ກອງປະຊຸມໜ່ວຍງານຂະແໜງການຄ້າ ແລະ ພາກທຸລະກິດ ຄັ້ງທີ 5 (TPSWG) ເພື່ອທົບທວນຄືນບັນດາຂະບວນການຈັດຕັ້ງປະຕິບັດບົດວິໄຈການເຊື່ອມໂຍມເຂົ້າສາກົນດ້ານການຄ້າ (Diagnostic Trad Integration Study DTIS) ເປີດຂຶ້ນໃນເຊົ້າວານນີ້. ຂະນະທີ່ພາກທຸລະກິດສະເໜີກ່ຽວກັບອັດຕາຫຼຸດພາສີນຳເຂົ້າ, ບັນຫາແຮງງານ, ການມີສ່ວນຮ່ວມຂອງສະພາທຸລະກິດຕ່າງປະເທດກັບສະພາການຄ້າ ແລະ ອຸດສາຫະກຳແຫ່ງຊາດລາວ.
ໃນກອງປະຊຸມພາກລັດ, ພາກທຸລະກິດ ແລະ ບັນດາຄູ່ຮ່ວມພັດທະນາໄດ້ປຶກສາຫາລື-ນຳສະເໜີຄວາມຄືບໜ້າຂອງແຜນງານ ເພື່ອພັດທະນາຂະແໜງການຄ້າ ແລະ ພາກທຸລະກິດ ພ້ອມທັງປຶກສາກ່ຽວກັບການກຽມຄວາມພ້ອມຂອງ ສປປ ລາວ ໃນການເຂົ້າຮ່ວມປະຊາຄົມເສດຖະກິດອາຊຽນ (ເອອີຊີ), ບັນດາຫຼັກການ ແລະ ວິທີການເພື່ອພັດທະນາແຜນພັດທະນາເສດຖະກິດ-ສັງຄົມແຫ່ງຊາດ ຄັ່ງທີ 8 (NSEDP 8) ແລະ ແຜນງານຂອງສະພາການຄ້າ ແລະ ອຸດສາຫະກຳແຫ່ງຊາດລາວໃນການປັບປຸງປະສິດທິພາບ ແລະ ປະສິດທິຜົນຂອງການປຶກສາຫາລືລະຫ່າງ ພາກລັດ ແລະ ພາກທຸລະກິດໃນກອງປະຊຸມ ທຸລະກິດລາວ (LBF) ທີ່ຜ່ານມາ.
ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າໄດ້ກ່າວວ່າ: ກອງປະຊຸມໄດ້ຈັດຂຶ້ນໃນເວລາອັນສຳຄັນຂອງການພັດທະນາເສດຖະກິດ-ສັງຄົມຂອງ ສປປ ລາວ, ໃນຂະນະທີ່ປະເທດຊາດຫາກໍ່ສຳເລັດການທົບທວນຄືນກາງປີ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຄັ້ງທີ 7 ແລະ ຫາກໍ່ປະກອບຄຳເຫັນໃຫ້ກັບຂະບວນການແຜນພັດທະນາໄລຍະຍາວ ລວມມີວິໄສທັດ ສຳລັບປີ 2030, ຍຸດທະສາດພັດທະນາສຳລັບປີ 2016-2025 ແລະ ແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ສຳລັບປີ 2016-2020. ສ່ວນແຜນພັດທະນາໄລຍະກາງ ແລະ ຍາວ ຈະເປັນການສ້າງໂອກາດອັນດີ ເພື່ອຊີ້ໃຫ້ເຫັນສິ່ງທີ່ສາມາດບັນລຸໃນໄລຍະ 2-3 ປີຜ່ານມາ ແລະ ເພື່ອສາມາດບັນລຸໄດ້ບັນດາມາດຕະການທີ່ຈຳເປັນ ເພື່ອໃຫ້ບັນລຸໝາກຜົນໃຫ້ໄດ້ຫຼາຍກວ່າເກົ່າ.
ທ່ານຍັງໄດ້ຮຽກຮ້ອງບັນດາຕົວແທນຂອງພາກລັດ, ຄູ່ຮ່ວມພັດທະນາ, ບັນດາສະມາຄົມນັກທຸລະກິດຮ່ວມປຶກສາຫາລືດ້ານນະໂຍບາຍຢ່າງຕັ້ງໜ້າ ແລະ ນຳໃຊ້ເປັນເຄື່ອງມືໃນການກຳນົດບັນດາອຸປະສັກທີ່ຂີດຂວາງທາງດ້ານການຄ້າ, ການພັດທະນາທຸລະກິດ ແລະ ແກ້ໄຂບັນດາສິ່ງກີດຂວາງນັ້ນ ໂດຍຜ່ານຂະບວນການປຶກສາຫາລືແລກປ່ຽນຄຳຄິດເຫັນຢ່າງກົງໄປກົງມາ.
ໃນກອງປະຊຸມຄະນະບໍລິຫານງານ ແລະ ສະມາຊິດ ສະພາການຄ້າ ແລະ ອຸດສາຫະກຳແຫ່ງຊາດໄດ້ສະເໜີຕໍ່ພາກລັດກ່ຽວກັບແຜນການຂອງລັດຖະບານກ່ຽວກັບການຫຼຸດອັດຕາພາສີນຳເຂົ້າໃຫ້ຍັງຈັກລາຍການໃນຂອບ ເອອີຊີ, ນະໂຍບາຍຂອງລັດຖະບານກ່ຽວກັບການສົ່ງເສີມພາກສ່ວນ ຫຼື ຂະແໜງການໃດໃນຕໍ່ໜ້າ, ບັນຫາແຮງງານຕ່າງປະເທດທີ່ມາເຄື່ອນໄຫວໃນ ສປປ ລາວ ຢາກຂໍຢູ່ຕໍ່ຫຼາຍກວ່າກົດໝາຍກຳນົດອອກຈະມີແນວທາງແນວໃດ?.
ທ່ານ Robert von Rimscha ເອກອັກຄະລັດຖະທູດເຢຍລະມັນປະຈຳ ສປປ ລາວ ໄດ້ຮຽກຮ້ອງໃຫ້ມີການປະສານງານທີ່ດີກວ່າເກົ່າ ລະຫວ່າງພາກລັດ ແລະ ພາກທຸລະກິດ ເຊິ່ງມີຄວາມຈຳເປັນຫຼາຍທີ່ຈະຕ້ອງມີການຈັດກອງປະຊຸມພົບປະນັກທຸລະກິດລາວໃຫ້ເປັນປົກກະຕິກວ່າເກົ່າ ແລະ ຕິດຕາມແກ້ໄຂບັນດາບັນຫາທີ່ນຳສະເໜີ ໂດຍຜູ້ທີ່ເຂົ້າຮ່ວມກອງປະຊຸມດ່ັງກ່າວ.
ທ່ານກ່າວອີກວ່າ: ສະຖານະການດ້ານງົບປະມານຊີ້ໃຫ້ເຫັນວ່າ ບັນດານັກລົງທຶນທີ່ລົງທຶນໃນຂະແໜງການທີ່ນຳໃຊ້ຊັບພະຍາກອນ ຄວາມຮັບຜິດຊອບຕໍ່ພາລະດ້ານອາກອນໃນສັດສ່ວນທີ່ຍຸຕິທຳ, ຜູ້ປະກອບການຕ້ອງປະກອບສ່ວນເຂົ້າໃນການສ້າງຄວາມຫຼາກຫຼາຍດ້ານເສດຖະກິດຂອງລາວທີ່ໄດ້ລົງທຶນໃນໂຮງຈັກ ໂຮງງານ ແລະ ການບໍລິການ ບໍ່ຄວນໄດ້ຮັບພາລະດ້ານອາກອນ, ຄ່າທຳນຽມ ຫຼື ກົດລະບຽບທີ່ເພີ່ມຕື່ມໃດໆ.
ໜ່ວຍງານ TPSWG ແມ່ນໜຶ່ງໃນ 10 ໜ່ວຍງານພາຍໃຕ້ຂະບວນການໂຕະມົນ ແລະ ເປັນເວທີຫຼັກສຳລັບການປຶກສາຫາລືດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມມັດທະນາ ຜູ້ເຂົ້າຮ່ວມໃນກອງປະຊຸມແມ່ນມາຈາກພາກລັດ, ຄູ່ຮ່ວມພັດທະນາ ພາກທຸລະກິດ ແລະ ອົງການຈັດຕັ້ງອື່ນໃນ 10 ໜ່ວຍງານລວມມີ: ສາທາລະນະສຸກ, ສຶກສາ, ການປົກຄອງ, ເສດຖະກິດມະຫາພາກ, ໂຄງລ່າງພື້ນຖານ, ການຄວບຄຸມບັນຫາຢາເສບຕິດ, ລະເບີດບໍ່ທັນແຕກ, ກະສິກຳ ແລະ ພັດທະນາຊົນນະບົດ, ການຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ.
ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 14 ພຶດສະພາຜ່ານມາ ທີ່ໂຮງແຮມລາວພລາຊາ ພາຍໃຕ້ການເປັນປະທານຂອງ ທ່ານ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ແລະ ເປັນປະທານຮ່ວມໂດຍ ທ່ານ Michel Goffin ອຸປະທູດ ອີຢູ ປະຈຳ ສປປ ລາວ ທ່ານ Robert von Rimscha ເອກອັກຄະລັດຖະທູດ ເຢຍລະມັນປະຈຳ ສປປ ລາວ ໂດຍມີພະນັກງານຈາກກະຊວງອຸດສາຫະກຳ ແລະ ການຄ້າ, ບັນດາກະຊວງທີ່ກ່ຽວຂ້ອງ ພາກສ່ວນຈັດຕັ້ງປະຕິບັດໂຄງການ, ນັກທຸລະກິດ, ຄູ່ຮວມພັດທະນາ ແລະ ຜູ້ໃຫ້ທຶນ.
