ໃນການຊ່ວຍເຫຼືອ ດ້ານວິຊາການ ຜ່ານບັນດາໂຄງການ ພັດທະນາ ແລະ ໂຄງການຮ່ວມມື ຂອງ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ຜ່ານມາ ໃນຊ່ວງໄລຍະ I) ປີ 2008-2013 ກະຊວງ ອຸດສາຫະກຳ ແລະ ການຄ້າ ໄດ້ຮັບໂຄງການຊ່ວຍເຫຼືອວິຊາການ “USAID LUNA-Lao PDR-US International and ASEAN Integration project” ມູນຄ່າ 5,3 ລ້ານ ໂດລາ ສະຫະລັດ ເພື່ອສະໜັບສະໜູນ ການເຂົ້າເປັນສະມາຊິກ WTO ແລະ AEC, II) ໄລຍະ 2014-2019 ໄດ້ຮັບໂຄງການສ້າງຖານຂໍ້ມູນ ນິຕິກຳ Lao official gazette,​ຊັບສິນທາງປັນຍາ ມູນຄ່າ 8,5 ລ້ານ ໂດລາ ສະຫະລັດ, III) ໂຄງການຊ່ວຍເຫຼືອ “Lao Competitiveness and Trade project-LCT” ການເຂົ້າເຖິງຕະຫຼາດ ມູນຄ່າ 3 ລ້ານ ໂດລາ ສະຫະລັດ, VI) ໂຄງການ “Lao Business Environment project-LBE”  ມູນຄ່າ 8,8 ລ້ານ ໂດລາ ສະຫະລັດ ເພື່ອສ້າງຄວາມເຂັ້ມແຂງໃຫ້ ວິສາຫະກິດຂະໜາດນ້ອຍ ແລະ ກາງ (SME)

ມູນຄ່າການຄ້າສອງຝ່າຍ ລາວ-ອາເມລິກາ ລະຫວ່າງປີ 2017-2022

 ແຫຼ່ງຂໍ້ມູນ: ສູນສະຖິຕິ ແລະ ຂໍ້ມູນຂ່າວສານ, ກົມແຜນການ ແລະ ການຮ່ວມມື

ພາບ:​ໄພວັນ ໂຄດວັນທາ

ຂ່າວ: ທິລາວັນ