ອີງຕາມການສະເໜີຂອງຄະນະຈັດຕັ້ງສູນກາງພັກສະບັບເລກທີ 116/ຄຈສພ ລົງວັນທີ 12/04/2014, ອີງຕາມການຕົກລົງເຫັນດີເປັນເອກະພາບໃນກອງປະຊຸມປະຈຳເດືອນຂອງຄະນະພັກກະຊວງອຸດສາຫະກຳ ແລະ ການຄ້າ.
ນາຍົກລັດຖະມົນຕີຈຶ່ງອອກດຳລັດເລກທີ 159/ນຍ ລົງວັນທີ 29/04/2014 ແຕ່ງຕັ້ງທ່ານ ສົມຫວັງ ນິນທະວົງ ເປັນຫົວໜ້າຫ້ອງການກະຊວງອຸດສາຫະກຳ ແລະ ການຄ້າ ຜູ້ໃໝ່.
ພິທີດັ່ງກ່າວໄດ້ມີຂຶ້ນໃນວັນທີ 30 ພຶດສະພາຜ່ານມາ ທີ່ກະຊວງອຸດສາຫະກຳ ແລະ ການຄ້າ (ອຄ) ພາຍໃຕ້ການເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງ ອຄ, ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການ ກະຊວງ ອຄ ເຂົ້າຮ່ວມ ມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ພະນັກງານວິຊາການອ້ອມຂ້າງກະຊວງ.
ໃນພິທີຍັງໄດ້ແຕ່ງຕັ້ງ ທ່ານ ພັນ ວິໄລສົມ ຫົວໜ້າກົມນະໂຍບາຍການຄ້າຕ່າງປະເທດຜູ້ເກົ່າ ມາເປັນຫົວໜ້າກົມສົ່ງເສີມ ແລະ ພັດທະນາສິນຄ້າຜູ້ໃໝ່ ແລະ ໄດ້ແຕ່ງຕັ້ງ ທ່ານ ດຣ. ລາວຮົວ ເຈີຈິງ ຮອງກົມນະໂຍບາຍການຄ້າຕ່າງປະເທດຂຶ້ນເປັນຫົວໜ້າກົມນະໂຍບາຍການຄ້າຕ່າງປະເທດຜູ້ໃໝ່.
ທ່ານ ນາງ ເຂັມມະນີ ພົນເສນາ ກ່າວວ່າ: ການສັບຊ້ອນຄະນະນຳກະຊວງຄັ້ງນີ້ກໍ່ແມ່ນອີງໃສ່ການຕົກລົງເຫັນດີເປັນເອກະພາບໃນກອງປະຊຸມປະຈຳເດືອນຂອງຄະນະພັກກະຊວງ ອຄ ຄັ້ງວັນທີ 23 ພຶດສະພາ 2014 ແລະ ອີງໃສ່ຄວາມຮຽກຮ້ອງຕົວຈິງຂອງໜ້າວຽກໃນການຊີ້ນຳໆພາວຽກງານອຸດສາຫະກຳ ແລະ ການຄ້າ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ.
ທ່ານກ່າວຕື່ມອີກວ່າ: ວຽກງານສະເພາະໜ້າແມ່ນເຕັມໄປດ້ວຍກາລະໂອກາດ ແລະ ສິ່ງທ້າທາຍຈາກເງື່ອນໄຂສະພາບຄວາມບໍ່ສະຫງົບໃນພາກພື້ນ ແລະ ສາກົນມີການປ່ຽນແປງ ທ່ານໄດ້ຮຽກຮ້ອງໃຫ້ພະນັກງານທຸກຂະແໜງການຂອງກະຊວງຈົ່ງໄດ້ພ້ອມກັນມີສະຕິໃນການປະຕິບັດໜ້າທີ່, ມີການປະສານງານກັນແບບເປັນໝູ່ຄະນະຫຼີກເວັ້ນການພົວພັນກັນແບບໃຊ້ເຈ້ຍນ້ອຍ ເຊິ່ງຈະເຮັດໃຫ້ວຽກງານຂາດປະສິດທິພາບ.
ທ່ານ ສົມຫວັງ ນິນທະວົງ ຫົວໜ້າຫ້ອງການກະຊວງ ອຄ ໄດ້ກ່າວວ່າ: ການຮັບໜ້າທີ່ໃໝ່ຄັ້ງນີ້ແມ່ນເຕັມໄປດ້ວຍຄວາມທ້າທາຍຕໍ່ຄວາມຮູ້ ຄວາມສາມາດ ຈາກຜົນສຳເລັດ ແລະ ເປົ້າໝາຍຂອງຫົວໜ້າຫ້ອງການຜູ້ເກົ່າສ້າງ ແລະ ບັນລຸຜົນສຳເລັດຜົນງານຫຼາຍດ້ານໄວ້ໃຫ້ຜູ້ສືບຕໍ່ວຽກງານໃນຄັ້ງຕໍ່ໄປ ແນວໃດກໍ່ຕາມເມື່ອຖືກມອບໝາຍໃຫ້ຂ້າພະເຈົ້າຈະຕ້ອງສູ້ຊົນບຸກບືນທີ່ສຸດ ເພື່ອສືບຕໍ່ຜັນຂະຫຍາຍພາລະກິດດັ່ງກ່າວໃຫ້ຈະເລີນງອກງາມ ແລະ ກ້າວໜ້າຂຶ້ນເລື້ອຍໆ.
