ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນ ຄັ້ງທີ 22 ເຊິ່ງແມ່ນເວທີ ປຶກສາຫາລື ລະຫວ່າງພາກລັດ, ພາກທຸລະກິດ, ຫົວໜ່ວຍທຸລະກິດຂະໜາດນ້ອຍ ແລະ ກາງ ແລະ ບັນດາຄູ່ຮ່ວມພັດທະນາ ເພື່ອແລກປ່ຽນຄຳຄິດເຫັນ ຕໍ່ກັບບັນຫາພົ້ນເດັ່ນ ທີ່ເປັນອຸປະສັກຕໍ່ການຄ້າ ແລະ ການລົງທຶນ ແລະ ກໍ່ເປັນການສ້າງຄວາມເປັນເອກະພາບ ກ່ຽວກັບບັນດາມາດຕະການທີ່ຈຳເປັນໃນການລົບລ້າງບັນດາສິ່ງທີ່ກີດຂວາງຕໍ່ກັບການສ້າງສະພາບແວດລ້ອມທີ່ເອື້ອອຳນວຍຕໍ່ການລົງທຶນ. ພາຍໃຕ້ການເປັນປະທານຂອງ ທ່ານ ປ.ອ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ປະທານຮ່ວມໂດຍ ທ່ານນາງ Ina Marciulionyte ເອກອັກຄະລັດຖະທູດສໍານັກງານຜູ້ຕາງໜ້າສະຫະພາບເອີຣົບ ປະຈໍາ ສປປ ລາວ, ແລະ ທ່ານ Heather Variava ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ. ມີພາກລັດ, ບັນດາສະຖານທູດ, ບັນດາຄູ່ຮ່ວມພັດທະນາ, ສະພາການຄ້າ ແລະ ອຸດສາຫະກຳແຫ່ງຊາດລາວ, ບັນດາສະມາຄົມທຸລະກິດພາຍໃນ ແລະ ຕ່າງປະເທດ ແລະ ບັນດາສະພາການຄ້າ ແລະ ສະມາຄົມທຸລະກິດຕ່າງປະເທດ ທີ່ປະຈຳຢູ່ໃນ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ປ.ອ ມະໂນທອງ ວົງໄຊ ຮອງລັດຖະມັນຕີ ໄດ້ກ່າວເນັ້ນວ່າ: ບັນດານະໂຍບາຍ ແລະ ທຸກໆຄວາມຕັ້ງໃຈຂອງລັດຖະບານ ໄດ້ມີບົດບາດສຳຄັນໃນການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການລົງທຶນ, ລັດຖະບານ ໄດ້ຍຶດໝັ້ນໃນການຈັດຕັ້ງປະຕິບັດຫຼາຍມາດຕະການທີ່ສຳຄັນ ເພື່ອສະໜັບສະໜູນການປັບປຸງສະພາບແວດລ້ອມທີ່ເອື້ອອຳນວຍໃຫ້ແກ່ການລົງທຶນ ໂດຍສະເພາະການສ້າງຄວາມສະດວກໃຫ້ແກ່ການເລີ່ມຕົ້ນທຸລະກິດ ໂດຍການປັບປຸງກົດ ໝາຍວ່າດ້ວຍວິສາຫະກິດ, ກົດໝາຍວ່າດ້ວຍການສົ່ງເສີມການລົງທຶນ, ລວມທັງບັນດາມາດຕະການ ແລະ ຄຳແນະນຳ ທີ່ຕິດພັນກັບການລົງທຶນ; ເຖິງຢ່າງໃດກໍ່ຕາມ, ການຈັດຕັ້ງປະຕິບັດການປັບປຸງເຫລົ່ານີີ້ ຍັງເປັນສິ່ງທ້າທາຍຢູ່ໂດຍສະ ເພາະໃນຂັ້ນທ້ອງຖິ່ນ.”.
ກອງປະຊຸມໄດ້ຮັບຟັງການລາຍງານກ່ຽວກັບບັນດາວຽກງານການປັບປຸງ ແລະ ປະຕິຮູບທີ່ກຳລັງດຳເນີນຢູ່ ເພື່ອຊ່ວຍປັບປຸງສະພາບແວດລ້ອມດ້ານການຄ້າ ແລະ ການລົງທຶນ ເຊັ່ນ: ການປັບປຸງດຳລັດວ່າດ້ວຍບັນຊີກິດຈະການຄວບຄຸມ ແລະ ກິດຈະການສຳປະທານ ລວມທັງຄວາມຄືບໜ້າການປັບປຸງກົດໝາຍວ່າດ້ວຍການສົ່ງເສີມການລົງທຶນ ຂອງກະຊວງແຜນການ ແລະ ການລົງທຶນ ແລະ ການຈັດຕັ້ງປະຕິບັດບູລິມະສິດພາຍໃຕ້ເສົາຄ້ຳເສດຖະກິດ ສຳລັບການເປັນປະທານອາຊຽນຂອງ ສປປ ລາວ ໃນປີ 2024 ຂອງກະຊວງອຸດສາຫະກຳ ແລະ ການຄ້າ. ພ້ອມນັ້ນ ກໍໄດ້ນຳສະເໜີກ່ຽວກັບກົນໄກການປຶກສາຫາລື ລະຫວ່າງພາກລັດ ແລະ ພາກເອກະຊົນ (PPD) ພາຍໃຕ້ກອງປະຊຸມທຸລະກິດລາວ ເຊິ່ງໄດ້ສັງລວມໝາກຜົນຂອງກອງປະຊຸມ LBF ຄັ້ງທີ 15 ແລະ ບັນດາຂໍ້ສະເໜີບັນຫາບູລິມະສິດທີ່ໄດ້ຮັບຮອງໃນກອງປະຊຸມ LBF ຄັ້ງທີ 15 ຜ່ານມາ ແລະ ການນໍາສະເໜີກ່ຽວກັບຂໍ້ຕົກລົງເລກທີ 004/ນຍ ຂອງທ່ານ ນາຍົກລັດຖະມົນຕີ ວ່າດ້ວຍການສ້າງຕັ້ງກົນໄກການປຶກສາຫາລືລະຫວ່າງພາກລັດ ແລະ ພາກເອກະຊົນ ພາຍໃຕ້ກອງປະຊຸມທຸລະກິດລາວ.
ທ່ານ ຮອງລັດຖະມົນຕີ ໄດ້ກ່າວວ່າ: ເຫັນດີຕໍ່ການຕີລາຄາ ກ່ຽວກັບບົດບາດ ແລະ ຄວາມສຳຄັນ ຂອງກົນໄກປຶກສາຫາລື ລະຫວ່າງພາກລັດ ແລະ ເອກະຊົນ ພາຍໃຕ້ກອງປະຊຸມທຸລະກິດລາວ ແລະ ພວກເຮົາຕ້ອງເພີ່ມຄວາມພະຍາຍາມເປັນສອງເທົ່າໃນການແກ້ໄຂບັນດາບັນຫາທີ່ຍົກຂຶ້ນໃນກອງປະຊຸມ LBF ຄັ້ງທີ 15, ໂດຍສະເພາະການແກ້ໄຂບັນຫາບູລິມະສິດ ທີ່ກອງປະຊຸມ LBF ຄັ້ງທີ 15 ໄດ້ຮັບຮອງ ແລະ ມີຄວາມເຊື່ອໝັ້ນວ່າ ບັນດາຄູ່ຮ່ວມພັດທະນາ ທີ່ໃຫ້ການສະໜັບສະໜູນ ແລະ ຊ່ວຍເຫລຶອ ໃນການພັດທະນາແກ່ພວກເຮົາມາຍາວນານ ໂດຍສະເພາະໃນການອອກແບບ ແລະ ຈັດຕັ້ງປະຕິບັດ ການປັບປຸງສະພາບແວດລ້ອມການດຳເນີນທຸລະກິດ ແລະ ບັນຍາກາດການລົງທຶນ ຈະສືບຕໍ່ໃຫ້ການສະໜັບສະໜູນແກ່ພວກເຮົາຢ່າງຕໍ່ເນື່ອງ, ໜ່ວຍງານ TPSWG ແມ່ນໜຶ່ງໃນສິບໜ່ວຍງານ ພາຍໃຕ້ຂະບວນການໂຕະມົນ ແລະ ເປັນເວທີຫຼັກສໍາລັບການປຶກສາຫາລື ດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມພັດທະນາ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
