ໂດຍປະຕິບັດຕາມມະຕິຕົກລົງສະບັບເລກທີ 087/ຄພ.ອຄ, ລົງວັນທີ 29 ພຶດສະພາ 2014 ວ່າດ້ວຍການຮັບຮອງເອົາໜ່ວຍພັກກົມອຸດສາຫະກໍາ ແລະ ຫັດຖະກໍາ ເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ VI ປະຈໍາສົກປີ 2012-2013 ແລະ ຂໍ້ຕົກລົງ ສະບັບເລກທີ 0797/ອຄ.ຈພງ, ລົງວັນທີ 06 ເມສາ 2014 ວ່າດ້ວຍການຍ້ອງຍໍໜ່ວຍພັກເຂັ້ມແຂງ-ຮູ້ນໍາພາຮອບດ້ານຕິດຕໍ່ກັນ. ໃນຕອນບ່າຍຂອງວັນທີ 20 ພຶດສະພາ 2014 ທີ່ຫ້ອງປະຊຸມໃຫຍ່ ກະຊວງອຸດສາຫະກໍາ ແລະ ການຄ້າ, ໜ່ວຍພັກກົມອຸດສາຫະກໍາ ແລະ ຫັດຖະກໍາ ໄດ້ຈັດພິທີມອບ-ຮັບ ໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານຄັ້ງທີ VI ປະຈຳປີ 2012-2013 ແລະ ໃບຍ້ອງຍໍທີ່ມີຜົນງານໃນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ 4 ຄັ້ງຕິດຕໍ່ກັນຂອງກົມຂຶ້ນ, ພິທີດັ່ງກ່າວໄດ້ຮັບກຽດເຂົ້າຮ່ວມເປັນປະທານຂອງ ສະຫາຍ ເຂັມມະນີ ພົນເສນາ ເລຂາຄະນະພັກກະຊວງອຸດສາຫະກໍາ ແລະ ການຄ້າ, ມີບັນດາສະຫາຍຄະນະພັກກະຊວງ, ເລຂາ, ຮອງເລຂາ ແລະ ຜູ້ຕາງໜ້າໜ່ວຍຈາກຫ້ອງການ, ບັນດາກົມ ແລະ ບັນດາວິສາຫະກິດ ປິ່ນອ້ອມອົງຄະນະພັກກະຊວງອຸດສາຫະກຳ ແລະ ການຄ້າ, ພ້ອມດ້ວຍສະມາຊິກພັກສົມບຸນ, ສຳຮອງ ແລະ ພະນັກງານກົມອຸດສາຫະກໍາ ແລະ ຫັດຖະກໍາເຂົ້າຮ່ວມລວມທັງໝົດຫຼາຍກວ່າ 40 ສະຫາຍ. ໃນວາລະພິທີດັ່ງກ່າວເລຂາໜ່ວຍພັກກົມອຸດສາຫະກໍາ ແລະ ຫັດຖະກໍາ ໄດ້ຂື້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານການເຄື່ອນໄຫວຈັດຕັ້ງຊີ້ນຳໆພາຂອງໜ່ວຍພັກໃນໄລຍະ 01 ປີຜ່ານມາ, ຊຶ່ງໄດ້ຍົກໃຫ້ເຫັນຜົນງານອັນພົ້ນເດັ່ນຂອງໜ່ວຍພັກທີ່ຍາດມາໄດ້ໂດຍແມ່ນສະມາຊິກພັກທຸກສະຫາຍພາຍໃນກົມກໍ່ຄືພະນັກງານລັດຖະກອນທຸກຄົນໄດ້ສຸມຈິດໃຈສຸດຄວາມສາມາດ ເຮັດໃຫ້ທຸກວຽກງານຂອງກົມບັນລຸຜົນສຳເລັດໄປໂດຍດີ ໂດຍສະເພາະແມ່ນວຽກງານອຸດສາຫະກໍາປຸງແຕ່ງ ຈາກນັ້ນກໍ່ໄດ້ສະເໜີທິດທາງແຜນການສ້າງໜ່ວຍພັກເຂັ້ມແຂງ-ຮູ້ນຳພາຮ້ອມດ້ານສົກປີ 2013-2014 ຕື່ມອີກ. ໃນພິທີ ສະຫາຍ ເຂັມມະນີ ພົນເສນາ ເລຂາຄະນະພັກ ກະຊວງອຸດສາຫະກຳ ແລະ ການຄ້າ ກໍ່ໄດ້ໃຫ້ກຽດຂື້ນມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ ພ້ອມທັງມອບໃບຍ້ອງຍໍທີ່ໜ່ວຍພັກກົມອຸດສາຫະກໍາ ແລະ ຫັດຖະກໍາໄດ້ຮັບນາມມະຍົດເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ 4 ຄັ້ງຕິດຕໍ່ກັນ ຢ່າງສົມກຽດ ພ້ອມທັງໄດ້ໃຫ້ຄໍາໂອວາດ, ຄໍາເຫັນຊີ້ນໍາຕໍ່ກອງປະຊຸມ, ຊຶ່ງສະຫາຍໄດ້ຍົກໃຫ້ເຫັນເຖິງຄວາມສຳຄັນຂອງວຽກງານຂະແໜງອຸດສາຫະກໍາ ແລະ ຫັດຖະກໍາ ກໍ່ຄືວຽກງານອຸດສາຫະກໍາປຸງແຕ່ງທີ່ຍາມໃດກໍ່ມີຄວາມສໍາຄັນຕໍ່ກັບການພັດທະນາເສດຖະກິດ-ສັງຄົມຂອງຊາດ ຊຸກຍູ້ຫັນເສດຖະກິດໄປສູ່ການຜະລິດອຸດສາຫະກໍາທີ່ມີກໍາລັງຜະລິດຫຼາຍ ເພື່ອນໍາພາເສດຖະກິດລາວກ້າວຂຶ້ນແຂງກັບປະເທດອື່ນໄດ້ ພ້ອມນີ້ ທ່ານຍັງໄດ້ໂອ້ລົມຕໍ່ຄະນະພັກກົມອຸດສາຫະກໍາ ແລະ ຫັດຖະກໍາ ສຶບຕໍ່ຊຸກຍູ້ຍົກລະດັບຄວາມຮູ້ຄວາມສາມາດຂອງພະນັກງານລັດຖະກອນໃຫ້ເຂັ້ມແຂງ ສືບຕໍ່ຈັດຕັ້ງປະຕິບັດວຽກງານຢ່າງຫ້າວຫັນແນໃສ່ການແຂງຂັນຍ້ອງຍໍຮັກຊາດ ແລະ ພັດທະ ນາຂອງກະຊວງກໍ່ຄືຂອງກົມອຸດສາຫະກໍາ ແລະ ຫັດຖະກໍາ. ຈາກນັ້ນ, ສະຫາຍ ມະໂນຮັກ ຣາຊະຈັກ ເລຂາໜ່ວຍພັກ ກົມອຸດສາຫະກໍາ ແລະ ຫັດຖະກໍາ ໄດ້ຕາງໜ້າໃຫ້ ສະມາຊິກພັກ ແລະ ພະນັກງານ ທັງໝົດພາຍໃນກົມ ຂື້ນຮັບຄຳໂອວາດ ຈາກ ສະຫາຍ ເລຂາຄະນະພັກ ກະຊວງອຸດສາຫະກຳ ແລະ ການຄ້າ ທີ່ໄດ້ໃຫ້ທິດເຍືອງທາງແກ່ບັນດາສະຫາຍສະມາຊິກພັກ ກໍຄືພະນັກງານທຸກຄົນພາຍໃນກົມ ເພື່ອພ້ອມກັນສູ້ຊົນບຸກບືນຮັກສາມູນເຊື້ອ ແລະ ປະກອບສ່ວນເຂົ້າໃນ ການຈັດຕັ້ງປະຕິບັດໜ້າທີ່ວຽກງານຂອງຕົນຕາມການມອບໝາຍ ໃຫ້ມີປະສິດທິຜົນສູງ ແລະ ໄດ້ຮັບຜົນສຳເລັດຕາມລະດັບຄາດໝາຍ.
