.
ວັນທີ 01-02 ພະຈິກ 2022, ທີ່ ໂຮງແຮມລາວພລາຊາ, ກົມນະໂຍບາຍການຄ້າຕ່າງປະເທດ ກະຊວງອຸດສາຫະກໍາ ແລະ ການຄ້າ ຮ່ວມກັບ ITC ໄດ້ຈັດຝຶກອົບຮົມກ່ຽວກັບ MOIC ແລະ ITC ສ້າງຄວາມເຂັ້ມແຂງ ແລະ ຄວາມສາມາດຂອງສັນຍາການຄ້າດ້ານການບໍລິການຢູ່ ສປປ ລາວ ຊຶ່ງຂະແໜງບໍລິການມີບົດບາດສຳຄັນໃນດ້ານການຜະລິດ ແລະ ການຊົມໃຊ້ ແລະ ສ້າງມູນຄ່າທີ່ເດັ່ນໃນການເຄື່ອນໄຫວເສດຖະກິດສ່ວນໃຫຍ່. ນອກນັ້ນ, ຂະແໜງບໍລິການເຊັ່ນ: ອຸດສາຫະກຳການທ່ອງທ່ຽວ ຍັງມີບົດບາດສົ່ງເສີມໃຫ້ຂະແໜງການອື່ນໆ ກ້າວໄປເຖິງລະບົບຕ່ອງໂສ້ມູນຄ່າ, ເພື່ອເພີ່ມຊ່ອງທາງໃຫ້ແກ່ການສົ່ງອອກ ແລະ ການເຕີບໂຕຢ່າງກວ້າງຂວາງ.
ການເພີ່ມທະວີຄວາມສາມາດ ແລະ ຄວາມເຂົ້າໃຈ ຂອງນັກເຈລະຈາທາງດ້ານການຄ້າຈາກຂະແໜງການທີ່ກ່ຽວຂ້ອງ ແລະ ພາກສ່ວນທີ່ເຂົ້າຮ່ວມການເຈລະຈາດ້ານການຄ້າດ້ານການບໍລິການແມ່ນມີຄວາມຈຳເປັນ ໂດຍສະເພາະແມ່ນການປະຕິບັດຕາມຄໍາໝັ້ນສັນຍາທາງດ້ານການຄ້າ ທີ່ ສປປ ລາວ ຮັບຮອງເອົາເຊັ່ນ: ອົງການການຄ້າໂລກ (World Trade Organization-WTO), ສັນຍາການຄ້າດ້ານການບໍລິການຂອງອາຊຽນ (ASEAN Trade in Service-ATISA) ແລະ ສັນຍາການຮ່ວມມືເສດຖະກິດແບບຮອບດ້ານລະດັບພາກພື້ນ (Regional Comprehensive Economic Partnership-RCEP) ເປັນຕົ້ນ. ດ້ວຍເຫດນີ້, ໂຄງການ ARISE Plus ແລະ ກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ຈຶ່ງໄດ້ຈັດການຝຶກອົບຮົມ “ການສ້າງຄວາມເຂັ້ມແຂງໃຫ້ແກ່ນັກເຈລະຈາການຄ້າ ແລະ ການຈັດຕັ້ງປະຕິບັດ ສັນຍາການຄ້າດ້ານບໍລິການຂອງ ສປປ ລາວ” .
ທ່ານ ອິດທິດລິດ ຍັງນຸວົງ ຮອງກົມນະໂຍບາຍການຄ້າຕ່າງປະເທດ ໄດ້ກ່າວວ່າ: ການຝຶກອົບຮົມໃນໄລຍະ 2 ມື້ ໄດ້ກວມເອົາຫົວຂໍ້ ແລະ ການສົນທະນາທີ່ຫຼາກຫຼາຍ ເຊັ່ນ : ຄວາມເຂົ້າໃຈ ກ່ຽວກັບການຄ້າທາງດ້ານການບໍລິການ; ຫຼັກການໃນຂໍ້ຕົກລົງຂອງຫຼາຍຝ່າຍ ແລະ ສັນຍາພາກພື້ນກ່ຽວກັບການຄ້າດ້ານການບໍລິການ; ລະບຽບພາຍໃນກ່ຽວກັບການບໍລິການ; ປະຕິບັດຕາມຄໍາໝັ້ນສັນຍາລະດັບພາກພື້ນ, ແລະ ຫົວຂໍ້ອື່ນໆ. ຄຽງຄູ່ກັນນັ້ນ, ການເພີ່ມທະວີຄວາມເຂົ້າໃຈ ແລະ ຄວາມອາດສາມາດ ຈະປະກອບສ່ວນເຂົ້າໃນການປະຕິບັດບັນດາຄຳໝັ້ນສັນຍາດ້ານການຄ້າການບໍລິການ ຢ່າງເປັນລະບົບ ແລະ ມີປະສິດທິຜົນໃນລະຫວ່າງ ແລະ ພາຍຫຼັງການເຈລະຈາ; ພ້ອມດຽວກັນນີ້ “ພວກເຮົາເຫັນໄດ້ເຖິງຄວາມສຳຄັນ ແລະ ຄຸນຄ່າຂອງການຝຶກອົບຮົມຄັ້ງນີ້, ທີມງານ ກົມນະໂຍບາຍການຄ້າຕ່າງປະເທດ ແມ່ນເຮັດວຽກຢ່າງໃກ້ຊິດກັບທີມງານໂຄງການ Arise Plus ປະຈຳ ສປປ ລາວ ແລະ ໄດ້ຮັບທຶນສະໜັບສະໜຸນຈາກສະຫະພາບເອີຣົບ ເພື່ອຈັດການຝຶກອົບຮົມຄັ້ງນີ້. ພວກເຮົາຫວັງວ່າບັນດາຜູ້ເຂົ້າຮ່ວມທຸກທ່ານຈະນຳໃຊ້ ແລະ ນຳເອົາຄວາມຮູ້ ແລະ ບົດຮຽນຈາກການຝຶກອົບຮົມຄັ້ງນີ້ໄປໃຊ້ໃນວຽກງານຢ່າງມີປະສິດທິຜົນ.”
ການຝຶກອົບຮົມໃນຄັ້ງນີ້ ແມ່ນມີຜູ້ຕາງໜ້າຈາກຂະແໜງການບໍລິການທີ່ກ່ຽວຂ້ອງປະມານ 30 ທ່ານເຂົ້າຮ່ວມ ຊຶ່ງຈັດໂດຍ ຊ່ຽວຊານສາກົນສະເພາະດ້ານການເຈລະຈາການຄ້າການບໍລິການຂອງ (International Trade Centre ຫຼື ITC) ແລະ WTO. ການຝຶກອົບຮົມຄັ້ງນີ້ໄດ້ຮັບການສະໜັບສະໜູນຈາກໂຄງການ Arise Plus ປະຈຳ ສປປ ລາວ ທີ່ໄດ້ຮັບທຶນສະໜັບສະໜຸນຈາກສະຫະພາບເອີຣົບ. ໂຄງການດັ່ງກ່າວມີຈຸດປະສົງໃນການ ປະກອບສ່ວນເຂົ້າໃນການຟື້ນຟູເສດຖະກິດຂອງລາວ ໂດຍການສະໜັບສະໜູນການເສີມສ້າງຄວາມສາມາດຂອງເຈົ້າໜ້າທີ່ການຄ້າ, ສ້າງຄວາມເຂັ້ມແຂງໃຫ້ພາກລັດ ແລະ ຈັດຕັ້ງປະຕິບັດບັນດາເຄື່ອງມືນະໂຍບາຍ, ພ້ອມດຽວກັນນັ້ນກໍ່ໃຫ້ພາກເອກະຊົນມີທັກສະໃນການຜະລິດທີ່ມີມູນຄ່າເພີ່ມສູງ, ເພື່ອສົ່ງອອກຜະລິດຕະພັນ.
ແຫຼ່ງຂ່າວ: ກົມນະໂຍບາຍການຄ້າຕ່າງປະເທດ ກຊ ອຄ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
