ຫວ່າງບໍ່ດົນມານີ້ທີ່ ພະແນກອຸດສາຫະກຳ ແລະ ການຄ້າແຂວງຄຳມ່ວນ ໄດ້ຈັດ ກອງປະຊຸມທົບທວນຜົນການ ທົດລອງ ສ້າງຄັງແຮແຊກແຊງ ລາຄາ ແລະ ດັດສົມຕະຫຼາດ. ໂດຍການເປັນປະທານຂອງ ທ່ານ ບຸນມີ ມະນີວົງ ລັດຖະ ມົນຕີຊ່ວຍ ວ່າການກະຊວງອຸດ ສາຫະກຳ ແລະ ການຄ້າ ຊຶ່ງ ມີພະແນກອຸດສາຫະກຳ ແລະ ການຄ້າແຂວງຄຳມ່ວນ, ປະທານ ກຸ່ມ ໂຮງສີເຂົ້າຮ່ວມ.
ທ່ານ ສິງເພັດ ແກ້ວໂສ ພາ ຫົວໜ້າພະແນກອຸດສາຫະ ກຳ ແລະ ການຄ້າແຂວງຄຳ ມ່ວນໄດ້ລາຍງານໃຫ້ຮູ້ວ່າ: ແຂວງຄຳມ່ວນໄດ້ຮັບເງິນກູ້ ຢືມຈາກລັດຖະບານ ຕາງໜ້າ  ໂດຍກະຊວງອຸດສາຫະກຳ ແລະ ການຄ້າເປັນຜູ້ປ່ອຍກູ້ໃນ ຈຳນວນ 20 ຕື້ກີບ, ໃນອັດຕາ ດອກເບ້ຍ 5% ຕໍ່ປີ. ໃນການຈັດຕັ້ງປະຕິບັດແມ່ນອີງໃສ່ລະບຽບວ່າດ້ວຍການຄຸ້ມຄອງ ເຂົ້າຄັງແຮແຊກແຊງ ລາຄາ ແລະ ດັດສົມຕະຫຼາດຂອງກຸ່ມ ໂຮງສີເຂົ້າແຂວງຄຳມ່ວນ ຊຶ່ງ ເປັນການປະກອບສ່ວນອັນ ໃຫຍ່ຫຼວງຂອງກຸ່ມໂຮງສີໃນ ສັງຄົມ ເວົ້າສະເພາະປະຊາຊົນ ແຂວງຄຳມ່ວນໃນການປະຕິ ບັດນະໂຍບາຍຄ້ຳປະກັນທາງ ດ້ານສະບຽງອາຫານ ສາມາດ ເຮັດໃຫ້ເຂົ້າກິນໃນແຂວງມີສະ ຖຽນລະພາບທີ່ດີທາງດ້ານຈຳ ນວນ, ຄຸນນະພາບ ແລະ ດ້ານ ລາຄາທຽບໃສ່ກ່ອນການສ້າງ ຕັ້ງຄັງເຂົ້າແຮລາຄາຊື້-ຂາຍ ເຂົ້າແມ່ນມີການປັບປຸງຂຶ້ນໆລົງໆເຮັດໃຫ້ປະຊາຊົນບໍ່ເຊື່ອ ໝັ້ນຕໍ່ການບໍລິຫານຂອງລັດ ເທົ່າທີ່ຄວນ. ຫຼັງຈາກສ້າງຕັ້ງແລ້ວເຫັນວ່າລາຄາຊື້-ຂາຍ ມີທ່າອ່ຽງດີຂຶ້ນ ແລະ ສອດ ຄ່ອງກັບນະໂຍບາຍດ້ານເສດ ຖະກິດຂອງລັດໃນການຫັນ ເປັນອຸດສາຫະກຳ ແລະ ທັນສະໄໝ. ໂຄງການດັ່ງກ່າວຍັງເປັນການສະໜັບສະໜູນໃນການສ້າງຄວາມອາດສາມາດ ໃຫ້ແກ່ກຸ່ມ ໂຮງສີເຂົ້າຄຳມ່ວນ ພັດທະນາໃນການຄ້ຳປະກັນເຂົ້າແຮໄວ້ ແລະ ເປັນສິນຄ້າໃຫ້ໄດ້ທັງທາງດ້ານຈຳນວນ, ລາຄາ ແລະ ຄຸນນະພາບ.ນອກນັ້ນກຸ່ມໂຮງສີຍັງມີການປັບປຸງໂຄງລ່າງຂອງໂຮງສີເຂົ້າໃຫ້ໄດ້ມາດຕະຖານມີການນຳໃຊ້ເຕັກນິກ,ເຕັກໂນໂລຊີທີ່ທັນ ສະໄໝເຂົ້າມາຮັບໃຊ້ໃນຂະບວນການຜະລິດຂອງກຸ່ມ,ຮັບປະກັນທາງດ້ານການປຸງແຕ່ງໃຫ້ມີຄຸນນະພາບເພື່ອ
ຜະລິດ ເປັນສິນຄ້າໃນອະນາຄົດ.

ຄັດຈາກ ນສພ ປະຊາຊົນ