ໃນຕອນບ່າຍ ວັນທີ 23 ສິງຫາ 2024 ທີ່ຫ້ອງຮັບແຂກ ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ຕ້ອນຮັບການເຂົ້າຢ້ຽມພົບປະ ແລະ ແນະນໍາຕົວໃນໂອກາດແຕ່ງຕັ້ງມາຮັບຕໍາແໜ່ງເປັນ ເອກອັກຄະລັດຖະທູດຈີນ ປະຈໍາ ສປປ ລາວ ຄົນໃໝ່ ພ້ອມດ້ວຍຄະນະ ທັງສອງຝ່າຍເຂົ້າຮ່ວມ.
ໂອກາດນີ້ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ນ. ຟັງຫົງ Fang Hong ທີ່ໄດ້ຮັບແຕ່ງຕັ້ງເປັນເອກອັກຄະລັດຖະທູດ ສປ ຈີນ ຄົນໃຫມ່ ປະຈໍາ ສປປ ລາວ ທ່ານໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ລັດຖະບານ ສປ ຈີນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອທາງດ້ານເຕັກນິກວິຊາການ ແລະ ທຶນຮອນ ໃຫ້ແກ່ ສປປ ລາວ ເວົ້າລວມ, ເວົ້າສະເພາະ ຂະແໜງອຸດສາຫະກຳ ແລະ ການຄ້າ ໃນໄລຍະທີ່ຜ່ານມາ, ພິເສດຂໍສະແດງຄວາມຂອບໃຈເປັນຢ່າງຍິ່ງ ຕໍ່ການປະກອບສ່ວນສະໜັບສະໜູນ ແລະ ຊ່ວຍເຫລືອ ຂອງ ທ່ານ ຈຽນ ຈ່າຍຕົງ ອາດີດເອກອັກຄະລັດຖະທູດ ສປ ຈີນ ທີ່ຫາກໍສຳເລັດໜ້າທີ່ ເປັນຕົ້ນ: ຜົນສຳເລັດໃນການສ້າງບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທາງດ້ານການຄ້າເອເລັກໂຕຼນິກ ທີ່ໄດ້ຮັບການລົງນາມໂດຍ ສອງ ກະຊວງ ການຄ້າ ລາວ-ຈີນ ໃນລະຫວ່າງການຢ້ຽມຢາມທາງລັດຖະກິດ ຢູ່ ສປ ຈີນ ຂອງ ພະນະທ່ານເລຂາທິການໃຫຍ່ ຂອງ ສປປ ລາວ ໃນປີ 2022; ການສະໜັບສະໜຸນ ແລະ ຊ່ວຍຊຸກຍູ້ ເພື່ອໃຫ້ສາມາດສະຫຼຸບເນື້ອໃນຫຼັກ ຂອງການເຈລະຈາຍົກລະດັບສັນຍາການຄ້າເສລີອາຊຽນ-ຈີນ 3.0 ເປັນນຶ່ງໃນແຜນງານ (PEDs); ການຊຸກຍູ້ການສົ່ງອອກສັດໃຫຍ່ (ງົວ-ຄວາຍ) ໄປ ສປ ຈີນ ແລະ ສົ່ງເສີມການສົ່ງອອກສິນຄ້າກະສິກຳ ແລະ ພືດພັກ ໄປຈີນ; ການຊຸກຍູ້ ເພື່ອແກ້ໄຂບັນຫາສະພາບການອັ່ງອໍຂອງລົດຂົນສົ່ງສິນຄ້າ ຢູ່ດ່ານຊາຍແດນ ບໍ່ເຕັນ-ບໍ່ຫານ ໃຫ້ມີຄວາມສະດວກຫລາຍຂື້ນ; ການສະໜັບສະໜູນພັດທະນາຊັບພະຍາກອນມະນຸດ ຜ່ານການສໍາມະນາວິຊາການໃນຫລາຍຫົວຂໍ້ທີ່ເປັນການພັດທະນາວຽກງານອຸດສາຫະກຳ ແລະ ການຄ້າ ເຊັ່ນ: ການຈັດຕັ້ງປະຕິບັດສັນຍາຂອບການຮ່ວມມືເສດຖະກິດແບບຮອບດ້ານລະດັບພາກພື້ນ, ການຄ້າເອເລັກໂຕລນິກ, ໜຶ່ງແລວໜຶ່ງເສັ້ນທາງ (BRI) ແລະ ການສະໜັບສະໜູນອຸປະກອນ IT ໃຫ້ກະຊວງ ອຄ ໃນນາມເປັນຈຸດປະສານງານຫຼັກຂອງເສົາຄໍ້າປະຊາຄົມເສດຖະກິດອາຊຽນຂອງ ສປປ ລາວ ແລະ ເປັນອະນຸກໍາມະການກອງເລຂາ ຮັບໃຊ້ການເປັນປະທານອາຊຽນ ຂອງ ສປປ ລາວ ໃນປີ 2024
ການຮ່ວມມືດ້ານການຄ້າສອງຝ່າຍ ລາວ-ຈີນ ໃນ 6 ເດືອນ ຕົ້ນປີ 2024, ສາມາດປະຕິບັດວຽກງານການນໍາເຂົ້າ ແລະ ສົ່ງອອກ ໄດ້ທັງໝົດ 4.159 ຕື້ໂດລາ ເຊິ່ງເພີ້ມຂື້ນ 31.6%, ໃນນີ້ມູນຄ້າການສົ່ງອອກ ແມ່ນ 2.254 ຕື້ໂດລາ ເພີ້ມຂື້ນ 26.7% ແລະ ມູນຄ້າການນຳເຂົ້າ ແມ່ນ 1.905 ຕື້ລ້ານໂດລາ ເພີ້ມຂື້ນ 37.9%, ສິນຄ້າສົ່ງອອກສິນຄ້າຫຼັກໄປ ສປ ຈີນ ປະກອບມີ: ຄໍາປະສົມ (ຄໍາແທ່ງ), ເກືອກາລີ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ແທ່ຮອງ, ແຮ່ເຫຼັກ, ຢາງພາລາ, ໝາກກ້ວຍ, ເຍື້ອໄມ້ ແລະ ເສດເຈ້ຍ, ຜະລິດຕະພັນອຸດສາຫະກໍາທັນຍາພືດ, ເຄມີອິນຊີ, ແປ້ງມັນຕົ້ນ, ແລະ ໝາກໄມ້ ແລະ ສິນຄ້ານໍາເຂົ້າສິນຄ້າຫຼັກ ຈາກ ສປ ຈີນ ມີ: ອຸປະກອນກົນຈັກ, ຜະລິດຕະພັນເຄມີປະສົມສໍາເລັດຮູບ, ພາຫະນະທາງບົກ (ນອກຈາກລັດຈັກ, ລົດໄຖ), ເຫຼັກ ແລະ ເຄືີ່ອງທີ່ເຮັດດວ້ຍເຫຼັກ (ເຫຼັກກ້າ), ເຄື່ອງໄຟຟ້າ ແລະ ອຸປະກອນໄຟຟ້າ, ຊີ້ນສ່ວນອາໄຫຼ່ລົດ (ຢາງລົດ, ແວ່ນ, ໂສ້…), ຝຸ່ນ (ປຸຍ), ເຄື່ອງໃຊ້ທີ່ເຮັດດ້ວຍພລາສະ ຕິກ, ເຫຼັກເສັ້ນ ແລະ ເຫຼັກຮູບປະພັນຕ່າງໆ, ລົດໄຖນາ, ຜະລິດຕະພັນທາງເຄມີ, ສາຍໄຟຟ້າ (ເຄເບີ້ນ), ເຈ້ຍ ແລະ ເຄື່ອງໃຊ້ທີ່ເຮັດດ້ວຍເຈ້ຍ, ແລະ ເຄື່ອງເຟີນິເຈີ (ຕຽງ, ເສື້ອ, ເບາະ, ໂຄມໄຟ)
ໃນຕອນທ້າຍຂອງການພົບປະ ທ່ານ ລັດຖະມົນຕີ ໄດ້ສະເໜີວິທີຜັນຂະຫຍາຍຫລັງການພົບປະ ເພື່ອຢາກໃຫ້ສືບຕໍ່ລົງເລິກ ສະເໜີໃຫ້ກົມກ່ຽວຂ້ອງ ຊຸກຍູ້ ແລະ ພັກດັນໃຫ້ການເຈລະຈາຍົກລະດັບ FTA ອາຊຽນ-ຈີນ, ປະສານງານ ແລະ ລົງເລິກລະອຽດກ່ຽວກັບແຜນການຊ່ວຍເຫລືອນ້ຳມັນເຊື້ອໄຟ, ເສີມຂະຫຍາຍວຽກງານວາງສະແດງສິນຄ້າ ອາຊຽນ-ຈີນ ຄັ້ງທີ 21, ເພີ້ມທະວີການຊຸກຍູ້ວຽກງານ ສົ່ງອອກສັດໃຫຍ່ ແລະ ສິນຄ້າກະສິກຳ ໄປ ສປ ຈີນ ແລະ ຮ່ວມກັບຄະນະກຳມະການຮ່ວມມື ລາວ-ຈີນ ເສີມຂະຫຍາຍກົນໄກ ແລະ ແຜນການຮ່ວມມື ໃນຂອບ 9 ແຂວງພາກເໜືອ ກັບ ແຂວງ ຢູນນານ, ສປ ຈີນ.
ຜົນຂອງການພົບປະສອງຝ່າຍຄັ້ງນີ້ ແມ່ນເພື່ອເສີມຂະຫຍາຍການຮ່ວມມື, ການຄ້າການລົງທຶນ ຊິ່ງສອງຝ່າຍຕ່າງໄດ້ຮັບຜົນປະໂຫຍດຮ່ວມກັນ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
