ໃນວັນທີ 3 ພະຈິກ 2014 ໄດ້ເປີດກອງປະຊຸມພົບປະຄັ້ງ III ຂອງຄະນະກຳມາທິການຮ່ວມເພື່ອການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສປປ ເກົາຫຼີ ທີ່ ນະຄອນຫລວງວຽງຈັນ, ຊຶ່ງຝ່າຍລັດຖະບານ ແຫ່ງ ສປປ ເກົາຫລີ ນໍາໂດຍ ທ່ານ ຣີ ມີຢອງ ຊານ ລັດຖະມົນຕີຊ່ວຍວ່າການກະຊວງເສດຖະກິດຕ່າງປະເທດ ແຫ່ງ ສປປ ເກົາຫລີ ແລະ ຝ່າຍລັດຖະບານ ແຫ່ງ ສປປ ລາວ ນໍາໂດຍ ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ. ໃນການພົບປະຄັ້ງນີ້ແມ່ນເປັນການຜັນຂະຫຍາຍ ແລະ ທົບທວນຄືນຜົນກອງປະຊຸມພົບປະຄະນະກໍາມະທິການຮ່ວມມືຄັ້ງທີ 2 ທີ່ ພຽງຢາງ ໃນເດືອນກໍລະກົດ 2012 ທີ່ຜ່ານມາ ແລະ ປຶກສາຫາລືກັນກ່ຽວກັບຂອບ ແລະ ເນື້ອໃນຂອງການຮ່ວມມືລະຫວ່າງ ສປປ ລາວ ແລະ ສປປ ເກົາຫລີ ດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ ແນໃສ່ຜັນຂະຫຍາຍການພົວພັນອັນດີ ລະຫວ່າງສອງປະເທດ. ພ້ອມນັ້ນ, ໃນວັນທີ 4 ພະຈິກ 2014 ຈະໄດ້ເຊັນບົດບັນທຶກກອງປະຊຸມດັ່ງກ່າວຊຶ່ງມີການພິຈາລະນາຮ່ວມມືໃນຂົງເຂດອຸດສາຫະກຳ ແລະ ການຄ້າ, ຂົງເຂດກະສິກຳ, ຂົງເຂດເຕັກໂນໂລຊີຂໍ້ມູນຂ່າວສານ, ໂຍທາທິການ, ການສຶກສາ ແລະ ຂົງເຂດບໍ່ແຮ່-ພະລັງງານຊື່ງທັງ ສອງຝ່າຍຈະໄດ້ສືບຕໍ່ປຶກສາກັນລະອຽດ ລະຫວ່າງຂະແໜງການກ່ຽວຂ້ອງຂອງສອງຝ່າຍກ່ຽວກັບຄວາມເປັນໄປໄດ້ຂອງການຮ່ວມມື ເພື່ອນຳສະເໜີລັດ ຖະບານຂອງສອງປະເທດອະນຸມັດ.
ນອກນັ້ນ ຍັງໄດ້ເຂົ້າຢ້ຽມຂໍ່ານັບ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດການຜະລິດ ແລະ ຈໍລະຈອນ ແລະ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ.
[ພາບ ແລະ ຂ່າວຈາກ ສູນສະຖິຕິ ແລະ ຂ່າວສານ, ກົມແຜນການ ແລະ ການຮ່ວມມື]
