ງານສະເຫລີມສະຫລອງວັນ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ສາກົນ 2024 ໄດ້ຈັດຂຶ້ນໃນວັນທີ 24 ມິຖຸນາ 2024 ທີ່ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ), ມີຜູ້ເຂົ້າຮ່ວມຈາກພາກລັດ, ພາກທຸລະກິດ, ສະຖາບັນເງິນ, ນັກຄົ້ນຄວ້ານະໂຍບາຍ ແລະ ບັນດາອົງການຈັດຕັ້ງສາກົນ ຈາກທັງພາຍໃນ ແລະ ພາກພື້ນ ຈຳນວນ 150 ກວ່າທ່ານ ໂດຍເຂົ້າຮ່ວມແບບເຊິ່ງໜ້າ ແລະ ອອນລາຍ ພາຍໃຕ້ຫົວຂໍ້ “ສົ່ງເສີມນະວັດຕະກໍາ ແລະ ຄວາມເຂັ້ມແຂງ: ສ້າງຄວາມເຂັ້ມແຂງໃຫ້ MSME ເພື່ອອະນາຄົດທີ່ຍືນຍົງ”.
ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ໃຫ້ຮູ້ວ່າ: ການສະເຫຼີມສະຫຼອງ ວັນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ຈວນກ ຫຼື MSME) ສາກົນ, ວັນທີ 27 ມິຖຸນາ ແມ່ນໄດ້ເລີ່ມຈັດມາແຕ່ ປີ 2017 ພາຍຫຼັງທີ່ ສະມັດຊາໃຫຍ່ອົງການສະຫະປະຊາຊາດ ໄດ້ຮັບຮອງເອົາຍັດຕິສະບັບເລກທີ 71/279 ໃນເດືອນເມສາ 2017 ເຊິ່ງກໍານົດເອົາວັນທີ 27 ມິຖຸນາ ຂອງທຸກປີ ເປັນວັນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME) ສາກົນ. ຕໍໍ່ຈາກນັ້ນມາ, ວັນທີ່ມີຄວາມໝາຍຄວາມສໍາຄັນດັ່ງກ່າວ ໄດ້ຮັບການສະເຫຼີມສະຫຼອງຢ່າງກວ້າງຂວາງ ໂດຍບັນດາອົງການຈັດຕັ້ງໃນເຄືອຂ່າຍຂອງ ອົງການສະຫະປະຊາຊາດ ທັງຢູ່ ເຊີແນວ ປະເທດສະວິດເຊີແລນ, ຢູ່ນິວຢອກ ສະຫະລັດອາເມລິກາ, ໃນບັນດາປະເທດອາຊຽນ ແລະ ປະເທດໃນໂລກ.
ການຈັດງານດັ່ງກ່າວແມ່ນໜຶ່ງໃນກິດຈະກຳການສົ່ງເສີມ MSME ໃນໄລຍະການເປັນປະທານອາຊຽນຂອງ ສປປ ລາວ 2024 ໂດຍແນໃສ່ແລກປ່ຽນບົດຮຽນການສົ່ງເສີມ MSME ໃນພາກພື້ນ ໂດຍມີການນຳສະເໜີສະພາບການສົ່ງເສີມ MSME ໃນພາກພື້ນ ເຊິ່ງນຳສະເໜີໂດຍຮອງເລຂາທິການໃຫຍ່ອາຊຽນ, ມີກິດຈະກຳເສວະ ນາໃນຫົວຂໍ້ ການຄ້າທາງເອເລັກໂຕຣນິກ ແລະ ການຕະຫລາດດິຈິຕອນ ແລະ ການປັບໂຕການສ້າງຄວາມອາດສາມາດໃນການປ່ຽນແປງຂອງພູມມິສາດໂລ, ຜົນກະທົບຕ້ອງໂສ້ການສະໜອງຕໍ່ກັບຜູ້ປະກອບກິດຈະການ MSME, ການນຳສະເໜີ ບາງເຄື່ອງມືທີ່ສຳຄັນໃນການສົ່ງເສີມ MSME ໃນພາກພື້ນ ເຊັ່ນ: ASEAN Access, ASEAN SME Academy ແລະ ເຄື່ອງມືປະເມີນຄວາມພ້ອມໃນການຫັນເປັນດິຈິຕອນຂອງ MSME. ນອກນັ້ນ, ຍັງມີການແລກປ່ຽນບົດຮຽນລະຫວ່າງຫົວໜ່ວຍ MSME ໃນການເຂົ້າເຖິງຕະຫລາດ.
ງານສະເຫລີມສະຫລອງວັນ MSME ສາກົນ ໄດ້ຮັບການສະໜັບສະໜູນການຈັດງານໂດຍ ອົງການ GIZ ຜ່ານໂຄງການ ASEAN ACCESS ແລະ ທະນາຄານໂລກ ຜ່ານໂຄງການເຂົ້າເຖິງແຫລ່ງທຶນສຳລັບ MSME ເພື່ອຮັບມືກັບຜົນກະທົບ ແລະ ຟື້ນຟູ ຈາກໂຄວິດ-19.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
