ກະຊວງອຸດສາຫະກໍາ ເເລະ ການຄ້າ (ອຄ) ໄດ້ຈັດພິທີເປີດໂຄງການສົ່ງເສີມການຜະລິດ ແລະ ການຊົມໃຊ້ສິນຄ້າພາຍໃນ ຂຶ້ນໃນວັນທີ 12 ພະຈິກ 2024 ທີ່ກະຊວງອຸດສາຫະກໍາ ແລະ ການຄ້າ ເຂົ້າຮ່ວມຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ມີທ່ານຮອງລັດຖະມົນຕີ, ຜູ້ເຂົ້າຮ່ວມຕາງໜ້າຈາກ ສະພາແຫ່ງຊາດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງກະສິກໍາ ແລະ ປ່າໄມ້, ກະຊວງ ອຄ, ສຄອຊ, ສະມາຄົມຜະລິດ ແລະ ປຸງແຕ່ງກະສິກຳລາວ.
ການຈັດຕັ້ງປະຕິບັດໂຄງການດັ່ງກ່າວ ແມ່ນຈະນໍາເອົາສິນຄ້າຈາກຜູ້ຜະລິດ ໄປເຖິງຜູ້ຊົມໃຊ້ ໃນກຸ່ມຄົນທີ່ມີລາຍຮັບຕໍ່າ ໂດຍສະເພາະແມ່ນພະນັກງານລັດຖະກອນ ຜູ້ທີ່ໄດ້ຮັບເງິນເດືອນຕໍ່າ ໄດ້ຊືຶ້ສິນຄ້າໃນລາຄາທີ່ຕໍ່າກວ່າຕະຫຼາດທົ່ວໄປ ເຊິ່ງໂຄງການດັ່ງກ່າວນີ້ ແມ່ນເປັນການຮ່ວມມຶ ລະຫວ່າງ ກະຊວງ ອຄ ກັບ ສະມາຄົມຜູ້ຜະລິດ ແລະ ປຸງແຕ່ງກະສິກຳ ລາວ ໂດຍຈະລິເລີ່ມທົດລອງຈັດຕັ້ງປະຕິບັດ ຢູ່ກະຊວງ ອຄ ກ່ອນແລ້ວຖອດຖອນບົດຮຽນ ແລະ ຂະຫຍາຍໄປຍັງບັນດາກະຊວງອົງການອື່ນໆ ແລະ ຊຸມຊົນຜູ້ມີລາຍຕໍ່າ ທົ່ວໄປ.
ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ໄດ້ເນັ້ນໃຫ້ເຫັນເຖິງ ຄວາມພະຍາຍາມ ແລະ ຄວາມເອົາໃຈໃສ່ ຂອງຂັ້ນເທິງ ຕໍ່ການແກ້ໄຂບັນຫາຊີິວິດການເປັນຢູ່ ຂອງພໍ່ແມ່ປະຊົນ ພະນັກງານທະຫານຕໍ່າຫຼວດ ຜູ້ທີ່ມີລາຍຮັບຕໍ່າ ທີ່ໄດ້ຮັບຜົນກະທົບຈາກຄ່າຄອງຊີບແພງຂຶ້ນ, ການຈັດຕັ້ງປະຕິບັດໂຄງການດັ່ງກ່າວ ຖືເປັນກິດຈະກຳສຳຄັນໜຶ່ງ ໃນການຜັນຂະຫຍາຍການຈັດຕັ້ງປະຕິບັດ ມະຕິຂອງກົມການເມືອງສູນກາງພັກ ວ່າດ້ວຍເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024 ແລະ ສືບຕໍ່ຜັນຂະຫຍາຍການຈັດຕັ້ງປະຕິບັດ ມະຕິຕົກລົງ ວ່າດ້ວຍການແຕ່ງຕັ້ງຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 19/ກມສພ, ລົງວັນທີ 30 ມິຖຸນາ 2023 ແລະ ຄໍາສັ່ງຂອງນາຍົກລັດຖະມົນຕີ ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 13/ນຍ, ລົງວັນທີ 09 ສິງຫາ 2023.
ທ່ານ ລັດຖະມົນຕີ ກ່າວວ່າ ເພື່ອຄວາມຍືນຍົງຮຽກຮ້ອງໃຫ້ຄະນະເອົາໃຈໃສ່ບັນດາບັນຫາ ແລະ ສີ່ງທ້າທາຍຄື: ສົ່ງເສີມການຜະລິດ ແລະ ໃຫ້ມີຕະຫຼາດຈໍາໜ່າຍ, ສົ່ງເສີມການຊົມໃຊ້ທີ່ຜະລິດໄດ້ພາຍໃນໃຫ້ເປັນວົງກວ້າງ, ສົ່ງເສີມເສດຖະກິດ ແລະ ວຽກເຮັດງານທໍາ, ຫຼຸດຜ່ອນການນໍາເຂົ້າສິນຄ້າທີ່ຜະລິດໄດ້ພາຍໃນ, ຫຼຸດຜ່ອນຕົ້ນທຶນໃນການຜະລິດ, ຫຼຸດຜ່ອນການຂາດດຸນການຄ້າ ການຂາດດຸນເງິນຕາ ແລະ ເພື່ອສົ່ງເສີມການຮ່ວມມືລະຫວ່າງພາກລັດ, ທຸລະກິດ ແລະ ສະມາຄົມຜູ້ຜະລິດ ແລະ ປຸງແຕ່ງກະສິກຳ ລາວ ໃຫ້ຕໍ່ເນື່ອງ ກ້າວໄປເຖິງການນໍາເອົາບົດຮຽນດັ່ງກ່າວຜັນຂະຫຍາຍໄປໃນສັງຄົມໃຫ້ກວ້າງຂຶ້ນ.
ທ່ານ ບຸນທ່ຽງ ລັດຕະນະວົງ ປະທານສະມາຄົມຜູ້ຜະລິດ ແລະ ປຸງແຕ່ງກະສິກໍາລາວ ກ່າວວ່າ: ສິນຄ້າທີ່ນໍາມາຈໍາໜ່າຍ ແມ່ນເຕົ້າໂຮມເອົາສິນຄ້າທີ່ເປັນຜົນຜະລະລິດຂອງສະມາຊິກ ໃນສະມາຄົມ ຈະເຮັດແນວໃດໃຫ້ທຸກຕ່ອງໂສ້ການຜະລິດນັ້ນຢູ່ໄດ້ ໝາຍຄວາມວ່າ ຜູ້ຜະລິດຢູ່ໄດ້, ຜູ້ຈໍາໜ່າຍຢູ່ໄດ້ ແລະ ທີ່ສໍາຄັນທີ່ສຸດແມ່ນຜູ້ບໍລິໂພກມີທາງເລືອກ ຊື້ສິນຄ້າທີ່ລາຄາປະຢັດ ສະນັ້ນພວກເຮົາຈື່ງລົງເລີກຄົ້ນຄວ້າໂຄງປະກອບລາຄາ ວ່າອັນໃດເຮົາສາມາດ ປະຢັດໄດ້. ສະມາຄົມໄດ້ບໍລິຫານ ຫຼື ດັດສົມຕ່ອງໂສ້ ການຈໍາໜ່າຍສິນຄ້າ ໝາຍຄວາມວ່າຈໍານວນໜຶ່ງແມ່ນເອົາມາໃຫ້ຜູ້ບໍລິໂພກໂດຍກົງ ເຮັດໃຫ້ພວກເຮົາສາມາດປະຢັດລາຄາໄດ້ 10-15% ແລະ ທີ່ສໍາຄັນບໍ່ໄດ້ກະທົບພາກສ່ວນອື່ນທີ່ ເຂົາເຈົ້າເຮັດການຜະລິດ ຫຼື ການຈໍາໜ່າຍໃນກົນໄກປົກະຕິ (ປະຢັດບາງຂອດ ເພື່ອໃຫ້ຜູ້ບໍລິໂພກໄດ້ຊົມໃຊ້ ສິນຄ້າທີ່ຈໍາເປັນໃນລາຄາຍ່ອມເຍົາ) ສິນຄ້າທີ່ພວກເຮົາເອົາມາ ລ້ວນແລ້ວແຕ່ເປັນສິນຄ້າທີ່ຈໍາເປັນໃນຊີວິດການເປັນຢູ່ໃນຄົວເຮືອນ ບໍ່ວ່າຈະເປັນອາຫານສົດ ອາຫານແຫ້ງ ເຄື່ອງປຸງ ແລະ ສິນຄ້າສໍາເລັດຮູບ ນອກຈາກນັ້ນຍັງມີສິນຄ້າອຸປະໂພກ ບໍລິໂພກ ຈໍານວນໜຶ່ງ ໂດຍສະເພາະແມ່ນເຄື່ອງໃຊ້ໃນຄົວເຮືອນເຊິ່ງເປັນຜົນຜະລິດຂອງ ສະມາຊິກຂອງພວກເຮົາ 90% ເຊິ່ງໂດຍລວມແມ່ນສິນຄ້າລາວ 100%.
ໂຄງການດັ່ງດ່າວຈັດຕັ້ງປະຕິບັດໃນກະຊວງ ອຄ ຖ້າວ່າປະເມີນຜົນແລ້ວວ່າຕອບຮັບດີ ພວກເຮົາອາດຈະຂະຫຍາຍສູ່ອົງການຈັດຕັ້ງອື່ນ. ຈະໄດ້ສົມທົບກັບ ສໍານັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ເອັສເອັມອີ) ຮ່ວມກັບ ສະຖາບັນການເງິນທີ່ໄດ້ຮັບທຶນ ຈາກສໍານັກງານສົ່ງເສີມ ເອັສເອັມອີ ລົງຫາ ກຸ່ມຜູ້ຜະລິດ ຫຼື ບັນດາກຸ່ມຈຸດສຸມການຜະລິດກະສິກໍາ ທີ່ເຫັນວ່າມີທ່າແຮງ ເຮົາຈະເຮັດວຽກແບບລົງເລີກ ເພື່ອດືງເອົາທ່າແຮງທີ່ມີຢູ່ ໃຫ້ກາຍເປັນສິນຄ້າ ຫຼື ຜະລິດຕະພັນ ທີ່ມີຜົນຕໍ່ຊີວິດການເປັນຢູ່ ຂອງປະຊາຊົນ ໃຫ້ກວ້າງອອກ ຫຼັງຈາກນີ້ພວກເຮົາຈະດໍາເນີນຕໍ່ຢ່າງເປັນປົກະຕິ ເຮັດໃຫ້ໂຄງການດໍາເນີນໄປຢືນຍົງ ໄລຍະຍາວ ເພາະວ່າ ເບີ່ງແລ້ວ ແຕ່ລະຕ່ອງໂສ້ຢູໄດ້ ແຕ່ລະພາກສ່ວນແມ່ນສາມາດຢູ່ໄດ້. ໂຄງການດັ່ງກ່າວເປີດຂາຍທຸກວັນລັດຖະການ ຢູ່ຊັ້ນ 1 ກະຊວງ ອຸດສາຫະກໍາ ແລະ ການຄ້າ
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ
