ກະຊວງອຸດສາຫະກໍາ ແລະ ແລະ ການຄ້າ (ອຄ) ໄດ້ຈັດກອງປະຊຸມ ປະເມີນຜົນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ແລະ ທິດທາງແຜນການປີ 2025, ໃນວັນທີ 26 ທັນວາ 2024 ທີ່ກະຊວງ ອຄ ເປັນປະທານຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາ ຄະນະບໍລິຫານງານພັກກະຊວງ ລັດຖະມົນຕີກະຊວງ ອຄ ເຂົ້າຮ່ວມມີ ຄະນະປະຈຳພັກກະຊວງ, ກໍາມະການຄະນະພັກກະຊວງ, ເລຂາ, ຄະນະພັກຮາກຖານ ແລະ ພະນັກງານນໍາພາຫຼັກແຫຼ່ງ ຂອງກະຊວງ ອຄ.
ທ່ານ ມະໄລທອງ ກົມມະສິດ ໄດ້ກ່າວວ່າ: ການສະຫຼຸບການຈັດຕັ້ງປະຕິບັດວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ແມ່ນໃນທ່າມກາງທີ່ສະພາບການຂອງສາກົນ, ພາກພື້ນ ແລະ ພາຍໃນປະເທດ ໄດ້ມີການຜັນແປຢ່າງສັບສົນ ເຊິ່ງໄດ້ສົ່ງຜົນກະທົບໂດຍກົງ ແລະ ທາງອ້ອມ ຕໍ່ການພັດທະນາເສດຖະກິດ ຂອງປະເທດເຮົາ ສະແດງອອກ: ລາຄານໍ້າມັນເຊື້ອໄຟ ຍັງຂຶ້ນ-ລົງບໍ່ທັນປົກກະຕິ, ລາຄາສິນຄ້າອຸປະໂພກ-ບໍລິໂພກ, ອັດຕາແລກປ່ຽນເງິນກີບ ແລະ ອັດຕາເງິນເຟີ້ ຢູ່ໃນລະດັບທີ່ດີຂຶ້ນ ແລະ ການກະກຽມກອງປະຊຸມໃຫຍ່ຂອງ 2 ຂັ້ນ ພາຍໃນອົງຄະນະພັກກະຊວງພວກເຮົາ.
ໃນການຈັດຕັ້ງປະຕິບັດການຕີລາຄາໜ່ວຍພັກປອດໃສ ເຂັ້ມແຂງ ໜັກແໜ້ນ ປີນີ້ກໍເປັນການປະເມີນເປັນປີທີ 3 ພາຍຫຼັງທີ່ຂ້າພະເຈົ້າ ໄດ້ມາຮັບໜ້າທີ່ຢູ່ກະຊວງ. ແລະ ພວກເຮົາກໍໄດ້ພະຍາຍາມປັບປຸງວິທີການ ໃນການປະເມີນຫຼາຍຄັ້ງ ເພື່ອໃຫ້ຜົນການປະເມີນມັນສອດຄ່ອງກັບຕົວຈິງ ແລະ ໄປຕາມຈິດໃຈຂອງສູນກາງພັກ. ພວກເຮົາໄດ້ປັບປຸງວິທີການດຳເນີນການປະເມີນ ຫຼາຍຮູບແບບ ຄື ຈັດປະເມີນເປັນໜ່ວຍ, ຈັດປະເມີນເປັນກຸ່ມຍ່ອຍຕາມຂົງເຂດວຽກງານ ແລະ ກອງປະຊຸມປະເມີນລວມທຸກ ໜ່ວຍພັກ. ພິເສດ ປີນີ້ ພວກເຮົາກໍໄດ້ຄົ້ນຄວ້າອອກ ຄຳແນະນຳ ກ່ຽວກັບ ການປະເມີນຕີລາຄາໜ່ວຍພັກປອດໃສ ເຂັ້ມແຂງ ໜັກແໜ້ນ ພາຍໃນອົງຄະນະພັກ ກະຊວງອຸດສາຫະກຳ ແລະ ການຄ້າ ສະບັບເລກທີ 0159/ຄບພ.ອຄ, ລົງວັນທີ 02 ກັນຍາ 2024 ເພື່ອໃຫ້ການປະເມີນຊັດເຈນກວ່າເກົ່າ ໂດຍອາໄສຕົວຊີ້ວັດທີຊັດເຈນ, ແຕ່ກໍບໍ່ໝາຍຄວາມວ່າ ເປັນຕົວຊີ້ວັດທີ່ດີທີ່ສຸດແລ້ວເທື່ອ. ທັງໝົດນີ້ ສ່ອງແສງເຖິງຄວາມພະຍາຍາມຂອງອົງຄະນະພັກເຮົາ ເພື່ອສ້າງການຫັນປ່ຽນດ້ານວຽກພັກ-ພະນັກງານ ເຊິ່ງແມ່ນ 1 ໃນ 3 ດ້ານທີ່ກອງປະຊຸມກາງສະໄໝຄະນະພັກກະຊວງ ຕົກລົງວ່າຈະສຸມໃສ່ ເຮັດໃຫ້ສຳເລັດໃນທ້າຍສະໄໝ.
ໃນວາລະກອງປະຊຸມ ແຕ່ລະໜ່ວຍພັກ ຂຶ້ນມາລາຍງານໂດຍຫຍໍ້ ລົງເລິກ ສະເພາະໜ້າວຽກໃຫຍ່ທີ່ບັນລຸໄດ້, ບັນຫາຄົງຄ້າງຈາກປີຜ່ານມາ ທີ່ແກ້ໄດ້, ບັນຫາທີ່ຍັງຄົງຄ້າງແມ່ນຫຍັງ ແລະ ປີໜ້າຈະແກ້ແນວໃດ
ໃນຕອນທ້າຍ ທ່ານ ມະໄລທອງ ກົມມະສິດ ຍັງໄດ້ ເນັ້ນບາງບັນຫາສໍາຄັນເປັນຕົ້ນແມ່ນ:
- ໃຫ້ ຄະນະໜ່ວຍພັກ ຕ້ອງເອົາໃຈໃສ່ສືບຕໍ່ຄົ້ນຄວ້າຮໍ່າຮຽນ ພ້ອມທັງເອົາໃຈໃສ່ສ້າງສະມາຊິກພັກໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດທີ່ຖືກຕ້ອງ, ມີຄວາມຈົງຮັກພັກດີຕໍ່ອຸດົມການຂອງພັກ, ມີນ້ຳໃຈເສຍສະຫຼະຮັບໃຊ້ຊາດ ຮັບໃຊ້ປະຊາຊົນຢ່າງສຸດໃຈ;
- ໃຫ້ ແຕ່ລະໜ່ວຍພັກ ສືບຕໍ່ກຳແໜ້ນສະພາບ ແລະ ຈຸດພິເສດຂອງໜ່ວຍພັກຕົນ ເພື່ອຫັນແນວທາງນະໂຍບາຍຂອງພັກ ແລະ ມະຕິຂອງຄະນະພັກຂັ້ນເທິງເປັນແຜນການຂອງໜ່ວຍພັກໃຫ້ສອດ ຄ່ອງກັບຄວາມຮັບຜິດຊອບ ແລະ ໜ້າທີ່ການເມືອງຂອງຕົນ ພ້ອມທັງເອົາໃຈໃສ່ຊີ້ນຳ-ນໍາພາການຈັດຕັ້ງປະຕິ ບັດໃຫ້ມີຜົນສຳເລັດ ແລະ ມີປະສິດທິຜົນສູງ;
- ຄະນະໜ່ວຍພັກ, ສະມາຊິກພັກທຸກສະຫາຍ ຕ້ອງມີສະຕິເຄົາລົບ ແລະ ປະຕິບັດກົດລະບຽບຂອງພັກ, ກົດໝາຍ ແລະ ລະບຽບການຕ່າງໆ ຂອງລັດຢ່າງເຂັ້ມງວດ, ເປັນແບບຢ່າງທີ່ດີໃຫ້ແກ່ມະຫາຊົນ, ພ້ອມກັນຮັກສາຄວາມສາມັກຄີເປັນເອກະພາບພາຍໃນການຈັດຕັ້ງພັກຢ່າງແໜ້ນແຟ້ນ, ຕ້ານແນວຄິດຫຼາຍພັກ, ຫຼາຍເຄົ້າ, ກຸ່ມກ້ອນຢູ່ໃນການຈັດຕັ້ງພັກ;
- ເອົາໃຈໃສ່ການຂະຫຍາຍພັກ ແມ່ນວຽກງານໜຶ່ງທີ່ສໍາຄັນຂອງພັກ ຕ້ອງຮັບປະກັນຄຸນນະພາບ, ຂະຫຍາຍໄດ້ຜູ້ໜຸ່ມແໜ້ນ-ຫ້າວຫັນ, ປະສິດທິຜົນວຽກງານດີ, ມີຄຸນສົມບັດສິນທໍາປະຕິວັດ, ມີລະດັບຄວາມຮູ້-ຄວາມສາມາດ, ໜັກແໜ້ນໃນອຸດົມການສັງຄົມນິຍົມ ເພື່ອແບກຫາບພາລະກິດອັນໜັກໜ່ວງຂອງພັກ
5. ດ້ານວຽກງານວິຊາສະເພາະ: ໃຫ້ແຕ່ລະໜ່ວຍພັກ ເອົາໃຈໃສ່ປະຕິບັດໜ້າທີ່ວິຊາສະເພາະຂອງຕົນຕາມພາລະບົດບາດ, ສິດ, ໜ້າທີ່ ໃນການເປັນເສນາທິການໃຫ້ແກ່ຄະນະພັກ-ຄະນະນໍາກະຊວງ ຢ່າງມີຜົນສໍາເລັດ ໂດຍສະເພາະແມ່ນ ການນໍາເອົາມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ແລະ ແຜນພັດທະນາອຸດສາ ຫະກໍາປຸງແຕ່ງ ແລະ ການຄ້າ, ແຜນວຽກບູລິມະສິດ ຂອງກະຊວງ ມາຈັດຕັ້ງປະຕິບັດ ເປັນແຜນການ, ຄາດໝາຍ ແລະ ປະຕິບັດໃຫ້ປະກົດຜົນເປັນຈິງ;
6. ສຳລັບການປະເມີນໃຫ້ຄະແນນກັນແລະກັນຂອງໜ່ວຍພັກ, ໃຫ້ຄົ້ນຄວ້າລະອຽດຮອບດ້ານ ທຽບຜົນງານຕົວຈິງ, ຈຸດຄົງຄ້າງ ຂອງແຕ່ລະໜ່ວຍພັກ ເພື່ອເປັນບ່ອນອີງໃນການຕີລາຄາ ແລະ ໃຫ້ຄະແນນ;
7. ໃຫ້ ກອງເລຂາ ສືບຕໍ່ປັບປຸງບົດລາຍງານການປະເມີນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2024 ແລະ ທິດທາງປີ 2025 ໃຫ້ສໍາເລັດໂດຍໄວ ເພື່ອສະເໜີຜ່ານຄະນະຮັບຜິດຊອບຊີ້ນຳລວມ ແລະ ກອງປະຊຸມຄະນະປະຈຳພັກກະຊວງ ເພື່ອຮັບຮອງ.
ຂ່າວ-ພາບ: ສູນທອງ ສູນສະຖິຕິ ແລະ ຂໍ້ມູນຂ່າວສານ
