ໃນວັນທີ 29 ມິຖຸນາ 2023, ທີ່ ຫ້ອງປະຊຸມຊັ້ນ 01 ຂອງ ກະຊວງອຸດສາຫະກໍາ ແລະ ການຄ້າ (ອຄ), ໜ່ວຍພັກຮາກຖານກົມຊັບສິນທາງປັນຍາ, ຈັດກອງປະຊຸມຄົບ​ຄະນະ​ກາງ​ສະ​ໄໝຂອງ ໜ່ວຍພັກກົມຊັບສິນທາງປັນຍາ, ໂດຍໃຫ້ກຽດເປັນປະທານໂອ້ລົມກອງປະຊຸມຂອງ ສະຫາຍ ນ. ຈັນສຸກ ແສງພະຈັນ, ຮອງເລຂາຄະນະບໍລິຫານງານພັກ ກະຊວງ ອຄ, ມີສະຫາຍ ສັນຕິສຸກ ພູນສະຫວັດ ເລຂາໜ່ວຍພັກ, ສະຫາຍ ໄຊ​ບັນ​ດິດ ໄຊ​ຍະ​ວົງ​ຄຳ​ດີ, ກຳມະການໜ່ວຍພັກ ກົມຊັບສິນທາງປັນຍາ ພ້ອມດ້ວຍສະມາຊິກພັກສົມບູນ ແລະ ຄະນະຕິດຕາມຈາກກະຊວງ  ອຄ ເຂົ້າຮ່ວມ 51 ສະຫາຍ.

ສະຫາຍ ສັນຕິສຸກ ພູນສະຫວັດ ເລຂາໜ່ວຍພັກກົມ ໄດ້ກ່າວເປີດກອງປະຊຸມໃນຄັ້ງນີ້ ວ່າ: ກອງປະຊຸມຄົບຄະນະກາງສະໄໝ ຂອງໜ່ວຍພັກຮາກຖານກົມຊັບສິນທາງປັນຍາ, ໄຂຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ປວງຊົນລາວທັງຊາດ ພວມແຂ່ງຂັນກັນສ້າງຜົນງານໃຫ້ມີຂະບວນການ ແລະ ໄດ້ມີຜົນສຳເລັດຫຼາຍດ້ານໃນຕະຫຼອດໄລຍະຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ໃນບັນຍາກາດທີ່ທົ່ວກະຊວງອຸດສາຫະກໍາ ແລະ ການຄ້າ ກໍາລັງພ້ອມກັນອອກແຮງແຂ່ງຂັນສ້າງຜົນງານຂໍ່ານັບຮັບຕ້ອນ ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງອຸສາຫະກຳ ແລະ ການຄ້າ ສະໄໝທີ V ຢ່າງເປັນຂະບວນຟົດຟື້ນ.

ໃນກອງປະຊຸມ ຄັ້ງນີ້ ບັນດາສະມາຊິກພັກສົມບູນ ແລະ ແຂກທີ່ເຂົ້າຮ່ວມ ໄດ້ຮັບຟັງການເຜີຍເເຜ່ເຊື່ອມຊຶມ 3 ເອກະສານ ຂອງຄະນະເລຂາທິການສູນກາງພັກ, ມະຕິ ຂອງກົມການເມືອງສູນກາງພັກ ວ່າດ້ວຍມາດຕະຖານ ຂອງພະນັກງານນໍາພາ-ຄຸູ້ມຄອງ ແລະ ກົດລະບຽບພັກ ສະໄໝທີ XI ວ່າດ້ວຍຂໍ້ຫ້າມ, ໜ້າທີ່ ແລະ ສິດ ຂອງຄະນະພັກແຕ່ລະຂັ້ນ, ພ້ອມຖອດຖອນບົດຮຽນ, ປະກອບຄໍາເຫັນ ແລະ ຜ່ານຮ່າງບົດສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມຊັບສິນທາງປັນຍາ ກາງສະໄໝ ແລະ ທິດທາງທ້າຍສະໄໝ ກ່ຽວກັບການເຄື່ອນ ໄຫວຊີ້ນຳ-ນຳພາ ຂອງໜ່ວຍພັກຮາກຖານ ກົມຊັບສິນທາງປັນຍາ ແຕ່ປີ 2019-2023 ແລະ ທິດທາງແຜນການ ປີ 2023-2025 ແລະ ຜ່ານບົດສຳຫຼວດການນໍາພາລວມ ຂອງຄະນະໜ່ວຍພັກ ກົມຊັບສິນທາງປັນຍາ ແຕ່ປີ 2019-2023. ເພື່ອເປັນການຢັ້ງຢືນເຖິງຜົນງານການ ເຄື່ອນໄຫວຂອງໜ່ວຍພັກ ກົມຊັບສິນທາງປັນຍາ ໃນໄລຍະ 3 ປີຜ່ານມາ, ກອງປະຊຸມຍັງໄດ້ຮັບຟັງການປະກອບ ຄຳຄິດຄຳເຫັນ ຂອງຄະນະບໍລິຫານງານພັກກະຊວງ. ພ້ອມດຽວກັນນັ້ນ ບັນດາສະມາຊິກພັກສົມບູນ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດທາບທາມຄວາມເຊື່ອໝັ້ນ-ໄວ້ວາງໃຈ ຂອງການນໍາພາລວມ ແລະ ບຸກຄົນໃນຄະນະໜ່ວຍພັກ ເພື່ອເປັນຂໍ້ມູນພື້ນຖານສໍາຄັນ ໃນການເບິ່ງບັນຫາການຈັດຕັ້ງ ກໍຄື ໃຫ້ແຕ່ລະສະຫາຍຄະນະໜ່ວຍພັກເປັນບ່ອງອີງ ໃນການປັບປຸງກໍ່ສ້າງຕົນເອງ ເພື່ອສືບຕໍ່ຊີ້ນຳ-ນໍາພາ ຂະບວນການໃນການຈັດຕັ້ງປະຕິບັດ ຕາມມະຕິກອງປະຊຸມຄົບຄະນະກາງສະໄໝ ຂອງໜ່ວຍພັກກົມຊັບສິນທາງປັນຍາ ໃຫ້ບັນລຸຜົນສໍາເລັດຕາມລະດັບຄາດໝາຍ.

ໃນໂອກາດນີ້ ສະຫາຍ ນ. ຈັນສຸກ ແສງພະຈັນ, ຮອງເລຂາຄະນະບໍລິຫານງານພັກ ກະຊວງ ອຄ ກໍໄດ້ໂອ້ລົມ ຕໍ່ໜ່ວຍພັກກົມຊັບສິນທາງປັນຍາ, ຊຶ່ງສະຫາຍ ໄດ້ຕາງໜ້າໃຫ້ຄະນະບໍລິຫານງານພັກກະຊວງ ສະແດງຄວາມຍ້ອງຍໍຊົມເຊີຍຕໍ່ການກະກຽມ ແລະ ຕໍ່ຜົນສຳເລັດຂອງກອງປະຊຸມກາງສະໄໝ ຂອງໜ່ວຍພັກກົມຊັບສິນທາງປັນຍາ ທີ່ຍາດມາໄດ້ໃນໄລຍະຜ່ານມາ, ຊຶ່ງຜົນສໍາເລັດດັ່ງກ່າວ ເປັນການຢັ້ງຢືນເຖິງຜົນງານການປະຕິບັດໜ້າທີ່ຂອງ ຄະນະໜ່ວຍພັກຮາກຖານກົມ ໃນການນໍາພາ-ຊີ້ນຳ ການເຄື່ອນໄຫວຂອງໜ່ວຍພັກ ໃນໄລຍະເຄິ່ງສະໄໝທີ່ຜ່ານມາ. ຄຽງຄູ່ກັບຜົນສໍາເລັດດັ່ງກ່າວ ສະຫາຍ ຮອງເລຂາ ກໍໄດ້ເນັ້ນບາງບັນຫາທີ່ ຄະນະໜ່ວຍພັກ ແລະ ສະມາຊິກພັກ ຂອງໜ່ວຍພັກຮາກຖານກົມຊັບສິນທາງປັນຍາ ຈະຕ້ອງສືບຕໍ່ເອົາໃຈໃສ່ໃນການຊີ້ນຳ-ນຳພາ ແລະ ປັບປຸງແກ້ໄຂຢ່າງຕັ້ງໜ້າ ໂດຍສະເພາະ ເອົາໃຈ ໃສ່ເຊື່ອມຊືມແນວທາງຂອງພັກ ແລະ ລະບຽບກົດໝາຍຂອງລັດຢ່າງເຂັ້ມງວດ; ເພີ່ມທະວີໃນການຊີ້ນໍາ-ນໍາພາ ເປັນແບບຢ່າງໃຫ້ແກ່ສະມາຊິກພັກ ແລະ ພະນັກງານ; ເອົາໃຈໃສ່ໃນການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ໃຫ້ຫຼາຍຂຶ້ນ ແລະ ຕໍ່ເນື່ອງ ເພື່ອໃຫ້ສະມາຊິກມີຄວາມອຸ່ນອ່ຽງທຸ່ນທ່ຽງ ແລະ ກໍາແໜ້ນໄດ້ມິດ-ສັດຕູຢ່າງຈະແຈ້ງ; ສືບຕໍ່ເອົາໃຈໃສ່ວຽກງານການພັດທະນາຊັບພະຍາກອນມະນຸດ ດ້ານວິຊາສະເພາະ ໃຫ້ກາຍເປັນນັກຊ່ຽວຊານສະເພາະດ້ານທີ່ແທ້ຈິງ ແລະ ຊຸກຍູ້ສົ່ງເສີມໃຫ້ພະນັກງານຊອກຮູ້ຮໍ່າຮຽນ; ເອົາໃຈໃສ່ຫຼັກການເຮັດວຽກລວມສູນປະຊາທິປະໄຕ ນໍາພາເປັນໝູ່ຄະນະ, ເພີ່ມທະວີຄວາມຮັບຜິດຊອບຂອງບຸກຄົນໃຫ້ກົມກຽວ, ປະຕິບັດລະບຽບວິໄນຂອງພັກ-ລັດ ຢ່າງເຂັ້ມງວດ; ເຕົ້າໂຮມຄວາມສາມັກຄີພາຍໃນໜ່ວຍພັກ ບໍ່ແບ່ງພັກແບ່ງພວກ ແລະ ມີສະຕິຕໍ່ການຈັດຕັ້ງໃຫ້ສູງຂຶ້ນກວ່າເກົ່າ; ເອົາໃຈໃສ່ວຽກງານກວດກາພັກ, ດຳເນີນການຮ່ວມຊີວິດພັກປະຈຳແຕ່ລະເດືອນ ໃຫ້ເປັນປົກກະຕິ, ຕຳນິສົ່ງຂ່າວ ເຊິ່ງກັນ ແລະ ກັນແບບສ້າງສັນ ຫຼື ກໍ່ສ້າງເຊິ່ງກັນ ແລະ ກັນ, ເອົາໃຈໃສ່ສ້າງໜ່ວຍພັກຕົນໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງແທ້ຈິງ ໂດຍການກໍານົດທິດທາງເນື້ອໃນ ແລະ ວິທີການເຄື່ອນໄຫວນຳພາ ໃຫ້ແທດເໝາະກັບສະພາບເງື່ອນໄຂຕົວຈິງ, ສືບຕໍ່ສ້າງ ແລະ ພັດທະນານິຕິກຳ ທີ່ເປັນເຄື່ອງມືພື້ນຖານອັນສຳຄັນ ແລະ ມີຄວາມຈໍາເປັນຮີບດ່ວນເປັນຕົ້ນແມ່ນ ຂໍ້ຕົກລົງ, ຄູ່ມື ແລະ ບົດແນະນຳ ອື່ນໆ ທີ່ກ່ຽວຂ້ອງ; ຄະນະໜ່ວຍພັກຕ້ອງເປັນແບບຢ່າງນໍາໜ້າໃນທຸກວຽກງານຢ່າງແທ້ຈິງ, ຕ້ອງເອົາໃຈໃສ່ຕິດຕາມຢ່າງໃກ້ສິດຕິດແທດຂອງສະມາຊິກພັກ ແລະ ພະນັກງານ-ລັດຖະກອນ ຂອງຕົນໃຫ້ເປັນປົກກະຕິ ແລະ ຊຸກຍູ້ບັນດາອົງການຈັດຕັ້ງມະຫາຊົນ ໃຫ້ມີການເຄື່ອນໄຫວຢ່າງຕັ້ງໜ້າ ແລະ ເອົາໃຈໃສ່ປັບປຸງແບບແຜນວິທີການເຮັດວຽກ, ສ້າງແຜນການເຄື່ອນໄຫວວຽກງານຂອງຕົນຢ່າງມີຈຸດສຸມ ມີເປົ້າໝາຍ ແລະ ຄາດໝາຍສູ້ຊົນ, ພ້ອມກັນນັ້ນ, ກໍ່ມີການປະສານສົມທົບກັບພາກສ່ວນທີ່ກ່ຽວຂ້ອງ ໃຫ້ສອດຄ່ອງກົມກຽວກັນເປັນຢ່າງດີ.

ພ້ອມດຽວກັນນັ້ນ ສະຫາຍ ກໍໄດ້ຮຽກຮ້ອງມາຍັງ ຄະນະໜ່ວຍພັກ ແລະ ສະມາຊິກພັກ ຂອງໜ່ວຍພັກຮາກຖານກົມຊັບສິນທາງປັນຍາ ເສີມຂະຫຍາຍມູນເຊື້ອອັນດີງາມ ແລະ ບົດຮຽນປະສົບການຜ່ານມາ, ເພີ່ມທະວີຄວາມສາມັກຄີເປັນປຶກແຜ່ນ, ບຸກໜ້າບືນຕົວຜ່ານຜ່າຄວາມຫຍຸ້ງຍາກນາໆປະການ, ເສີມຂະຫຍາຍຫົວຄິດປະດິດສ້າງ, ກ້າເຮັດ ແລະ ກ້າຮັບຜິດຊອບ ເດັດດ່ຽວປະຕິບັດຕາມແນວທາງປ່ຽນແປງໃໝ່ຂອງພັກ ສ້າງບາດກ້າວບຸກທະລຸໃນ 4 ດ້ານ ໃຫ້ປະກົດຜົນເປັນຈິງຕາມແນວທາງຂອງພັກວາງອອກ. ສຶບຕໍ່ນໍາພາ-ຊີ້ນໍາວຽກງານຊັບສິນທາງປັນຍາ ໃຫ້ເຕີບໃຫຍ່ເຂັ້ມແຂງ ກາຍເປັນກຳລັງແຮງ ແລະ ເປັນພາຫະນະບຸກທະລຸ ໃນທຸກດ້ານເພື່ອພັດທະນາເສດຖະກິດ-ສັງຄົມ ໃຫ້ຂະຫຍາຍຕົວໝັ້ນທ່ຽງ ແລະ ຍືນຍົງ.

ຂ່າວ: ກົມຊັບສິນທາງປັນຍາ

ຮຽບຮຽງ-ພາບໂດຍ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ