ໃນຕອນບ່າຍຂອງວັນທີ 23 ກໍລະກົດ 2014 ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມເຜີຍແຜ່ດໍາລັດ ວ່າດ້ວຍການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນ ໂດຍການເປັນປະທານ ຂອງທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກໍາ ແລະ ກາຄ້າ ເຊິ່ງມີບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານທີ່ຮຽນຈົບປະລິນຍາເອກອ້ອມຂ້າງກະຊວງ ອ.ຄ ເຂົ້າຮ່ວມ. ທ່ານ ລັດຖະມົນຕີວ່າການໄດ້ກ່າວບາງຕອນວ່າ: ດໍາລັດສະບັບນີ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນ, ທະຫານ, ຕໍາຫຼວດ ທີ່ສັງກັດຢູ່ໃນກົງຈັກການຈັດຕັ້ງຂອງພັກ-ລັດຖະບານ, ແນວລາວສ້າງຊາດ, ອົງການຈັດຕັ້ງມະຫາຊົນ, ລັດວິສາຫະກິດ, ວິສາຫະກິດປະສົມ, ລັດຮຸ້ນສ່ວນ ທີ່ເຄື່ອນໄຫວປະຕິບັດໜ້າທີຂອງຕົນດ້ວຍຄວາມຮັບຜິດຊອບສູງ, ມີປະສິທິຜົນ ແລະ ມີຄວາມໂປ່ງໃສແນໃສ່ສະກັດກັ້ນການສໍ້ລາດບັງຫຼວງ ໃນກົງຈັກການຈັດຕັ້ງຂອງພັກ-ລັດຖະບານ, ຊັບສິນ, ລາຍຮັບ ແລະ ໜີ້ສິນທີ່ຕ້ອງແຈ້ງມີຄື: ທີ່ດິນ, ເຮືອນ, ການສືບທອດມູນມໍລະດົກ ແລະ ສິ່ງປຸກສ້າງອື່ນໆ ພາຫະນະປະເພດຕ່າງໆ, ວັດຖຸເຕັກນິກທີ່ນໍາໃຊ້ເຂົ້າໃນການຜະລິດ, ວັດຖຸມີຄ່າ ເປັນຕົ້ນແມ່ນເພັດເງິນ-ຄໍາ, ພັນນະບັດ, ໃບຮຸ້ນ, ເງິນຝາກຢູ່ພາຍໃນ ແລະ ຕ່າງປະເທດ, ຊັບສິນອື່ນໆ, ໜີ້ຕ້ອງຮັບ ແລະ ໜີ້ຕ້ອງສັ່ງຈ່າຍ, ແຕ່ລະປະເພດເສດຖະກິດ. ສ່ວນລາຍຮັບທີ່ຕ້ອງແຈ້ງຄື: ເງິນເດືອນ, ເງິນອຸດໜູນ, ເງິນບໍາເນັດ, ລາຍໄດ້ຈາກການສ້າງເສດຖະກິດຄອບຄົວ, ການດໍາເນີນທຸລະກິດ, ການຂາຍ, ການໃຫ້ເຊົ່າ, ການກູ້ຢືມ, ດອກເບ້ຍເງິນຝາກ, ຂອງຂວັນ (ສະເພາະຂອງຂວັນ, ລາງວັນທີ່ມີມູນຄ່າແຕ່ 5 ລ້ານກີບຂື້ນໄປ) ການບໍລິການ, ຊັບສິນທາງປັນຍາ ແລະ ລາຍຮັບອື່ນໆ
ທ່ານ ໂພໄຊ ຄຳພູມີ ຫົວໜ້າກົມຄົ້ນຄ້ວາ ແລະ ວາລະສານ ກວດກາ, ຄະນະກວດກາສູນກາງພັກ ແລະ ອົງການກວດກາລັດຖະບານ ໄດ້ກ່າວບາງຕອນວ່າ: ການແຈ້ງຊັບສີນຄັ້ງທຳອິດແມ່ນເລີ່ມ ປະຕິບັດແຕ່ເດືອນມີຖຸນາ ເຖີງເດືອນສີງຫາ, ຄັ້ງທີ່ສອງບໍ່ໃຫ້ກາຍເດືອນ ທັນວາ 2014, ກໍລະນີກະຊວງ-ອົງການ ແລະ ທ້ອງຖິ່ນໃດ ຫາກບໍ່ສາມາດຈັດຕັ້ງປະຕິບັດຕາມເວລາທີ່ໄດ້ກຳນົດໄວ້ ຕ້ອງໄດ້ລາຍງານກ່ຽວກັບເຫດຜົນຕໍ່ຂັ້ນເທິງຂອງຕົນ. ການແຈ້ງຊັບສິນ ແລະ ລາຍຮັບຄັ້ງຕໍ່ໆໄປ ໃຫ້ປະຕິບັດ 2 ປີໃດແຈ້ງເທື່ອໜຶ່ງ ນັບແຕ່ວັນແຈ້ງຄັ້ງທຳອິດເປັນຕົ້ນມາ, ສຳລັບເອກະສານແຈ້ງຊັບສິນ ແລະ ລາຍຈ່າຍທີ່ຕ້ອງແຈ້ງນັ້ນຕ້ອງເຮັດເປັນ 2 ຊຸດ ໂດຍແມ່ນທາງອົງການຮັບແຈ້ງຊັບສີນ ຈະເປັນຜູ້ເກັບຮັກສາໄວ້ 1 ຊຸດ ແລະ ຜູ້ແຈ້ງກໍ່ຄືເຈົ້າຂອງຊັບສິນເປັນຜູ້ຮັກສາໄວ້ 1 ຊຸດ.
